រាជធានីភ្នំពេញ ៖ ស្ត្រីខ្មែរកូនកាត់ចិនម្នាក់បានបង្កាត់ភ្លើងស្នេហ៍ត្រីកោណ ហ៊ានណាត់ប្រុសក្មេងឡើងផ្ទះសំណាក់ត្រូវបុរសជាប្តី និងក្រុមគ្រួសារតាមទាន់នៅផ្ទះសំណាក់មួយស្ថិតនៅតាមបណ្តោយ ផ្លូវលេខ៣១០ សង្កាត់បឹងកេងកងទី២ ខណ្ឌចំការមន នាព្រឹកថ្ងៃទី១៨ កញ្ញា ឆ្នាំ២០១១។
រាជធានីភ្នំពេញ ៖ ស្ត្រីខ្មែរកូនកាត់ចិនម្នាក់បានបង្កាត់ភ្លើងស្នេហ៍ត្រីកោណហ៊ានណាត់ប្រុសក្មេងឡើងផ្ទះសំណាក់ត្រូវបុរសជាប្តី និងក្រុមគ្រួសារតាមទាន់នៅផ្ទះសំណាក់មួយស្ថិតនៅតាមបណ្តោយផ្លូវលេខ៣១០ សង្កាត់បឹងកេងកងទី២ ខណ្ឌចំការមន នាព្រឹកថ្ងៃទី១៨ កញ្ញា ឆ្នាំ២០១១។
ទោះបីជាបែបណារឿងរ៉ាវខាងលើនេះភាគីពាក់ព័ន្ធទាំងសងខាងបានស្រុះស្រួលដឹកដៃគ្នាចូលចរចាបញ្ចប់បញ្ហានៅស្នាក់ការប៉ុស្តិ៍នគរបាលរដ្ឋបាលបឹងកេងកងទី២ ដោយភាគីប្តីសុំយកប្រពន្ធទៅកាន់លំនៅឋានវិញ ដើម្បីកុំឱ្យកូនតូចៗចំនួន២នាក់កំព្រាម្តាយ ។ ឯភាគីប្រុសសហាយនោះបានសន្យាថាឈប់ទាក់ទងជាមួយប្រពន្ធគេចាប់ពីថ្ងៃនេះតទៅ ព្រោះនេះជាទោសនិងជាបាបកម្មធ្ងន់ធ្ងរណាស់ បើតាមធម៌វិញថា បើធ្លាក់នរកច្បាស់ជាឡើងរកាដែកហើយ ។ ដោយសារតែភាគីទាំងសងខាងហាក់បីដូចជាស្រុះស្រួលគ្នាល្អ សមត្ថកិច្ចនគរបាលប៉ុស្តិ៍បឹងកេងកងទី២ ក៏ពុំមានសិទ្ធិអ្វីសួរនាំអូសបន្លាយវែងឆ្ងាយនោះដែរ ព្រោះគ្មានភាគីណាមួយប្តឹងប្តល់ឱ្យសមត្ថកិច្ចចាត់ការតាមច្បាប់ ទោះបីជាប្តីទាន់ប្រពន្ធបណ្តើរប្រុសក្មេងចុះពីផ្ទះសំណាក់ទាំងព្រឹកក្តី ។
ជុំវិញរឿងរ៉ាវព្យុះស្នេហ៍ត្រីកោណខាងលើនេះ អ្នកយកព័ត៌មានកោះសន្តិភាពបានដកស្រង់សំដីលោកជ.ស.ភ ដែលជាភាគីសហាយជាមួយនាង ង.ញ ដែលជាប់ចោទផិតក្បត់ប្តីរត់តាមប្រុសក្មេងថា ខ្លួន (ជ.ស.ភ) និងនាង ង.ញ បានស្គាល់គ្នានៅឯខេត្តមណ្ឌលគិរី តាមរយៈខ្លួនទៅរកស៊ីជាមួយបងប្រុសម្នាក់ ហើយចុះឡើងស្នាក់នៅឯខេត្តនោះញឹកញាប់ ក៏មានទំនាក់ទំនងជាមួយនាង ង.ញ ដោយខ្លួនបានប្រាប់នាងថា នៅកំលោះ។
