រដ្ឋមន្ត្រីការបរទេសអាមេរិក លោកស្រីហ៊ីល ឡារី គ្លីនតុន គូសបញ្ជាក់កាលពីថ្ងៃទី៨ ធ្នូ នៅទីក្រុងព្រុចសែលថា សហរដ្ឋអាមេរិកគាំទ្រសិទ្ធិ និងបំណងប្រាថ្នារបស់ប្រជាជនរុស្ស៊ី។ លោកស្រីគ្លីនតុន ដែលទៅកាន់ទីក្រុងព្រុចសែល ដើម្បីចូលរួមក្នុងកិច្ចប្រជុំមួយរបស់បណ្តារដ្ឋមន្ត្រីការបរទេសអូតង់បានលើកឡើងជាថ្មីទៀតថា ការបោះឆ្នោតសភារុស្ស៊ីកាលពីថ្ងៃទី៤ ធ្នូ កន្លងមកនេះ ពុំសេរី និងស្មើភាពឡើយ។
ការធ្វើអត្ថាធិប្បាយដ៏ចម្រូងចម្រាសរបស់លោកស្រីគ្លីនតុនកាលពីថ្ងៃទី៦ ធ្នូ កន្លងមកនេះ លើការបោះឆ្នោតសភានៅរុស្ស៊ី បង្កឱ្យមានការរិះគន់នានាពីសំណាក់ក្រុងមូស្គូ។ នៅមុខសារព័ត៌មានលោកស្រីគ្លីនតុន ថ្លែងថា យើងបានសម្តែងការព្រួយបារម្ភរបស់យើងលើការបោះឆ្នោតសភានៅរុស្ស៊ី ។ យើងគាំទ្រសិទ្ធិ និងបំណងប្រាថ្នារបស់ប្រជាជនរុស្ស៊ីក្នុងការធ្វើឱ្យមានការរីកចម្រើននានា ហើយសង្ឃឹមលើអនាគតដ៏ប្រសើរមួយ។
កាលពីថ្ងៃទី៦ ធ្នូ នៅទីក្រុងវីលនីញូស រដ្ឋធានីលីទុយអានី ក្នុងឱកាសនៃកិច្ចប្រជុំមួយរបស់អង្គការដើម្បីសន្តិសុខ និងកិច្ចសហប្រតិបត្តិការនៅអឺរ៉ុប OSCE ប្រមុខការទូតអាមេរិកថ្លែងថា ប្រជាជនរុស្ស៊ី ក៏ដូចជាប្រជាជនដទៃៗទៀតដែរ មានសិទ្ធិឱ្យគេស្តាប់សំឡេងរបស់ខ្លួន។ ប្រការនេះមានន័យថា មានសិទ្ធិក្នុងការបោះឆ្នោតដោយស្មើភាព សេរី តម្លាភាព និងមានបណ្តាមេដឹកនាំដែលមានការទទួលខុសត្រូវចំពោះគេ។
ក្រសួងការបរទេសរុស្ស៊ីចាត់ទុកអត្ថាធិប្បាយទាំងនេះរបស់លោកស្រីគ្លីនតុន ថាពុំអាចទទួលយកបាន ហើយស្នើដល់សហរដ្ឋអាមេរិកឱ្យបញ្ឈប់ការជ្រៀតជ្រែកចូលកិច្ចការផ្ទៃក្នុងរុស្ស៊ី ៕
ចែករំលែកព័តមាននេះ