រាជធានីភ្នំពេញ ៖ នៅវេលារសៀលថ្ងៃទី៩ ធ្នូ សាលាដំបូងរាជធានី បានចេញដីកាឱ្យមានការឃុំខ្លួនជន៣នាក់ ដែលជាប់ចោទវាយដំទៅលើចៅក្រមសាលាដំបូងខេត្តមណ្ឌលគិរី លោកម៉េង តូនី ។ ការចេញដីកានេះគឺក្រោយប៉ុន្មានម៉ោងដែលសម្តេចអគ្គមហាសេនាបតីតេជោហ៊ុន សែន ខណៈពេលអញ្ជើញជាអធិបតីក្នុងសម័យប្រជុំគណៈរដ្ឋមន្ត្រីបានណែនាំដល់លោករដ្ឋមន្ត្រីក្រសួងយុត្តិធម៌ឱ្យពិនិត្យចំពោះការអនុវត្តច្បាប់លើករណីសំណុំរឿងបង្ករបួសស្នាម លើចៅក្រមនៃសាលាដំបូងខេត្តមណ្ឌលគិរី និងឱ្យផ្ទេរសំណុំរឿងនោះមកសាលាដំបូងរាជធានី ភ្នំពេញ ។ សម្តេចតេជោក៏បានណែនាំទៀតថា មិនត្រូវអនុគ្រោះឬលើកលែងចំពោះអ្នកបង្កទេ ទោះជាអ្នកនោះជានរណា ឬកូនអ្នកធំណាក្តី ។
រឿងរ៉ាវដែលគួរឱ្យភ្ញាក់ផ្អើលនេះបានកើតឡើងកាលពីរសៀលថ្ងៃទី៤ ធ្នូ កន្លងមក ក្នុងហាងអង្គរហ្វ័ររ៉េស ដែលមានទីតាំងស្ថិតនៅក្នុងភូមិត្រុម សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី ដោយលោកចៅក្រមម៉េង តូនី ត្រូវបានជន៣នាក់វាយដំដោយស្នាប់កាំភ្លើងខ្លីបណ្តាលឱ្យរងរបួសធ្ងន់ធ្ងរនៅត្រង់ក្បាលដែលប្រភពខ្លះថាផុងលលាដ៍ក្បាលផងដែរ តែមិនមានប្រភពផ្លូវការណាមួយអះអាងនោះទេ ។ ទោះបីជាបែបណា លោកម៉េង តូនី ត្រូវបាននាំមកសង្គ្រោះភ្លាមៗនៅមន្ទីរពេទ្យបង្អែកខេត្ត ហើយក៏ត្រូវបានបញ្ជូនបន្តមកមន្ទីរពេទ្យកាល់ម៉ែត រួចបន្តទៅក្រៅប្រទេស ។
នេះជារឿងរ៉ាវលើកដំបូងហើយដែលមានការវាយប្រហារមកលើមន្ត្រីតុលាការ ហើយមិនត្រឹមតែវាយឱ្យមានរបួសយ៉ាងដំណំប៉ុណ្ណោះទេ តែបានព្យាយាមចាប់ពង្រត់តាមរថយន្តថែមទៀត។ តាមសេចក្តីរាយការណ៍ព័ត៌មានជុំវិញហេតុការណ៍នេះបានឱ្យដឹងថា មនុស្សម្នាពេញក្រុងសែនមនោរម្យ មានការភ្ញាក់ផ្អើលយ៉ាងខ្លាំង បន្ទាប់ពីដឹងថា មានក្រុមបុរសបីនាក់បានព្រួតគ្នាវាយលោកចៅក្រមម្នាក់យ៉ាងចាស់ដៃរួចចាប់អូសរុញបញ្ចូលទៅក្នុងរថយន្ត។ ហេតុការណ៍នេះមិនធ្លាប់កើតមានទេ ចំពោះមន្ត្រីស្ថាប័នតុលាការនៅក្នុងខេត្តនេះ ។