ដោយឡែកស្ត្រីឈ្មោះ ង.ញ បាននិយាយត្អួញត្អែរថា ខ្លួនមានប្តីមានកូនរហូតដល់ទៅពីរនាង ហើយតែរយៈពេលជាង១០ឆ្នាំមកនេះមិនដែលស្គាល់សេចក្តីសុខឡើយ ។ ជាងនេះទៅទៀតនាង ជ.ញ បាននិយាយថា ការឈឺចាប់តាំងពីប៉ុន្មានឆ្នាំកន្លងមក ដល់ពេលនេះរូបនាងទ្រាំលែងបានហើយ រហូតឈានដល់ផ្លូវបែកគ្នា ។
ដោយសារតែឈ្មោះ ជ.ស.ភ បានលង់នឹងពាក្យសំដីរបស់នាង ជ.ញ គួបផ្សំនឹងសម្រស់ដែលបន្សល់ទុកពីធម្មជាតិ ទោះបីជានាង ជ.ញ មានប្តីមានកូនពីរនាក់ទៅហើយក្តី ក៏រូបគេស្ម័គ្រប្រថុយប្រគល់បេះដូងជូននាងដែរ រហូតនាងវេចបង្វេចរត់ពីខេត្តមណ្ឌលគីរី មកភ្នំពេញ ចោលកូននិងប្តីដែលពុំទាន់លែងលះគ្នាដាច់ស្រឡះតាមផ្លូវច្បាប់មកជួលផ្ទះសំណាក់ខាងលើស្នាក់នៅជាមួយគ្នាឡើងឆ្អែតឆ្អន់។ លុះព្រឹកឡើង ទើបប្តីនាង ជ.ញ តាមទាន់នាំខ្លួន និងប្រពន្ធគេមកប៉ុស្តិ៍នគរបាលដើម្បីបញ្ចប់រឿងតាមសម្រួលដោយពុំមានហិង្សាអ្វីកើតឡើងលើភាគីណាមួយឡើយ ។
តាមការកត់សម្គាល់ជាក់ស្តែងគេបានសង្កេតឃើញថា លោកស.ស ដែលជាប្តីពេញច្បាប់របស់នាង ជ.ញ មានចិត្តទន់ភ្លន់លួងលោមប្រពន្ធអស់រយៈពេលរាប់ម៉ោងក្នុងគោលបំណងមិនចង់បែកពីប្រពន្ធ ព្រោះខ្លាចកូនកំព្រាម្តាយ ទើបប្រពន្ធស្ម័គ្រចិត្តលះបង់ប្រុសក្មេងទៅតាមប្តីទាំងរអាក់រអួលក្នុងចិត្តគ្រប់ៗគ្នារវាងភាគីជាតួឯកទាំងបីនាក់ ។ ឈ្មោះ ជ.ស.ភ ដែលជាសហាយនាង ជ.ញ បាននិយាយរបៀបជាមនុស្សរប៉ិលរប៉ូចថា រូបគេមានអាយុ២២ឆ្នាំ ហើយនាងជ.ញ មានអាយុ៣២ឆ្នាំ ដោយឡែកប្តីរបស់នាងក៏មានអាយុ៣២ឆ្នាំដែរ ដូច្នេះរវាងខ្លួន និងគូស្នេហ៍ត្រីកោណខាងលើនេះមានវ័យខុសគ្នា១០ឆ្នាំ រឿងអីខាងស្រីមិន “OK” ។
ក្រុមមន្ត្រីស៊ីវិលនានាក៏ដូចជាសមត្ថកិច្ចខ្លះបាននិយាយរបៀបទូន្មានដល់ជនទូទៅតាមរយៈកោះសន្តិភាពថា សូមកុំប្រព្រឹត្តទង្វើដូចករណីខាងលើនេះ ព្រោះវាខុសឆ្គងធ្ងន់ធ្ងរណាស់ជាមួយទំនៀមទម្លាប់ប្រពៃណីខ្មែរយើង ។ ឯស្ត្រីផ្សេងទៀតដែលមានចរិតដូចតួអង្គខាងលើកុំសង្ឃឹមថា បុរសគ្រប់រូបមានចិត្តមេត្តាដូចលោក ស.ស ខាងលើនេះគ្រប់គ្នាឱ្យសោះ ។ ករណីខាងលើនេះកោះសន្តិភាពសូមទុកកិត្តិយសជូនភាគីទាំងសងខាងដោយសុំមិនបញ្ចេញឈ្មោះទាំងស្រុងតាមអ្វីដែលទទួលបានពីប្រភពព័ត៌មាននានាឡើយ ៕
ចែករំលែកព័តមាននេះ