ខេត្តបាត់ដំបង ៖ អភិបាលរងខេត្តលោកសៀង ស៊ុតថង មានប្រសាសន៍ថា អាជ្ញាធរ និងគណៈកម្មការដីធ្លីខេត្តបានសំរេចដកហូតដីទំនាស់នៅតំបន់អណ្តូងកន្ទួតក្នុងឃុំដូនបា ស្រុកគាស់ក្រឡ ចំនួន៣.៨០០ហិកតាទុកជាដីសម្បទានសង្គមកិច្ចរបស់រដ្ឋសម្រាប់បែងចែកជូនដល់ប្រជាពលរដ្ឋក្រីក្រ គ្រួសារយោធិនពលី និងពិការនៅតំបន់នោះ
ខេត្តបាត់ដំបង ៖ អភិបាលរងខេត្តលោកសៀង ស៊ុតថង មានប្រសាសន៍ថា អាជ្ញាធរ និងគណៈកម្មការដីធ្លីខេត្តបានសំរេចដកហូតដីទំនាស់នៅតំបន់អណ្តូងកន្ទួតក្នុងឃុំដូនបា ស្រុកគាស់ក្រឡ ចំនួន៣.៨០០ហិកតាទុកជាដីសម្បទានសង្គមកិច្ចរបស់រដ្ឋសម្រាប់បែងចែកជូនដល់ប្រជាពលរដ្ឋក្រីក្រ គ្រួសារយោធិនពលី និងពិការនៅតំបន់នោះនាពេលឆាប់ៗខាងមុខ។
លោកសៀង ស៊ុតថង មានប្រសាសន៍បែបនេះទៅកាន់ប្រជាពលរដ្ឋប្រហែល៣០០នាក់ ក្នុងគ្រាដែលរូបលោកត្រូវបានអញ្ជើញឱ្យចូលរួមជាវាគ្មិនកិត្តិយសនៅក្នុងវេទិកាសាធារណៈមួយស្តីពីសិទ្ធិមនុស្ស និងការអភិវឌ្ឍកាលពីព្រឹកថ្ងៃទី១៥ តុលា ដែលរៀបចំធ្វើឡើងនៅតំបន់អណ្តូងកន្ទួតជាតំបន់មានទំនាស់ដីធ្លីក៏ស្មុគស្មាញបំផុតក្នុងឃុំដូនបា ស្រុកគាស់ក្រឡ ដោយមជ្ឈមណ្ឌលសិទ្ធិមនុស្សកម្ពុជា។
វេទិកានេះមានវាគ្មិនសំខាន់ៗមកពីគណបក្សនយោបាយចំនួន៥ចូលរួមមានគណបក្សប្រជាជនកម្ពុជា គណបក្សសម រង្ស៊ី គណបក្សសិទ្ធិមនុស្ស គណបក្សហ៊្វុនស៊ិនប៉ិច និងគណបក្សនរោត្តម រណឫទ្ធិ។
អភិបាលរងខេត្តលោកសៀង ស៊ុតថង មានប្រសាសន៍ថា អាជ្ញាធរ និងគណៈកម្មការដីធ្លីខេត្តបានត្រៀមរួចស្រេចហើយក្នុងការចុះបែងចែកដីសម្បទានសង្គមកិច្ចនេះ ។ គ្រួសារក្រីក្រគ្មានដីធ្លី គ្រួសារយោធិនពិការ ឬពលី នឹងត្រូវផ្តល់អាទិភាពឱ្យទទួលបានដីសម្បទាននេះមុនគេដែលគម្រោងនេះនឹងធ្វើនាពេលឆាប់ៗខាងមុខនេះ ប៉ុន្តែលោកស្នើសុំដ៏ទទូចដល់ប្រជាពលរដ្ឋដែលមានទំនាស់ដីធ្លីនៅតំបន់អណ្តូងកន្ទួតទាំងអស់បញ្ឈប់សកម្មភាពទាំងឡាយណាដែលនាំឱ្យមានការប្រឈមមុខដាក់គ្នាធ្វើឱ្យពិបាកក្នុងការរកដំណោះស្រាយ។
ការប្រកាសដោយចំហលើកទី១របស់លោកអភិបាលរងខេត្តនៅចំពោះមុខប្រជាពលរដ្ឋចំពោះគម្រោងផ្តល់ដីសម្បទាននេះត្រូវអ្នកតំណាងរាស្ត្រ និងតំណាងគណបក្សនយោបាយចំនួន៥ដែលចូលរួមបង្ហាញពីជំហរគាំទ្ររួមទាំងប្រជាពលរដ្ឋផង ប៉ុន្តែមានចំណុចខ្លះដែលតម្រូវឱ្យអាជ្ញាធរ ឬគណៈកម្មការដីធ្លីស្រាវជ្រាវពិនិត្យឡើងវិញ និងដោះស្រាយ។
