ខេត្តបន្ទាយមានជ័យ ៖ ជារៀងរាល់ឆ្នាំឱ្យតែដល់រដូវសម្រកនៅច្រកទ្វារអន្តរជាតិប៉ោយប៉ែត គេសង្កេតឃើញឈ្មួញខ្មែរបាននាំ ត្រីទឹកសាបទៅលក់ឱ្យសៀមក្នុងមួយថ្ងៃៗរាល់សិបតោន។ ប៉ុន្តែការនាំចូលត្រីទៅសៀមនោះត្រូវបានគេមើលឃើញថា គ្មានការវេចខ្ចប់ឱ្យបានត្រឹមត្រូវនោះទេ វាបានបង្កឱ្យមានក្លិនឆ្អាប និងស្អុយតាមដងផ្លូវនៅក្បែរនឹងច្រកទ្វារខាងលើ។ ផ្លូវដែលមានក្លិនឆ្អាប និងស្អុយនោះគឺចាប់តាំងពីចំណុចកែងខាងលិចផ្សាររ៉ានៅទល់នឹងស្ពានព្រំដែនមិត្តភាពកម្ពុជាថៃ ដែលក្លិនស្អុយ និងឆ្អាបនេះធ្វើឱ្យប៉ះពាល់ដល់បរិស្ថាន និងការធ្វើដំណើររបស់ភ្ញៀវទេសចរណ៍បរទេសជាខ្លាំង ហើយនៅពេលដែលភ្ញៀវធ្វើដំណើរឆ្លងកាត់ច្រកទ្វារអន្តរជាតិនេះម្តងៗ គឺតែងតែយកដៃខ្ទប់ច្រមុះជានិច្ច។ ក្លិនឆ្អាបនេះកើតឡើងដោយសារការវេចខ្ចប់មិនបានល្អ ចេញពីរទេះដឹកត្រីភ្លាមៗគឺវាមានតែក្លិនឆ្អាបតែប៉ុណ្ណោះ ប៉ុន្តែខណៈពេលដែលដងផ្លូវទៅជាស្ងួតវិញនោះមានក្លិនស្អុយតែម្តង។
គេកត់សម្គាល់ថា ជារៀងរាល់ឆ្នាំឱ្យតែដល់រដូវកាលនាំត្រីចូលទៅសៀម អាជ្ញាធរក្រុងប៉ោយប៉ែត តែងមានវិធានការឱ្យឈ្មួញធ្វើការវេចខ្ចប់ហើយថែមទាំងដាក់វិធានការឱ្យសមត្ថកិច្ចតាមឃ្លាំមើលជាប្រចាំទៀតផង។ តែលុះដល់ឆ្នាំនេះ ដល់រដូវនាំត្រីចូលទៅសៀមហើយគេពុំទាន់ឃើញអាជ្ញាធរក្រុងមានវិធានការនៅឡើយទេ គឺនៅតែបណ្តោយឱ្យក្លិនស្អុយ និងឆ្អាបបន្តកើតឡើងពេញច្រកទ្វារអន្តរជាតិប៉ោយប៉ែតដដែល។
លោកង៉ោ ម៉េងជ្រួន អភិបាលក្រុងប៉ោយប៉ែតបានប្រាប់តាមទូរស័ព្ទនៅព្រឹកថ្ងៃទី២១ វិច្ឆិកា នេះថា សាលាក្រុងបានប្រជុំដាក់ផែនការរួចរាល់ហើយកន្លងទៅថ្មីៗនេះ ឱ្យស្ថាប័នជលផលណែនាំឈ្មួញគ្រប់គ្នាឱ្យមានការវេចខ្ចប់ឱ្យបានត្រឹមត្រូវ ហើយថែមទាំងមិនឱ្យដាក់ ឬវេចខ្ចប់ត្រីមុនការនាំចេញខុសទីតាំងដែលបានណែនាំនោះទេ។ ទោះបីជាបែបណា ជុំវិញការបកស្រាយខាងលើរបស់លោកអភិបាលក្រុងមន្ត្រីជំនាញជលផលប្រចាំក្រុងប៉ោយប៉ែតពុំអាចទំនាក់ទំនងសុំការបំភ្លឺបានទេ ៕
ចែករំលែកព័តមាននេះ