ខេត្តកំពង់ចាម ៖ ហេតុការណ៍គួរឱ្យភ្ញាក់ផ្អើលមួយបានកើតឡើង កាលពីវេលាម៉ោង១០និង១០នាទីព្រឹកថ្ងៃទី២៦ តុលា ២០១១ នៅសាលាបឋមសិក្សាមេសជ្រៃ ស្ថិតនៅភូមិអូរបេង ឃុំមេសជ្រៃ ស្រុកស្ទឹងត្រង់ ដោយសិស្សានុសិស្សរាប់រយនាក់បិទទ្វារថ្នាក់រៀននិងបានប្រញាប់ប្រញាល់នាំគ្នាចេញទៅផ្ទះព្រោះតែធុំក្លិនថ្នាំពុលបណ្តាលឱ្យកុមារី៣នាក់ពុលរងីរងើត្រូវបាននាំមកសង្គ្រោះជាបន្ទាន់នៅមន្ទីរពេទ្យបង្អែកស្រុកចំការលើ។
លោកគ្រូងួន ស្រ៊ន់ បង្រៀននៅសាលាបឋមខាងលើឱ្យដឹងថា ក្នុងពេលដែលសិស្សកំពុងសិក្សា ស្រាប់តែមានក្លិនម្យ៉ាងភាយចូលមកពេញក្នុងបរិវេណសាលាដែលធ្វើឱ្យសិស្ស និងលោកគ្រូ អ្នកគ្រូទាំងអស់មានការភ្ញាក់ផ្អើលឆោឡោតែម្តង។ លោកគ្រូបានរាយការណ៍ទៅនគរបាលប៉ុស្តិ៍រដ្ឋបាលឃុំមេសជ្រៃ ដើម្បីស្រាវជ្រាវតាមរកក្លិនចម្លែកនោះ ទើបដឹងថា ចេញពីផ្ទះអ្នកភូមិដែលបាញ់ថ្នាំប្រចៀវ។
លោកវរសេនីយ៍ជា ធារិទ្ធ អធិការនគរបាលស្រុកស្ទឹងត្រង់បានឱ្យដឹងថា សិស្សក្មេងៗ៣នាក់ ដែលរងគ្រោះរួមមាន ១-ឈ្មោះយ៉ុន នី ភេទ ស្រី អាយុ១០ឆ្នាំ រៀនថ្នាក់ទី៤ ២-ឈ្មោះខឿន ស្រីល័ក្ខ ភេទស្រី អាយុ៧ឆ្នាំ រៀនថ្នាក់ទី៣ ៣-ឈ្មោះថេន ស្រីនី ភេទស្រី អាយុ៧ឆ្នាំ រៀនថ្នាក់ទី៣ ត្រូវបាននាំទៅសង្គ្រោះនៅមន្ទីរពេទ្យបង្អែកស្រុកចំការលើ ៕
ចែករំលែកព័តមាននេះ