ខេត្តកំពង់ចាម ៖ ពិធីចុះហត្ថលេខាលើ កិច្ចព្រមព្រៀងព្រៃសហគមន៍ចំនួន៥កន្លែងបានប្រព្រឹត្តទៅកាលពីព្រឹកថ្ងៃទី៨ ធ្នូ ២០១១ ស្ថិតនៅឃុំត្រពាំងព្រីង ឃុំត្រពាំងព្រីង ស្រុកតំបែរ ក្រោមអធិបតីភាព លោកលន់ លឹមថៃ អភិបាលរងខេត្ត តំណាងឱ្យលោកហ៊ុន ណេង អភិបាលខេត្ត ដោយមានការចូលរួមពីសំណាក់ប្រជាពលរដ្ឋ អាជ្ញាធរមូលដ្ឋានគ្រប់លំដាប់ថ្នាក់ ព្រមទាំងមន្ត្រីរដ្ឋបាលព្រៃឈើយ៉ាងច្រើនកុះករផងដែរ ។
លោកប្រាក់ ណូម៉ា នាយខណ្ឌរដ្ឋបាលព្រៃឈើកំពង់ចាមបានថ្លែងថា ដោយមានការយកចិត្តទុកដាក់ខ្ពស់ពីសំណាក់លោកបណ្ឌិតច័ន្ទ សារុន រដ្ឋមន្ត្រីក្រសួងកសិកម្ម រុក្ខា ប្រមាញ់និងនេសាទ លោកហ៊ុន ណេង អភិបាលខេត្ត លោកឆេង គឹមស៊ុន ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលព្រៃឈើ និងកិច្ចសហការល្អជាមួយអាជ្ញាធរមូលដ្ឋាន ធ្វើឱ្យកិច្ចការពារព្រៃឈើ ទទួលបានលទ្ធផលគួរឱ្យកត់សម្គាល់ ។
លោកប្រាក់ ណូម៉ា នាយខណ្ឌរដ្ឋបាលព្រៃឈើកំពង់ចាម បានបន្តថា យោងតាមប្រកាសលេខ ៥៥៤ ប្រក.កសក ចុះថ្ងៃទី២០ សីហា ឆ្នាំ២០១០ ស្តីពីការបង្កើតនិងការគ្រប់គ្រងតំបន់ព្រៃសហគមន៍នៅក្នុងខេត្តកំពង់ចាមរបស់ក្រសួងកសិកម្ម រុក្ខា ប្រមាញ់ និងនេសាទ ។ ពិសេសដោយមានការសហការយ៉ាងជិតស្និទ្ធជាមួយអាជ្ញាធរមូលដ្ឋាន អង្គភាពពាក់ព័ន្ធ អង្គការកសិករថ្មី អង្គការក្រៅរដ្ឋាភិបាលនានា និងបងប្អូនប្រជាពលរដ្ឋ បានចូលរួមរៀបចំបង្កើតជាសហគមន៍ព្រៃឈើនៅក្នុងស្រុកតំបែរ ដែលមានចំនួន៥សហគមន៍លើផ្ទៃដីសរុបចំនួន១.៧៨៣ហិកតា និងមានប្រជាជនចូលរួមជាសមាជិកចំនួន១.៤១៧គ្រួសារ ស្ថិតនៅក្នុងឃុំត្រពាំងព្រីងចំនួន៤សហគមន៍ និងនៅក្នុងឃុំគោកស្រុកចំនួន១សហគមន៍ ។
លោកអៀង សាវ៉េត នាយអធិការដ្ឋានរដ្ឋបាលព្រៃឈើមេគង្គ បានគូសបញ្ជាក់ថា ការចុះកិច្ចព្រមព្រៀងព្រៃសហគមន៍នេះ គឺក្នុងគោលបំណងលើកទឹកចិត្តឱ្យសហគមន៍ម្ចាស់ការការពារ ចូលរួមគ្រប់គ្រងអភិរក្សនិងអភិវឌ្ឍន៍ព្រៃឈើប្រកបដោយនិរន្តរភាព តាមរយៈការទទួលផលប្រយោជន៍ប្រកបដោយសមធម៌ និងជីវភាពរស់នៅរបស់ប្រជាពលរដ្ឋកាន់តែប្រសើរឡើងដើម្បីចូលរួមកាត់បន្ថយភាពក្រីក្រ ។ ការប្រគល់ដីព្រៃឈើដែលជាសម្បត្តិសាធារណៈរបស់រដ្ឋឱ្យដល់សហគមន៍គ្រប់គ្រងនេះ ពុំមែនមានន័យថា ផ្តល់ដីព្រៃនេះដាច់ឱ្យសហគមន៍ហើយសហគមន៍អាចមានសិទ្ធិធ្វើការបែងចែកនិងលក់ដូរបាននោះទេ គឺផ្តល់ដីព្រៃឈើឱ្យសហគមន៍ធ្វើការការពារ គ្រប់គ្រងនិងប្រើប្រាស់ធនធានព្រៃឈើប្រកបដោយនិរន្តភាពសម្រាប់់ជាប្រយោជន៍ដល់សហគមន៍ទាំងមូលនាពេលបច្ចុប្បន្ន និងកូនចៅជំនាន់ក្រោយៗទៀត ។
លោកលន់ លឹមថៃ អភិបាលរងខេត្ត បានថ្លែងឱ្យដឹងដែរថា រូបលោកសូមពាំនាំប្រសាសន៍ផ្តាំផ្ញើសាកសួរសុខទុក្ខពីសំណាក់លោកហ៊ុន ណេង អភិបាលខេត្ត ដល់បងប្អូនប្រជាពលរដ្ឋ ទាំងអស់ដែលបានចូលរួមនាឱកាសនេះ។ ការបង្កើតឱ្យមានព្រៃសហគមន៍ស្ថិតនៅក្នុងស្រុកតំបែរ នេះពិតជាធ្វើឱ្យយើងមានមោទនភាពផងដែរ ។ លោកអភិបាលរងខេត្ត បានសង្កត់ធ្ងន់ថា ចំពោះកត្តាដែលធ្វើឱ្យបាត់បង់ព្រៃឈើមានដូចជា សង្គ្រាម កំណើនប្រជាពលរដ្ឋ ការអភិវឌ្ឍ និងគ្រោះធម្មជាតិជាដើម។ ក្នុងនាមអាជ្ញាធរខេត្តសូមសំណូមពរដល់ប្រជាពលរដ្ឋទាំងអស់មេត្តាបញ្ឈប់ការកាប់រុករានទន្ទ្រានយកដីរដ្ឋមកធ្វើជាកម្មសិទ្ធិទៀត ៕
ចែករំលែកព័តមាននេះ