ខេត្តក្រចេះ ៖ គ្រាន់តែទំនាស់ពាក្យសម្តីរឿងហៅស្រី ហើយអ្នកដទៃឆ្លើយជំនួសសោះបានក្លាយជាជម្លោះវាយកា.ប់ចាក់គ្នា បណ្តាលឱ្យយុវជនពីរនាក់រងគ្រោះសន្លប់ធំដេកពេទ្យ រីឯគូជម្លោះ៣នាក់ទៀតត្រូវជាប់ទ្រុងប៉ូលិស។
ខេត្តក្រចេះ ៖ គ្រាន់តែទំនាស់ពាក្យសម្តីរឿងហៅស្រី ហើយអ្នកដទៃឆ្លើយជំនួសសោះបានក្លាយជាជម្លោះវាយកាប់ចាក់គ្នា បណ្តាលឱ្យយុវជនពីរនាក់រងគ្រោះសន្លប់ធំដេកពេទ្យ រីឯគូជម្លោះ៣នាក់ទៀតត្រូវជាប់ទ្រុងប៉ូលិស។
ប៉ូលិសស្រុកសំបូរបានឱ្យដឹងថា ករណីអំពើហិង្សាដោយចេតនានេះ បានកើតឡើងនៅវេលាម៉ោង១១យប់ថ្ងៃទី៧ កញ្ញា នៅចំណុចក្រុមហ៊ុនដុងភូ ស្ថិតនៅភូមិអូរព្រះ ឃុំអុរគ្រៀង ស្រុកសំបូរ។
ជនរងគ្រោះដែលរងរបួសនេះមាន ១-ឈ្មោះស៊ូ ធារិទ្ធ អាយុ២៦ឆ្នាំ មានទីលំនៅភូមិអូរឫស្សី២ សង្កាត់អូរឫស្សី ក្រុងក្រចេះ មានមុខរបរជាជាងជួសជុលគ្រឿងចក្រក្នុងក្រុមហ៊ុន រងរបួសក្បាលដេរចំនួន១០ថ្នេរ បន្ទាប់ពីគូជម្លោះវាយនឹងឈើជ្រុង ២-ឈ្មោះគឿន រាត្រី អាយុ២៨ឆ្នាំ ជាប្រធានកម្មករក្រុមហ៊ុន រងរបួសធ្ងន់ត្រង់ក្បាល ដោយត្រូវគូជម្លោះវាយនឹងខ្នងកាំបិតផ្គាក់សន្លប់ធំ។
មន្ត្រីប៉ូលិសព្រហ្មទណ្ឌកម្រិតស្រាលបានឱ្យដឹងថា ជនសង្ស័យដែលនគរបាលចាប់ឃាត់ខ្លួនទាំង៣នាក់ពីបទប្រើហិង្សាដោយចេតនានេះមាន១-ឈ្មោះឈឿន វី អាយុ២៣ឆ្នាំ ២-ឈ្មោះម៉ៃ លីហៀង អាយុ២៦ឆ្នាំ និង៣-ឈ្មោះហ៊ីម លីន អាយុ២២ឆ្នាំ ជនទាំង៣នាក់មានស្រុកកំណើតនៅភូមិផ្តៅជុំ ឃុំផ្តៅជុំ ស្រុកព្រៃឈរ ខេត្តកំពង់ចាម និងមកធ្វើជាកម្មរនៅក្នុងក្រុមហ៊ុនដុងភូ បានរយៈពេលជាងដប់ថ្ងៃមុនថ្ងៃបង្កហេតុ។
តាមប្រភពព័ត៌មានពីកន្លែងកើតហេតុ បានឱ្យដឹងថា នៅយប់ថ្ងៃកើេតហេតុជនរងគ្រោះបានឈរក្បែរ នឹងក្រុមជនសង្ស័យទាំង៣នាក់ ហើយជនរងគ្រោះបានស្រែកហៅឈ្មោះនារីម្នាក់ដែលធ្លាប់ស្គាល់ ស្រាប់តែជនទាំង៣នាក់នោះឆ្លើយជំនួស បន្ទាប់មកក៏កើតរឿងឌឺដងដាក់គ្នា ហើយជនសង្ស័យទាំង៣នាក់នេះក៏ស្ទុះមកវាយជនរងគ្រោះទាំង២នាក់ នឹងឈើជ្រុង កាំបិតយ៉ាងចាស់ដៃតែម្តង៕
ចែករំលែកព័តមាននេះ