ដំណាំម្ទេសបោ្លក ក្រៅពីប្រើជាបន្លែស្រស់ ហើយគេអាចកែច្នៃវាជាម្ទេសក្រៀម ដែលកសិករភាគច្រើននិយមហៅម្ទេសឆ្អើរ ។ ម្ទេសឆ្អើរនេះអាចទុកបានរយៈពេលយូរ ហើយមានតំលៃថ្លៃទៀតផង ។ គេប្រើវាធ្វើជាគ្រឿងស្ល ដោយវាជួយបន្ថែមរសជាតិដល់ម្ហូបអាហារឱ្យបានឆ្ងាញ់ពិសារ ។ ម្ទេសក្រៀមនេះច្រើននិយមធ្វើនៅតាមតំបន់ ជាពិសេសកសិករនៅភូមិកោះក្របី ឃុំ ផ្សារឆ្នាំង ស្រុកកំពង់ឆ្នាំង ខេត្ដកំពង់ឆ្នាំង ។
ក្រោយពីប្រមូលផលម្ទេសហើយ គេយកផ្លែម្ទេសទាំងនោះមកកាត់សណ្ដង់ចេញ និងវះវាជាពីរ ហើយយកទៅស្រុសទឹកក្ដៅកំពុងពុះ រួចបង់អំបិលចូលបន្ដិចការបង់អំបិលនេះគឺ ប្រយោជន៍ដើម្បីធ្វើឱ្យម្ទេសរឹងសាច់ ។ មានកសិករខ្លះគាត់បានចាក់ខ្លាញ់ត្រីចូល ដើម្បីធ្វើឱ្យម្ទេសមើលទៅមានសម្បុរភ្លឺរលាង ។ នៅពេលកំពុងស្រុសទឹកក្ដៅ គេច្របល់វាចុះឡើងៗរហូតឃើញម្ទេសរាងស្រពាប់ (ទន់សាច់) ទើបស្រង់វាចេញ ហើយទុកឱ្យត្រជាក់បន្ដិច ទើបតំរៀបដាក់ហាលថ្ងៃ ។ ក្នុងការហាលត្រូវផ្កាប់វាការពារនៅពេលម្ទេសស្ងួតកុំឱ្យវារមូរចូលគ្នា ។ ប្រសិនបើមានពន្លឺថ្ងៃគ្រប់គ្រាន់ គេហាលត្រឹម១ថ្ងៃ ទៅ១ថ្ងៃកន្លះប៉ុុណ្ណោះ ។ ប៉ុន្ដែប្រសិនបើគ្មាន ថ្ងៃគ្រប់គ្រាន់ទេ គេហាលរហូតដល់រយៈពេល២ទៅ៣ថ្ងៃទើបស្ងួត ។ នៅពេលម្ទេសស្ងួត គេប្រមូលច្រកបាវលក់តែម្ដង ។
តាមការសង្កេតរបស់កសិករឃើញថា ម្ទេសស្រស់ចំនួន១០០គីឡូក្រាម ក្រោយពេលឆ្អើរស្ងួត នៅសល់ត្រឹមតែ១៦ទៅ២០ គីឡូក្រាមប៉ុណ្ណោះ ។ ប៉ុន្ដែបើគិតពីតំលៃវិញ ម្ទេសស្រស់លក់បាន១គីឡូក្រាមតែតំលៃ ៣០០រៀលទេ ចំពោះម្ទេស១០០គីឡូក្រាមលក់បានតែ៣០.០០០រៀល (បីម៉ឺនរៀល) ចំណែកម្ទេសឆ្អើរ២០គីឡូក្រាមលក់បាន ១០០.០០០ រៀល(ដប់ម៉ឺនរៀល) ។
ក្រោយពីបានឆ្អើរម្ទេសលក់អស់រយៈពេលច្រើនឆ្នាំមក កសិករទាំងនោះមានចំណាប់អារម្មណ៍ថា ម្ទេសឆ្អើរថ្វីបើយើង ចំណាយកំលាំងធ្វើក៏ពិតមែន ប៉ុន្ដែវាផ្ដល់ ប្រាក់ចំណេញច្រើនដល់គាត់ ជាងការលក់ម្ទេសស្រស់ ។ បើពេលណាធ្លាក់ថ្លៃ គាត់អាចទុករង់ចាំដល់ម្ទេសឡើងថ្លៃវិញបាន ។ ចំណែកម្ទេសស្រស់លក់បានតំលៃថោក ហើយបើលក់មិនអស់អាចរលួយខូចទៀតផង ៕
ចែករំលែកព័តមាននេះ