ក្នុងឱកាសនៃការស្នាក់អាស្រ័យអញ្ជើញចូលរួមពិព័រណ៍ចិន-អាស៊ានលើកទី៨ នៅទីក្រុងណាន់នីង ខេត្តក្វាងស៊ី សាធារណរដ្ឋប្រជាមានិតចិន សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជួបពិភាក្សាការងារជាមួយលោកគួ សឹងឃុន លេខាបក្សតំបន់ស្វយ័តក្វាងស៊ី និងលោកម៉ា ពាវ អភិបាលតំបន់ស្វ័យតក្វាងស៊ី ដែលការសន្ទនានោះបានបង្ហាញនូវមិត្តភាពដ៏ជ្រាលជ្រៅរបស់រដ្ឋាភិបាល និងប្រជាពលរដ្ឋកម្ពុជា ជាមួយនឹងប្រជាជន និងរដ្ឋាភិបាលចិន ហើយពិធីប្រជុំ និងតាំងពិព័រណ៍លើកនេះគឺជាទំនាក់ទំនងដ៏មានសារសំខាន់នៅក្នុងទំនាក់ទំនងចិន-អាស៊ានផងដែរ។
ជាការឆ្លើយតប លោកគួ សឹងឃុន លេខាបក្សតំបន់ស្វយ័តក្វាងស៊ី មានប្រសាសន៍ថា សម្តេចតេជោហ៊ុន សែន នាយករដ្ឋមន្ត្រី គឺជាមិត្តចាស់របស់ថ្នាក់ដឹកនាំចិន រួមទាំងថ្នាក់ដឹកនាំ និងប្រជាពលរដ្ឋតំបន់ស្វ័យតក្វាងស៊ីផងដែរ។ សម្តេចតេជោគឺនាយករដ្ឋមន្ត្រីនៃប្រទេសអាស៊ានមួយរូប ដែលបានរួមវិភាគទានយ៉ាងសកម្មចំពោះដំណើរការនៃការតាំងពិព័រណ៍ចិន-អាស៊ានចាប់តាំងពីលើកទី១ រហូតមកដល់លើកទិ៨នេះ ប្រកបដោយលទ្ធផលដ៏ត្រចេះត្រចង់ និងជាពិសេសសម្តេចតេជោគឺជាអ្នកគាំទ្រដែលមានមនោសញ្ចេតនាស្មោះត្រង់ចំពោះប្រជាជនចិន ។ មិនតែប៉ុណ្ណោះ សម្តេចតេជោគឺជានិមិត្តរូបនៃចំណងសាមគ្គីភាពដ៏ជិតស្និទ្ធសម្រាប់ប្រជាជាតិនៃប្រទេសទាំង២កម្ពុជា-ចិន។
នៅចំពោះមុខម្ចាស់អំណោយដ៏សប្បុរសនោះ សម្តេចតេជោមានប្រសាសន៍ថា ទឹកប្រាក់ដ៏សប្បុរសរបស់ប្រជាជន និងរដ្ឋាភិបាលចិន សម្តេចនឹងបង្វែរទៅបម្រើឱ្យការស្តារឡើងវិញលើវិស័យកសិកម្ម ដែលទទួលរងគ្រោះដ៏ធ្ងន់ធ្ងរបំផុតនោះ ។
ដោយឡែក លោកបៃ យីងហ្វូ នាយកគ្រប់គ្រងសាខាធនាគារអភិវឌ្ឍចិន ប្រចាំខេត្តក្វាងស៊ី មានប្រសាសន៍នៅក្នុងឱកាសអញ្ជើញចូលជួបសម្តែងការគួរសម សម្តេចអគ្គមហាសេនាបតីតេជោហ៊ុន សែន នៅថ្ងៃដដែលនោះថា ធនាគារអភិវឌ្ឍចិននៅតែបន្តគោលនយោបាយរបស់ខ្លួនក្នុងការផ្តល់កម្ចីឥណទាន មានទឹកប្រាក់ប្រមាណ១ពាន់លានបន្ថែមទៀត ដល់ដំណើរការស្តារ និងអភិវឌ្ឍប្រទេសកម្ពុជានៅក្នុងឆ្នាំ២០១២៕
ចែករំលែកព័តមាននេះ