ខេត្ដសៀមរាប ៖រថយន្ដធុនធំលំដាប់យក្ស«ភ្លៅ៥»មួយគ្រឿងដែលដឹកបាវអង្កាមពីលើឈើ គ្រញូងរាប់ពាន់ដុំពីក្រោម ត្រូវបានសមត្ថកិច្ចចម្រុះមួយក្រុមធ្វើការបង្ក្រាបកាលពីវេលាទៀប ភ្លឺឈានចូលថ្ងៃទី៩ កញ្ញា ខណៈរថយន្ដនោះបានលួចដឹកឈើគ្រញូងចេញពីទីតាំងស្ដុកមួយកន្លែង ក្នុងភូមិចំបក់ហែរ ឃុំកំពង់ថ្កូវ ស្រុកក្រឡាញ់
ខេត្ដសៀមរាប ៖រថយន្ដធុនធំលំដាប់យក្ស«ភ្លៅ៥»មួយគ្រឿងដែលដឹកបាវអង្កាមពីលើឈើគ្រញូងរាប់ពាន់ដុំពីក្រោម ត្រូវបានសមត្ថកិច្ចចម្រុះមួយក្រុមធ្វើការបង្ក្រាបកាលពីវេលាទៀបភ្លឺឈានចូលថ្ងៃទី៩ កញ្ញា ខណៈរថយន្ដនោះបានលួចដឹកឈើគ្រញូងចេញពីទីតាំងស្ដុកមួយកន្លែងក្នុងភូមិចំបក់ហែរ ឃុំកំពង់ថ្កូវ ស្រុកក្រឡាញ់ ហើយផុងកង់ជាប់ទៅមុខលែងរួច ក៏ប៉ុន្ដែពុំមានជនពាក់ព័ន្ធណាម្នាក់ត្រូវបានចាប់ខ្លួនភ្លាមៗនោះទេ។
នាយខណ្ឌរដ្ឋបាលព្រៃឈើសៀមរាបលោកទា គឹមសុទ្ធ ដែលបានចុះទៅដល់កន្លែងបង្ក្រាបកាលពីព្រឹកថ្ងៃទី៩ កញ្ញា បានមានប្រសាសន៍ថាប្រតិបត្ដិការបង្ក្រាបទៅលើរថយន្ដដឹកឈើគ្រញូងដ៏ធំមហិមានោះធ្វើឡើងរួមគ្នារវាងកម្លាំងរដ្ឋបាលព្រៃឈើនិងកម្លាំងនគរបានការិយាល័យប្រឆាំងបទល្មើសសេដ្ឋកិច្ចខេត្ដ ព្រមទាំងកម្លាំងនគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ ក្រោមការបញ្ជាផ្ទាល់ដោយលោកទី សុវិនថាល់ ព្រះរាជអាជា្ញអមសាលាដំបូងខេត្ដសៀមរាប។
រហូតដល់រសៀលថ្ងៃដដែលនោះ គេមិនទាន់បានដឹងពីចំនួនជាក់លាក់នៃឈើគ្រញូងដែលរឹបអូសបាននោះមានចំនួនប៉ុន្មានម៉ែត្រគូបនៅឡើយទេ ខណៈក្រុមសមត្ថកិច្ចជំនាញកំពុងប្រឹងប្រែងធ្វើការវាស់វែង ។ គេគ្រាន់តែដឹងថា រថយន្ដដឹកឈើគ្រញូងនោះជាប្រភេទរថយន្ដហ៊ីណូ ភ្លៅ៥ ក្បាលពណ៌ខៀវ ទ្រុងស ពាក់ស្លាកលេខពោធិ៍សាត់ 3A-0278 ។ ទោះជាយ៉ាងណាក្រុមសមត្ថកិច្ចជំនាញបានបញ្ជាក់នៅក្នុងសេចក្ដីសន្និដ្ឋានជំហានដំបូងរបស់ខ្លួនថា ឈើគ្រញូងដែលរឹបអូសបានក្នុងប្រតិបត្ដិការបង្ក្រាបរួមគ្នានោះ ជាប្រភេទឈើគ្រញូងក្រាក់មានចំនួនប្រមាណពី២០ទៅ២៥ម៉ែត្រគូប។