ប្រភពព័ត៌មានពីកន្លែងកើតហេតុនិយាយថា នៅម៉ោងប្រមាណជាង៣រសៀល ថ្ងៃនោះគេបានឃើញរថយន្តមួយគ្រឿងម៉ាកធុនត្រា ពណ៌ទឹកប្រាក់ ដែលមានអ្នកជិះចំនួន៣នាក់ ចូលមកផឹកស៊ីក្នុងហាងខាងលើ ហើយក៏មានវត្តមានចៅក្រមម្នាក់នៃសាលាដំបូងខេត្តលោកម៉េង តូនី នៅក្នុងហាងនោះដែរ។ លុះនៅម៉ោងប្រមាណជា៤រសៀល ស្រាប់តែមានការភ្ញាក់ផ្អើលឈុលពេញហាង ដោយសារមនុស្សមួយក្រុមនោះបានព្រួតគ្នាវាយលោកចៅក្រមម៉េង តូនី នឹងកាំភ្លើងខ្លីមិនបន្ធូរដៃ។ មិនត្រឹមតែប៉ុណ្ណោះក្រុមជនដៃដល់បានចាប់អូសជនរងគ្រោះដាក់ចូលក្នុងរថយន្តរបស់ខ្លួន ដឹកចេញទៅបាត់មិនដឹងថាទៅទីណាឡើយ។
តាមប្រភពមិនផ្លូវការឱ្យដឹងនាពេលនោះថានៅពេលរថយន្តមកដល់ចំណុចអូរទេរ ស្ថិតនៅក្នុងភូមិសាស្ត្រស្រុកអូររាំង តាមបណ្តោយផ្លូវជាតិលេខ៧៦A ដែលមានចម្ងាយប្រមាណជាង១០គីឡូម៉ែត្រ ពីកន្លែងកើតហេតុខណៈពេលរថយន្តបើកឡើងចំណោតក្នុងល្បឿនយឺតៗ ជនរងគ្រោះក៏បានបើកទ្វាររថយន្តហក់ចេញដើម្បីគេចខ្លួនពីកណ្តាប់ដៃជនដៃដល់ និងរមៀលខ្លួនតាមជម្រាលផ្លូវដែលមានព្រៃក្រាស់ហើយលាក់ខ្លួន។ ជាសំណាងល្អពេលនោះក្រុមជនដៃដល់រកមិនឃើញ និងដោយខ្លាចសមត្ថកិច្ចតាមពីក្រោយ ក្រុមជនទាំងនោះក៏បានឡើងរថយន្តប្រញាប់ជិះចេញតម្រង់ឆ្ពោះទៅរាជធានីភ្នំពេញគេចខ្លួនបាត់ទៅ។ ប៉ុន្តែ ប្រភពខ្លះថា ពួកគេបានរុញទម្លាក់មិនមែនបើកទ្វាររថយន្តរត់ទេ ។
ការចាប់អារម្មណ៍ពីសាធារណជនជុំវិញបាតុភាពវាយដំលើចៅក្រមសាលាដំបូងខេត្តលោកម៉េង តូនី បណ្តាលឱ្យរងរបួសជាទម្ងន់នោះ មិនត្រូវបានប្រភពណាមួយអះអាងជាផ្លូវការពីឧប្បត្តិហេតុដែលបានកើតឡើងនោះទេ ។ ទោះបីជាបែបណាប្រភពព័ត៌មាននានាខ្លះបានឱ្យដឹងថា លោកចៅក្រម ម៉េង តូនី បានរងរបួសក្បាលធ្ងន់ធ្ងរ។
តាមប្រភពព័ត៌មានពីមន្ត្រីសមត្ថកិច្ចនៃស្នងការដ្ឋានខេត្តមណ្ឌលគិរី បានបញ្ជាក់ឱ្យដឹងថា យោងតាមការបំភ្លឺពីសាក្សីដែលបានឃើញហេតុការណ៍ផ្ទាល់ភ្នែកនិយាយថា ដំបូងគេបានឃើញលោកចៅក្រមអង្គុយផឹកស៊ីជាមួយមិត្តភក្តិមួយក្រុមក្នុងហាងអង្គរហ្វ៊រ៉េស ។ បន្តិចក្រោយមកគេបានឃើញរថយន្តមួយគ្រឿងម៉ាកធុនត្រា ពណ៌ទឹកប្រាក់ ជិះដោយបុរសបីនាក់ក៏បានចូលមកផឹកសីុក្នុងហាងនោះដែរ ។ ខណៈពេលផឹកស្រវឹងស្រឿងៗមិនដឹងជាកើតមានរឿងអ្វី ស្រាប់តែឃើញអ្នកជិះរថយន្តម៉ាកធុនត្រា ពណ៌ទឹកប្រាក់ ពីរនាក់ដើរទៅក្បែរលោកចៅក្រម និងបានស្រែកសួរ ស្រាប់តែជនបង្កបាននាំគ្នាដកកាំភ្លើងខ្លីចេញពីចង្កេះ មកវាយក្បាលនិងខ្លួនប្រាណលោកចៅក្រមមិនបន្ធូរដៃឡើយ។ ដែលចំណុចនេះមន្ត្រីសមត្ថកិច្ចសន្និដ្ឋានថាអាចជាការបង្ករបួសស្នាម ៕
ចែករំលែកព័តមាននេះ