រាជធានីភ្នំពេញ ៖ ដើម្បីចូលរួមអបអរសាទរដល់ខួបកំណើតរបស់លោកអូន ព័ន្ធមុនីរ័ត្ន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុដែលជាអ្នកស្រឡាញ់កីឡាការ៉ាតេដូដ៏ជ្រាលជ្រៅផងនោះ ក្លឹបមុនីឋាបនា បានរៀបចំការប្រកួតការ៉ាតេដូដណ្តើម ពានរង្វាន់លោកបណ្ឌិតអូន ព័ន្ធមុនីរ័ត្ន នៅក្លឹបមុនីឋាបនា
រាជធានីភ្នំពេញ ៖ ដើម្បីចូលរួមអបអរសាទរដល់ខួបកំណើតរបស់លោកអូន ព័ន្ធមុនីរ័ត្ន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុដែលជាអ្នកស្រឡាញ់កីឡាការ៉ាតេដូដ៏ជ្រាលជ្រៅផងនោះ ក្លឹបមុនីឋាបនា បានរៀបចំការប្រកួតការ៉ាតេដូដណ្តើម ពានរង្វាន់លោកបណ្ឌិតអូន ព័ន្ធមុនីរ័ត្ន នៅក្លឹបមុនីឋាបនា រយៈពេល២ថ្ងៃគឺនៅថ្ងៃទី១៧ និង១៨កញ្ញា ដោយមានកីឡាករ-កីឡាការិនីចូលរួមប្រកួត៣៣៨នាក់ ក្នុងនោះកីឡាការិនីមានចំនួន១៥៦នាក់ ។ ចំពោះការប្រកួតនេះ កីឡាករ-កីឡាការិនីណា ដែលទទួលបានចំណាត់ថ្នាក់លេខ១ ទទួលបានទឹកប្រាក់៣០ដុល្លារ កង់១គ្រឿង និងឃីត១កញ្ចប់ មានថ្នាំដុសធ្មេញ ច្រាសដុសធ្មេញ ទឹកក្រូច១កេស មី១កេស សៀវភៅសរសេរ៥ក្បាល ប៊ិច៥ដើម និងម្សៅសាប៊ូ១គីឡូក្រាម ។ លេខ២ ទទួលបានប្រាក់២៥ដុល្លារ ឃីត១កញ្ចប់ លេខ៣ បាន២០ដុល្លារ និងឃីត១កញ្ចប់ ។
លោកវរសេនីយ៍ទោដែក ភារៈ នាយរងការិយាល័យបុគ្គលិកនៃមជ្ឈមណ្ឌលកីឡាកងយោធពលខេមរភូមិន្ទ បានថ្លែងថា នេះជាលើកទីបីហើយ ដែលគណៈកម្មការសាលាការ៉ាតេដូ-ប៊ូដូកម្ពុជា រៀបចំការប្រកួតកីឡាការ៉ាតេដូនេះ ដើម្បីអបអរសាទរខួបកំណើតលោកបណ្ឌិតអូន ព័ន្ធមុនីរ័ត្ន ដែលជាអ្នកស្រឡាញ់ការ៉ាតេដូ ដ៏ជ្រាលជ្រៅ ។ ជាមួយនេះ គឺក្នុងគោលបំណងសំខាន់ៗ៖ ១-ដើម្បីពង្រឹងវិស័យកីឡាការ៉ាតាដូ ឱ្យបានទូលំទូលាយទូទាំងព្រះរាជាណាចក្រកម្ពុជាយើង ។ ២-ដើម្បីឱ្យប្រជាពលរដ្ឋយល់ច្បាស់ពីវិស័យកីឡាការ៉ាតេដូ ដែលមិនត្រឹមតែធ្វើឱ្យកាយសម្បទាមានភាពរឹងមាំប៉ុណ្ណោះទេ ថែមទាំងធ្វើឱ្យយើងស្គាល់ពីរបៀបប្រយុទ្ធ និងរបៀបការពារខ្លួនតាមរយៈការហ្វឹកហាត់កីឡាការ៉ាតេដូ។ ៣-បង្កើនភាពរឹងប៉ឹង បញ្ញាស្មារតីចេះអំណត់អត់ធ្មត់ និងបង្កើនភាពក្លាហានដល់ប្រជាពលរដ្ឋ ព្រមទាំងប្អូនៗយុវវ័យ និងកុមារា កុមារី តាមរយៈវិស័យកីឡាការ៉ាតេដូ ក្នុងការចូលរួមចំណែកការពារជាតិមាតុភូមិ ទៅថ្ងៃអនាគត ។ ៤-ចូលរួមចំណែកយ៉ាងសកម្ម ដើម្បីឱ្យប្រជាពលរដ្ឋខ្មែរ ជាពិសេសយុវជន យុវនារី ដែលជាសសរទ្រូងប្រទេសជាតិ ឱ្យចាកផុតពីគ្រឿងញៀន គ្រឿងស្រវឹង ល្បែងស៊ីសង និងក្រុមបងធំ បងតូចជាដើម ចេះអំណត់អត់ធ្មត់ ពុះពារ ជម្នះរាល់ការលំបាក ឧបសគ្គទាំងឡាយ និងដើម្បីមានសុខុមាលភាពដល់សង្គមជាតិ ។
ទាំងនេះសបញ្ជាក់ឱ្យឃើញយ៉ាងច្បាស់ នូវការអភិវឌ្ឍឥតឈប់ឈររបស់វិស័យការ៉ាតេដូនៅកម្ពុជា ដែលចូលរួមយ៉ាងសកម្មក្នុងការអភិវឌ្ឍប្រទេសជាតិ ឱ្យមានការរីកចម្រើនលូតលាស់ទៅថ្ងៃអនាគត ។
លោកវរសេនីយ៍ទោដែក ភារៈ បានឱ្យដឹងថា កីឡាករ-កីឡាការិនីដែលចូលរួមប្រកួតរយៈ ពេល២ថ្ងៃនេះគឺ មកពីក្លឹបចំនួន១៩ ក្នុងនោះ១៦ក្លឹបនៅរាជធានីភ្នំពេញ និង៣ក្លឹបមកពីខេត្តកំពង់ចាម ខេត្តសៀមរាប និងខេត្តព្រះសីហនុ ។ ជាលទ្ធផល កីឡាករ-កីឡាការិនីចំនួន៩៦នាក់ ទទួលបានជ័យលាភីដោយឆ្លងកាត់វិញ្ញាសាប្រកួតកាតាឯកត្តជន កាតាជាក្រុម និងប្រយុទ្ធឯកត្តជន តាមប្រភេទទម្ងន់ អាយុ និងភេទ ៕
ចែករំលែកព័តមាននេះ