លោកទា គឹមសុទ្ធ បានបញ្ជាក់ថា ឈើគ្រញូងដែលចាប់បាននេះត្រូវបានក្រុមឈ្មួញដឹកតាមរថយន្ដតូចៗជាច្រើនគ្រឿងចេញពីតំបន់អូរស្មាច់របស់ខេត្ដឧត្ដរមានជ័យ តាមផ្លូវជាតិលេខ ៦៨ យកមកលាក់នៅក្នុងភូមិសាស្ដ្រស្រុកក្រឡាញ់នេះរង់ចាំឱ្យគ្រប់ចំនួនទើបគេដឹកតាមរថយន្ដធុនធំដោយប្រើរូបភាពបន្លំដូចឃើញស្រាប់ហើយ គឺរថយន្ដនេះគេបានប្រើល្បិចដាក់បាវអង្កាមពីលើ ។
ទាក់ទិនទៅនឹងករណីនោះដែរលោកអនុសេនីយ៍ឯក ឡុង សំអឿន នាយផ្នែកនគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ ដែលបានចូលរួមបង្ក្រាបរថយន្ដធុនយក្សដឹកឈើគ្រញូងនោះបានថ្លែងថា រថយន្ដដឹកឈើដែលត្រូវបានបង្ក្រាបនោះធ្លាប់បានធ្វើសកម្មភាពដឹកឈើគ្រញូងចេញពីភូមិសាស្ដ្រនេះច្រើនដងរួចមកហើយ ដោយពួកឈ្មួញមានការលាក់ការណ៍ខ្ពស់ ទើបតែពេលនេះយើងបានដាក់កម្លាំងតាមឃ្លាំមើលជាប្រចាំរហូតឈានដល់ការចាប់បានបែបហ្នឹង។ លោកបានបញ្ជាក់ទៀតថា ក្នុងការបង្ក្រាបនេះយើងបានចាំស្ទាក់តាំងពីក្បាលព្រលប់ តែទំនងជាក្រុមឈ្មួញគេមានបណា្ដញដែរ ទើបរថយន្ដនោះសម្ងំសិនរង់ចាំដល់ពេលយើងដកកម្លាំងចេញភ្លាមបានគេចេញ ប៉ុន្ដែដោយសារតែជាអំពើខុសច្បាប់ទើបរថយន្ដនោះជាប់ផុងទៅមុខលែងរួចក៏អស់លក្ខណ៍ ។
លោកទី សុវិនថាល់ ព្រះរាជអាជា្ញអមសាលាដំបូងខេត្ដសៀមរាបដែលបានចុះបញ្ជាកម្លាំងផ្ទាល់បានមានប្រសាសន៍ថា យើងមិនបានចាប់ខ្លួនភ្លាមៗនូវជនណាម្នាក់ទេ ប៉ុន្ដែពេលនេះយើងមានពន្លឺគ្រប់គ្រាន់ហើយតាមរយៈឯកសារសម្គាល់រថយន្ដដែលចាប់បាន បូករួមទាំងម្ចាស់ផ្ទះដែលឱ្យគេដាក់ឈើគ្រញូងល្មើសច្បាប់ទាំងនោះ។
លោកបានបញ្ជាក់បន្ថែមថា ករណីនេះជាការប្រព្រឹត្តបទល្មើសព្រៃឈើមានលក្ខណៈទ្រុងទ្រាយធំ ដូច្នេះលោកនឹងជំរុញឱ្យមន្ដ្រីជំនាញរៀបចំសំណុំបែបបទបញ្ជូនមកតុលាការឱ្យបានឆាប់រហ័ស ដើម្បីចេញដីកាតាមចាប់ក្រុមឈ្មួញ និងអ្នកសមគំនិតប្រព្រឹត្តបទល្មើសដឹកជញ្ជូនឈើយកមកផ្ដន្ទាទោសតាមច្បាប់៕
ចែករំលែកព័តមាននេះ