រាជធានីភ្នំពេញ ៖ កម្មវិធីបិទគម្រោងជំហានទី៣ និងកម្មវិធីបើកគម្រោងជំហានទី៤ នឹងធ្វើឡើងនៅកំឡុងពេលកិច្ចប្រជុំគណៈកម្មការសម្របសម្រួលអន្តរជាតិសម្រាប់ការការពារ និងអភិវឌ្ឍតំបន់អង្គរ ហៅកាត់ថា(ICC) ។ តាមការគ្រោងទុកលោកសុខ អាន ឧបនាយករដ្ឋមន្ត្រី លោកម៉ាសាហ្វូមី គួរ៉ូគី ឯកអគ្គរាជទូតជប៉ុនប្រចាំកម្ពុជា អ្នកស្រីអាណេ ឡីម៉ាយស្ត្រេ ប្រធានការិយាល័យយូណេស្កូប្រចាំនៅភ្នំពេញ បណ្ឌិតណាកាហ្គាវ៉ា ប្រធានអង្គការJASA នឹងរៀបចំរួមគ្នាជាមួយនឹងឯកអគ្គរាជទូតផ្សេងទៀត អ្នកជំនាញការអន្តរជាតិ និងអ្នកស្រាវជ្រាវព្រមទាំងអ្នកចូលរួមជាង២០០នាក់ ។
ជំហានទី៣ក្នុងការអភិរក្សបានចាប់ផ្តើមពីឆ្នាំ២០០៦ ដល់ឆ្នាំ២០១១ដូចជា ការងារជួសជុលបណ្ណាល័យខាងត្បូងប្រាសាទបាយ័ន, ការសិក្សាអំពីលំនឹងនៃប៉មកណ្តាលប្រាសាទបាយ័ន, ការសិក្សាទៅលើវិធីអភិរក្សចម្លាក់ថ្មកំពែងខាងក្នុង និងការសិក្សាបុរាណវិទ្យាលើបរិវេណប្រាសាទបាយ័ន ។
សម្រាប់ជំហានទី៤ ដែលនឹងចាប់ផ្តើមពីឆ្នាំ២០១២ ដល់ឆ្នាំ២០១៥មានការងារជួសជុលទម្រនៃកំពែងប្រាសាទបាយ័ន ។ ការងារអភិរក្សនៃចម្លាក់កំពែងខាងក្នុងនៃប្រាសាទបាយ័ន ។
ការងារជួសជុលកំពែងខាងក្រៅនៃប្រាសាទបាយ័ន ។ ការសិក្សាទៅលើបុរាណវត្ថុវិទ្យាលើបរិវេណប្រាសាទបាយ័ន ។
កាលពីខែសីហាឆ្នាំនេះ រដ្ឋាភិបាលជប៉ុនបានបញ្ចប់គម្រោងជំហានទី៣នៃការអភិរក្សប្រាសាទអង្គរ ដែលបានចាប់ផ្តើមកាលពីឆ្នាំ២០០៦ ពីជំហានទី១ ដែលបានចាប់ផ្តើមនៅឆ្នាំ១៩៩៤ ដល់ជំហានទី៣ គម្រោងនេះត្រូវបានជួសជុលឡើងវិញនូវប្រាសាទបាយ័ន ប្រាសាទអង្គរវត្ត ដែលស្ថិតនៅទីលានរាជតំណាក់នៃប្រាសាទអង្គរធំ។
នៅតំណាក់កាលទី៣នៃគម្រោងសម្រាប់ប្រាសាទបាយ័ន អគារថ្មដែលហៅថាបណ្ណាល័យ ត្រូវបានកែលម្អដោយប្រើវិធីជំនួសភាគខ្លះហើយសាងសង់ឡើងវិញ ។ ចំពោះការអនុវត្តក្នុងតំណាក់កាលនេះ ក៏មានការសិក្សាពីការកសាងធ្នឹមទ្រនៅតួកណ្តាលប៉មកំពស់៤២ម៉ែត្រ ការសិក្សាដើម្បី រក្សាក្បាច់ចម្លាក់នៅផ្នែកកំពែងខាងក្នុងដែលមានប្រវែងប្រហែល៣០០ម៉ែត្រ និងការសិក្សាផ្នែកបុរាណវិទ្យា ដើម្បីមើលទ្រង់ទ្រាយសំណង់ និងសិក្សាពីអតីតកាល។
នៅជំហានទី៣ ការងារជួសជុលត្រូវបានសម្រេចឡើង ដោយអ្នកជំនាញជនជាតិកម្ពុជា៦រូប និងបុគ្គលិកបច្ចេកទេសបរទេសចំនួន៧០រូប ដែលមានបទពិសោធន៍ក្នុងវិស័យនេះជាង១០ឆ្នាំមកហើយ ខណៈដែលចាប់ផ្តើមការងារនេះ(នៅតំណាក់កាលទី១)ដែលពេលនោះមានអ្នកជំនាញជនជាតិជប៉ុនមកបង្ហាត់ដល់កម្ពុជា ។
នេះជាលទ្ធផលនៃការផ្ទេរបច្ចេកទេស ដែលបានប្រព្រឹត្តទៅកាលពីជាងដប់ឆ្នាំកន្លងទៅ ។ ការបង្ហាញពីលទ្ធភាព ទស្សនៈ ដែលប្រជាជនកម្ពុជាអាចដំណើរការជួសជុល និងថែរក្សាប្រាសាទដោយខ្លួនឯង។ លទ្ធផលការងារ និងការសិក្សា យ៉ាងទូលំទូលាយត្រូវបានបញ្ចប់នៅក្នុងរបាយការណ៍គម្រោងជំហានទី៣ នៃភាគីរដ្ឋាភិបាលជប៉ុនសម្រាប់ថែរក្សាជួសជុលអង្គរ។
ជាបន្ថែមមណ្ឌលព័ត៌មានបាយ័នដែលស្ថិតនៅអគារJASA ត្រូវបានបង្កើតឡើង ។ បណ្ឌលនេះរួមចំណែកក្នុងការណែនាំនូវគម្រោងជួសជុលប្រាសាទសម្រាប់អ្នកទេសចរ និងបង្រៀនកុមារ ព្រមទាំងប្រជាជនកម្ពុជាអំពីប្រាសាទអង្គរ ។
គម្រោងជំហានទី៤ ដែលកំពុងចាប់ផ្តើមនឹងត្រូវបញ្ចប់នៅឆ្នាំ២០១៦ ។ គម្រោងនេះពាក់ព័ន្ធជាចម្បងទៅលើធ្នឹមទម្រប៉មកណ្តាល និងអភិរក្សចម្លាក់ថ្មកំពែងខាងក្នុង ៕
ចែករំលែកព័តមាននេះ