រាជធានីភ្នំពេញ ៖ នគរបាលនាយកដ្ឋានកណ្តាលសន្តិសុខក្រសួងមហាផ្ទៃ បានចាប់ខ្លួនពាណិជ្ជករកូរ៉េម្នាក់បញ្ជូនទៅតុលាការពាក់ព័ន្ធនឹងករណីឆបោក និងរំលោភលើសេចក្តីទុកចិត្តរបស់ឧកញ៉ា២នាក់ មានទឹកប្រាក់ប្រមាណជាង១លានដុល្លារ ។
ជនឈ្មោះកាំង រិទ្ធី (ឈ្មោះជាខ្មែរដែលបានចូលសញ្ជាតិ) ហៅកាំង ប៊ុនឆិល ភេទប្រុស អាយុ៥៣ឆ្នាំ ជនជាតិកូរ៉េ មានទីលំនៅក្នុងបុរីសុភមង្គល សង្កាត់ជ្រោយចង្វា ខណ្ឌប្ញស្សីកែវ ត្រូវបានបញ្ជូនខ្លួនទៅកាន់តុលាការកាលពីព្រឹកថ្ងៃទី១៣ កញ្ញា តាមពាក្យបណ្តឹងរបស់លោកឧកញ៉ាថៃ សេងឡុង និងលោកឧកញ៉ាហួត វ៉ាន់ ថន ដែលបានប្តឹងចោទប្រកាន់ពីបទឆបោកប្រាក់ចំនួន៣០ម៉ឺនដុល្លារ និងបទល្មើសរំលោភលើសេចក្តីទុកចិត្តមានទឹកប្រាក់ជាង៧០ម៉ឺនដុល្លារ ពាក់ព័ន្ធនឹងការលួចលក់ខន់ដូនៅប្រទេសកូរ៉េ ។
ប្រភពព័ត៌មានច្បាស់ការណ៍មួយបានឱ្យដឹងថា នៅអំឡុងឆ្នាំ២០១០ ឈ្មោះកាំង រិទ្ធី ហៅកាំង ប៊ុនឆិល បានចូលហ៊ុនរកស៊ីជាមួយនឹងលោកឧកញ៉ាហួត វ៉ាន់ថន និងលោកឧកញ៉ាថៃ សេងឡុង ហើយឈ្មោះកាំង រិទ្ធី តែងតែផ្តល់ផលប្រយោជន៍ឱ្យលោកឧកញ៉ាទាំង២រូបនូវផលប្រយោជន៍មួយចំនួនតាមទំហំនៃការដាក់ទុនចូលគ្នា ជាហេតុធ្វើឱ្យមានការជឿទុកចិត្តគ្នាទៅវិញទៅមក ។ ក្រោយមកឈ្មោះកាំង រិទ្ធី បានខ្ចីប្រាក់ពីលោកឧកញា៉ ហួត វ៉ាន់ថន ចំនួន៣០ម៉ឺនដុល្លារ ដើម្បីពង្រីកមុខរបររកស៊ីរបស់ពួកគេ។ បន្ទាប់ពីឈ្មោះកាំង រិទ្ធី បានលួងលោមឱ្យលោកឧកញា៉ ថៃ សេងឡុង និងលោកឧកញ៉ា ហួត វ៉ាន់ថន ចូលហ៊ុនគ្នា ដើម្បីទិញខន់ដូនៅឯប្រទេសកូរ៉េសម្រាប់បើកស្នាក់ការក្រុមហ៊ុន ហើយដោយមានទំនុកចិត្តលោកឧកញ៉ាថៃ
សេងឡុង និងលោកឧកញ៉ា ហួត វ៉ាន់ថន បានប្រគល់ប្រាក់ជាង៧០មឺុនដុល្លារអាមេរិកឱ្យទៅឈ្មោះកាំង រិទ្ធី ទិញខន់ដូនៅប្រទេសកូរ៉េតាមការគ្រោងទុក ។ លុះមកដល់ខែមិថុនា ឆ្នាំ២០១១ ស្រាប់តែឈ្មោះកាំង រិទ្ធី លួចលក់ខន់ដូនៅប្រទេសកូរ៉េ ដោយមិនឱ្យលោកឧកញ៉ា ថៃ សេងឡុង និងលោកឧកញ៉ា ហួត វ៉ាន់ថន ដឹងឡើយ ។
ផ្តើមចេញពីអំពើឆបោក និងការរំលោភលើសេចក្តីទុកចិត្តនេះហើយ ទើបលោកឧកញ៉ា ថៃ សេងឡុង និងលោកឧកញ៉ា ហួត វ៉ាន់ថន ដាក់ពាក្យបណ្តឹងមកអគ្គស្នងការដ្ឋាននគរបាល
ជាតិ ដើម្បីចាត់ការតាមផ្លូវច្បាប់ ។ នៅរសៀលថ្ងៃទី១៣ កញ្ញា លោកយូ ប៊ុណ្ណា ចៅក្រមស៊ើបអង្កេតក្នុងសំណុំរឿងក្តីនេះ បានចាប់ផ្តើមសួរចម្លើយជនត្រូវចោទ ប៉ុន្តែមិនទាន់សម្រេចយា៉ងណានៅឡើយទេ ៕
ចែករំលែកព័តមាននេះ