លោកអ៊ូ ច័ន្ទឫទិ្ធ អ្នកតំណាងរាស្ត្រមណ្ឌលកណ្តាលមកពីគណបក្សសិទ្ធិមនុស្សបានថ្លែងថា លោកគាំទ្រពេញទំហឹងចំពោះគំរោងនេះ ប៉ុន្តែលោកស្នើឱ្យអាជ្ញាធរពិនិត្យលើបញ្ហាប្រជាពលរដ្ឋដែលកំពុងជាប់ពន្ធនាគារ និងកំពុងរត់គេចខ្លួនដោយសារជំលោះដីធ្លីនៅតំបន់អណ្តូងកន្ទួតនេះ។ អ្នកតំណាងរាស្ត្ររូបនេះបានលើកជាសំណួរថា តើមូលហេតុអ្វីបានជាគេចាត់ការតែលើប្រជាពលរដ្ឋក្រីក្រ ចុះមន្ត្រីមានអំណាច ឬពួកឈ្មួញមានប្រាក់ម៉េចក៏មិនចាត់ការផង នេះជាបញ្ហាមួយដែលអាជ្ញាធរត្រូវតែពិនិត្យ និងដោះស្រាយផង។
តំបន់អណ្តូងកន្ទួត គឺជាតំបន់ដែលមានជម្លោះដីធ្លីដ៏ស្មុគស្មាញបំផុតដែលបង្កឡើងដោយមនុស្សជាច្រើនក្រុមដែលមានយោធា ប្រជាពលរដ្ឋ ឈ្មួញ និងជនចំណាកស្រុក ប៉ុន្តែបើតាមការពន្យល់របស់អាជ្ញាធរថា ប្រភពដើមនៃដីនៅតំបន់នោះគឺជាដីដែលរាជរដ្ឋាភិបាលបែងចែកដល់គ្រួសារអតីតខ្មែរក្រហមក្នុងកងពលលេខ១៨ដែលធ្វើសមាហរណកម្ម។ ក្រោយមកដីនោះមួយចំនួនធ្លាក់លើដៃឈ្មួញ មួយផ្នែកទៀតត្រូវបានមន្ត្រីយោធា និងប្រជាពលរដ្ឋទៅរុករានយកទៅធ្វើកម្មសិទ្ធិផ្ទាល់ខ្លួនយ៉ាងអនាធិបតេយ្យជាហេតុនាំឱ្យមានជម្លោះកាប់ចាក់សម្លាប់គ្នាយ៉ាងព្រៃផ្សៃបំផុត។ រហូតមកដល់ពេលនេះមានប្រជាពលរដ្ឋមួយចំនួនកំពុងជាប់ពន្ធនាគារ ឯមួយចំនួនរត់ចោលស្រុក លើកលែងតែមន្ត្រីមានអំណាច និងឈ្មួញមានប្រាក់ប៉ុណ្ណោះដែលរស់នៅបានសុខសាន្ត។
គម្រោងបែងចែកដីសម្បទានសង្គមកិច្ច៣.៨០០ហិកតាដែលបានមកពីការដកហូតពីដីមានជម្លោះនេះ បង្កឱ្យមានការព្រួយបារម្ភខ្លះៗថា ពួកឈ្មួញ ឬមន្ត្រីមានអំណាចដែលមានដីរាប់រយហិកតានៅតំបន់នោះ តើត្រូវគេដកហូតដូចប្រជាពលរដ្ឋដែរឬយ៉ាងណា?
មន្ត្រីស៊ើបអង្កេតរបស់សមាគមការពារសិទ្ធិមនុស្សអាដហុក លោកយិន ម៉េងលី ដែលបានចូលរួមក្នុងវេទិកានោះដែរមានប្រសាសន៍ថា អាជ្ញាធរនៅមិនទាន់បង្ហាញពីភាពច្បាស់លាស់ក្នុងការដកហូតដីដែលមានវិវាទនេះប្រាប់ដល់ប្រជាពលរដ្ឋនៅឡើយទេ ពីព្រោះក្នុងតំបន់ដីទំនាស់ដែលត្រូវដកហូតធ្វើជាដីសម្បទានសង្គមកិច្ចសម្រាប់បែងចែកជូនប្រជាពលរដ្ឋនេះក៏មានដីរបស់មន្ត្រីមានអំណាច និងដីរបស់ពួកឈ្មួញម្នាក់ៗរាប់រយហិកតាដែរ តើអាជ្ញាធរត្រូវដកហូតដោយរបៀបណា ឬត្រូវឆ្កៀលចេញទុកមួយឡែក ។ នេះជាបញ្ហាមួយដែលអាជ្ញាធរត្រូវឆ្លើយតបឱ្យបានច្បាស់លាស់ប្រាប់ពលរដ្ឋដើម្បីចៀសវាងនូវការរិះគន់ ៕
ចែករំលែកព័តមាននេះ