ខេត្តព្រះវិហារ ៖ កាលពីថ្ងៃទី២៧ និង២៨ ខែសីហា កន្លងទៅនេះ នៅភូមិវាលធំ ឃុំរំដោះស្រែ ស្រុកជាំក្សាន្ត មានរឿងចម្រូងចម្រាសមួយ ខណៈព្រះរាជអាជ្ញារងនៃសាលាដំបូងខេត្ត បានដឹកនាំមន្ត្រីយុត្តិធម៌ចម្រុះមួយក្រុមដែលក្នុងនោះមានរដ្ឋបាលព្រៃឈើជាដើមបណ្តឹងផងដែរ និងកងកម្លាំងចម្រុះទាំងបីប្រភេទចុះទៅឆែកឆេររោងសិប្បកម្មកែច្នៃឈើប្រណីតគ្រប់ប្រភេទនៅក្នុងដីឡូត៍មួយកន្លែង ។
រឿងរ៉ាវបានឈានដល់ការប្តឹងប្តល់គ្នារវាងមន្ត្រីរដ្ឋបាលព្រៃឈើ និងមេធាវីចំនួន៤នាក់ គឺ១-លោកគា ឆាយ ២-លោកសុខ មនោរម្យ ៣-លោកប៊ុន កែវលីម និង៤-លោកជា ហៃ ពីបទគំរាមកំហែងដល់មន្ត្រីរដ្ឋបាលព្រៃឈើធ្វើឱ្យរាំងស្ទះដល់ការបំពេញភារកិច្ច និងកិច្ចប្រតិបត្តិការរបស់មន្ត្រីរដ្ឋបាលព្រៃឈើ ។ អង្គហេតុដែលបណ្តាលឱ្យមានបណ្តឹងរបស់មន្ត្រីរដ្ឋបាលព្រៃឈើប្រឆាំងមេធាវី៤នាក់នោះបានឱ្យដឹងថា នៅថ្ងៃទី២៧ សីហា វេលាម៉ោង៧ព្រឹកសមត្ថកិច្ចចម្រុះដឹកនាំដោយលោកថុល គឹមហុឹង ព្រះរាជអាជ្ញារងអមសាលាដំបូងខេត្ត និងលោកឌួង សារី នាយកក្រឡាបញ្ជីអយ្យការអមសាលាដំបូងខេត្ត ដែលយោងតាមបណ្តឹងអាជ្ញារបស់ខណ្ឌរដ្ឋបាលព្រៃឈើ បានចុះធ្វើការឆែកឆេររុករកវត្ថុតាងបទល្មើសព្រៃឈើមួយកន្លែង នៅក្នុងទីតាំងសិប្បកម្មរបស់ស្ត្រីម្នាក់ឈ្មោះកែ សុខលាង ស្ថិតក្នុងដីឡូត៍របស់លោកឧត្តមសេនីយ៍ម្នាក់នៅឃុំរំដោះស្រែ ស្រុកជាំក្សាន្ត ។
ក្រោយពីធ្វើការឆែកឆេររួចមក សមត្ថកិច្ចចម្រុះបានប្រទះឃើញវត្ថុតាងបទល្មើសព្រៃឈើរួមមាន ឈើអារប្រណីត (ក្រាក់គ្រញូង) ចំនួន១៤ដុំស្មើនឹង០,៨៣៩ម៉ែត្រគូប, ឈើអារប្រណីត (ធ្នង់)ចំនួន៣៦៩ដុំ ស្មើនឹង២៦,៦៥៨ម៉ែត្រគូប, ឈើអារប្រភេទលេខ១ និងឈើអារប្រភេទលេខ២ (ផ្ចឹក-ត្រាច) ចំនួន៤០៧ដុំ ស្មើនឹង២២,០១៥ម៉ែត្រគូប ។ សរុបរួមចំនួន៧៩០ដុំ ស្មើនឹង៤៩,៥១១ម៉ែត្រគូប និងរថយន្តម៉ាករ៉េវស្ទូចនិងដឹកឈើចំនួន១គ្រឿង ព្រមទាំងរណារយន្តចំនួន៥គ្រឿង ។ សមត្ថកិច្ចចម្រុះបានពិនិត្យឃើញថា ការប្រមូលផលព្រៃឈើ និងធ្វើសន្និធិផលព្រៃឈើប្រភេទឈើប្រណីត និងប្រភេទឈើដ៏កម្រខាងលើពុំមានលិខិតអនុញ្ញាតពីរដ្ឋបាលព្រៃឈើទេ គឺទុច្ចរិតទាំងស្រុង ។ ពេលនោះលោកព្រះរាជអាជ្ញារង ធុល គឹមហឹុង និងលោកឌួង សារី បានសម្រេចធ្វើការដកហូតវត្ថុតាងល្មើសទាំងអស់ខាងលើរួចប្រគល់ឱ្យសមត្ថកិច្ចរដ្ឋបាលព្រៃឈើខេត្ត ប្រមូលនិងដឹកជញ្ជូនយកមករក្សាទុកនៅស្នាក់ការខណ្ឌរដ្ឋបាលព្រៃឈើព្រះវិហារ ដើម្បីចាត់ការតាមនីតិវិធីច្បាប់ស្តីពីព្រៃឈើបន្តទៀត ។
តាមការអះអាងនិងចោទប្រកាន់ពីលោកលឹម ម៉ៅ នាយរងខណ្ឌរដ្ឋបាលព្រៃឈើព្រះវិហារ ទៅលើមេធាវី៤នាក់នោះថា បានប្រើអំណាចរបស់ខ្លួនប្រៀបដូចជាសមត្ថកិច្ចមកហាមឃាត់សមត្ថកិច្ចរដ្ឋបាលព្រៃឈើមិនឱ្យទម្លាក់ឈើចុះពីលើរថយន្តដែលបានដឹកមកដល់ស្នាក់ការខណ្ឌរដ្ឋបាលព្រៃឈើព្រះវិហារទៅហើយនោះ ។ លោកមេធាវីទាំង៤នាក់ខាងលើអះអាងថា ឈើទាំងនោះជាឈើមានច្បាប់ទាំងអស់ មិនតែប៉ុណ្ណោះបានបើករថយន្តពីក្រុងព្រះវិហារ ទៅដល់ភូមិវាលធំ ឃុំរំដោះស្រែ ស្រុកជាំក្សាន្ត ដោយបានបញ្ជាឱ្យសមត្ថកិច្ចរដ្ឋបាលព្រៃឈើផ្អាកសកម្មភាពលើកឈើដែលនៅសល់ដាក់លើរថយន្ត ដើម្បីដឹកយកមករក្សាទុកនៅស្នាក់ការខណ្ឌរដ្ឋបាលព្រៃឈើព្រះវិហារថែមទៀតផង ។
លោកគា ឆាយ ជាមេធាវីការពារឱ្យកូនក្តីអ្នកស្រី កែ សុខលាង ជាម្ចាស់សិប្បកម្មនៅក្នុងដីឡូត៍ខាងលើនេះ បានប្រាប់អ្នកសារព័ត៌មានឱ្យដឹងថា ក្រុមរបស់លោកជាមេធាវីទាំង៤រូប មិនបានអនុវត្តក្នុងកំហុសឆ្គងដែលធ្វើឱ្យប្រាសចាកពីវិជ្ជាជីវៈរបស់ខ្លួនតាមការចោទប្រកាន់របស់លោកលឹម ម៉ៅ ឡើយ ។ លោកមេធាវីអះអាងថា លោកគ្រាន់តែបានបំពេញកាតព្វកិច្ចជាអ្នកការពារផលប្រយោជន៍ឱ្យកូនក្តីតាមច្បាប់តែប៉ុណ្ណោះ ទើបចូលខ្លួនទៅដល់ទីតាំងរបស់កូនក្តីដើម្បីពិនិត្យមើលសកម្មភាពដែលសមត្ថកិច្ចបានអនុវត្តទៅលើទីតាំងសិប្បកម្មរបស់កូនក្តីលោកដែលមានច្បាប់អនុញ្ញាតត្រឹមត្រូវពីលោកលឹម ម៉ៅតែប៉ុណ្ណោះ។
លោកមេធាវី គា ឆាយ បានបញ្ជាក់ដែរថា ខាងលោកបានដាក់ពាក្យបណ្តឹងទាមទារសំណងឱ្យកូនក្តី និងបានធ្វើការចោទប្រកាន់ទៅលើសមត្ថកិច្ចពីបទរំលោភលើលំនៅឋាន ។ ចំពោះអ្នកស្រីកែ សុខលាង ដែលជាម្ចាស់សិប្បកម្មទោះបីអ្នកសារព័ត៌មានព្យាយាមសុំការបំភ្លឺពីមូលហេតុខាងលើតាមទូរស័ព្ទយា៉ងណាក៏ដោយ ក៏មិនអាចទាក់ទងបានដែរ៕
ចែករំលែកព័តមាននេះ