ខេត្តស្វាយរៀង ៖ មន្ត្រីប៉ូលិសចរាចរណ៍មួយរូបដែលចុះត្រួតពិនិត្យអ្នកជិះម៉ូតូមិនពាក់មួកសុវត្ថិភាព និងគ្មានកញ្ចក់មើលក្រោយ បានត្រូវក្មេងទំនើងជិះម៉ូតូបុកអូសជិត១០ម៉ែត្របណ្តាលឱ្យរងរបួស និងត្រូវបានដឹកយកទៅកាន់មន្ទីរពេទ្យ ដើម្បីសង្គ្រោះ។ ករណីនេះបានកើតឡើងកាលពីវេលាម៉ោង៧ និង៣០នាទីព្រឹកថ្ងៃទី១៦ កញ្ញា នៅលើកំណាត់ផ្លូវជាតិលេខ១០ ស្ថិតក្នុងភូមិទ.ទេរ សង្កាត់ចេក ក្រុងស្វាយរៀង ដែលជនរងគ្រោះឈ្មោះអែម សំអាង អាយុ៤៨ឆ្នាំ ជាមន្ត្រីប៉ូលិសចរាចរណ៍ប៉ុស្តិ៍រដ្ឋបាលសង្កាត់ចេក។
លោកអែម សំអាង បានរៀបរាប់ថា មុនពេលកើតហេតុកម្លាំងសមត្ថកិច្ច៤ទៅ៥នាក់ រួមទាំងរូបលោក និងមានមន្ត្រីប៉េអឹមផង បានចុះអនុវត្តច្បាប់ចរាចរណ៍ជើងគោក ធ្វើការផាកពិន័យទៅលើម៉ូតូដែលគ្មានកញ្ចក់មើលក្រោយ និងអ្នកបើកបរមិនពាក់មួកសុវត្ថិភាពនៅតាមបណ្តោយផ្លូវជាតិលេខ១០ចាស់ស្ថិតក្នុងភូមិ-ឃុំខាងលើ។ ខណៈសមត្ថកិច្ចកំពុងធ្វើការផាកពិន័យនោះស្រាប់តែមានក្មេងទំនើងម្នាក់ជិះម៉ូតូមួយគ្រឿងធុនសង់កូរ៉េ ពណ៌ក្រហម ពាក់ស្លាកលេខក៤៧៣៩ ស្វរ អត់ពាក់មួកសុវត្ថិភាពឆ្លងកាត់ចំណុចដែលកម្លាំងសមត្ថកិច្ចកំពុងពិនិត្យ។ ពេលឃើញបែបនេះ រូបលោកក៏ចេញមកឈរនៅកណ្តាលថ្នល់ធ្វើសញ្ញាឃាត់ឱ្យម៉ូតូក្មេងទំនើងនោះឈប់ដើម្បីផាកពិន័យ។ ផ្ទុយទៅវិញក្មេងទំនើងម្នាក់នេះមិនត្រឹមតែមិនឈប់ទេ ថែមទាំងបង្កើនល្បឿនបំបុករូបលោក និងអូសទៅតាមម៉ូតូ ប្រមាណជិត១០ម៉ែត្រទើបម៉ូតូដួលបណ្តាលឱ្យរូបលោករងរបួសដាច់រយះសាច់ភ្លៅឆ្វេងនិងដាច់រលាត់ពេញខ្លួនប្រាណ។ ចំណែកក្មេងទំនើងម្នាក់នោះក៏រងរបួសដែរ ព្រោះដួលបោកទៅលើថ្នល់ ប៉ុន្តែមិនធ្ងន់ធ្ងរទេ ហើយក្រោយកើតហេតុអ្នករបួសទាំងពីរនាក់ត្រូវបានដឹកទៅកាន់មន្ទីរពេទ្យខេត្តដើម្បីព្យាបាល។ ចំពោះក្មេងទំនើងនេះក្រោយមកត្រូវបានដឹងថា ឈ្មោះស៊ុំ សីុថា អាយុ២១ឆ្នាំ មានទីលំនៅក្នុងភូមិព្រៃខ្លា ឃុំពោធិរាជ ស្រុកស្វាយជ្រំ។
ក្រោយពីលាងរបួសរួច ក្មេងទំនើងស៊ុំ សីុថា បាននិយាយថា ពេលកំពុងជិះម៉ូតូនោះរូបគេមិនដឹងថា មានប៉ូលិស បេ៉អឹមនៅខាងមុខទេ ស្រាប់តែមកដល់ចំណុចខាងលើក៏ឃើញប៉ូលិសចរាចរណ៍តែម្តងធ្វើឱ្យរូបគេភ័យជាខ្លាំង ព្រោះអត់ពាក់មួកសុវត្ថិភាព ហើយរូបគេក៏ខំជាន់ហ្វ្រាំងឈប់ដែរ តែហ្វ្រាំងមិនសីុទើបបុកប៉ូលិសតែម្តងទៅ។ ពេលនេះមន្ត្រីប៉ូលិសរងគ្រោះកំពុងព្យាបាលនៅក្នុងមន្ទីរពេទ្យខេត្ត រីឯយុវជនជាក្មេងទំនើងត្រូវបានឃាត់ខ្លួននៅអធិការដ្ឋាននគរបាលក្រុងស្វាយរៀង ៕
ចែករំលែកព័តមាននេះ