រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជាបានប្រកួតចាញ់ក្រុមនេប៉ាល់១-0 នៅក្នុងព្រឹត្តការណ៍ប្រកួតកំដៅសាច់ដុំនៅលើទីលានពហុកីឡដ្ឋានជាតិ កាលពីយប់ថ្ងៃសុក្រ ទី២៨ តុលា កន្លងមកនេះ។
រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជាបានប្រកួតចាញ់ក្រុមនេប៉ាល់១-0 នៅក្នុងព្រឹត្តការណ៍ប្រកួតកំដៅសាច់ដុំនៅលើទីលានពហុកីឡដ្ឋានជាតិ កាលពីយប់ថ្ងៃសុក្រ ទី២៨ តុលា កន្លងមកនេះ។
គេនៅចាំបានថា ក្រុមជម្រើសជាតិអាយុក្រោម២៣ឆ្នាំ កម្ពុជាធ្លាប់បានចាញ់នេប៉ាល់១-០ម្តងរួចមកហើយ កាលពីឆ្នាំ២០០៨ ប្រកួតនៅលើទីលានពហុកីឡដ្ឋានជាតិ។ លើកនេះប្រវត្តិសាស្ត្រច្រំដែលបានធ្លាក់មកលើកម្ពុជាសាជាថ្មីម្តងទៀត បន្ទាប់ពីក្រុមនេប៉ាល់បានយកឈ្នះលើក្រុមជម្រើសជាតិកម្ពុជា១-០ នៅក្នុងតង់ទី២។
នៅក្នុងតង់ទី១រយៈពេល៤០នាទីដំបូងក្រុមនេប៉ាល់មានប្រៀបជាងកម្ពុជាយ៉ាងខ្លាំង បើទោះជាក្រុមជម្រើសជាតិកម្ពុជាអាចទប់ទល់ស្មើ០-០ក៏ដោយ។ ចូលដល់តង់ទី២ ក្រុមនេប៉ាល់ចាប់ផ្តើមលេងសង្កត់មកលើកម្ពុជាសាជាថ្មីម្តងទៀតរហូតដល់នាទី៨៤ ទើបនេប៉ាល់មានឱកាសស៊ុតបាល់បញ្ចូលទីនាំមុខកម្ពុជា១-០ ដែលរកបានដោយកីឡាករពាក់អាវលេខ៩ Santhosh Shahumla ។
លោកវ៉ាន់ លី អ្នកគ្រប់គ្រងក្រុមបាល់ទាត់ជម្រើសជាតិកម្ពុជាបានឱ្យដឹងថា ការប្រកួតនេះ គឺជាតំណាក់កាលចុងក្រោយបង្អស់ហើយ ដើម្បីកំដៅសាច់ដុំមុនពេលចេញទៅប្រកួតស៊ីហ្គេមនៅឥណ្ឌូណេស៊ី ខណៈដែលនៅសល់តែប៉ុន្មានថ្ងៃទៀតប៉ុណ្ណោះ នឹងត្រូវចេញដំណើរ។ ម្យ៉ាងវិញទៀតក៏ជាការដែលត្រូវធ្វើការសម្រេចចុងក្រោយបង្អស់ក្នុងការជ្រើសរើសសម្រិតសម្រាំងរកកីឡាករល្អចំនួន២០នាក់ ក្នុងចំណោមកីឡាករ២៣នាក់ ស្ថិតក្នុងការប្រមូលផ្តុំហ្វឹកហាត់នាពេលកន្លងមក។
លោកបានបន្តទៀតថា ការប្រកួតនេះលោកក៏មិនសូវមានសង្ឃឹមថា នឹងឈ្នះគេដែរ ព្រោះថាក្រុមរបស់គេធំមានកីឡាករល្អគ្រប់វិស័យ រីឯកម្ពុជាគ្រាន់តែជាកីឡាករជម្រើសក្រោមអាយុ២៣ឆ្នាំប៉ុណ្ណោះ ដែលត្រៀមបម្រុងសម្រាប់ចូលរួមប្រកួតកីឡាស៊ីហ្គេម៕
ចែករំលែកព័តមាននេះ