ខេត្តព្រៃវែង ៖ កាលពីព្រឹកថ្ងៃទី៧ កញ្ញា ឆ្នាំ២០១១ ភ្នាក់ងារសារព័ត៌មានកោះសន្តិភាពប្រចាំខេត្តព្រៃវែង បាននាំយកអំណោយជាថវិការបស់លោកហ៊ីង សុជាតិ នៅរដ្ឋអូហៃយ៉ូ សហរដ្ឋអាមេរិក ដែលផ្ញើតាមរយៈលោកណុប ច័ន្ទដារ៉ា សហការីកោះសន្តិភាពនៅក្រុងឡងប៊ិច ទៅជូនដល់ដៃលោកយ៉ុន សាមិត្ត ដែលត្រូវជាឪពុករបស់ទារកកំសត់ដែលកើតមកទើបតែបាន១២ថ្ងៃ ត្រូវម្តាយស្លាប់ចោលកាលពីថ្ងៃទី១ សីហា កន្លងមក នៅភូមិបាទី ឃុំពាមរក៍ ស្រុកពាមរក៍។ នេះជាអំណោយលើកទី៣ហើយ ដែលលោកយ៉ុន សាមិត្ត បានទទួលតាមរយៈសារព័ត៌មានកោះសន្តិភាព។
លោកយ៉ុន សាមិត្ត មានសេចក្តីរីករាយត្រេកអរជាខ្លាំង ហើយលោកបានថ្លែងនូវអំណរគុណដល់លោកអ្នកជាសប្បុរសជនទាំងឡាយដែលបានផ្តល់ថវិកាមកលោកដើម្បីទិញទឹកដោះគោឱ្យកូនបៅនៅពេលនេះ។ លោកបានលើកម្រាមដៃ១០សំពះបួងសួង សុំឱ្យទេវតា ព្រមទាំងវត្ថុស័ក្តិសិទ្ធិក្នុងលោក តាមជួយថែរក្សាក្រុមគ្រួសារអស់លោកអ្នកជាសប្បុរសជនទាំងអស់សុំឱ្យជួបតែសេចក្តីសុខគ្រប់ប្រការ និងសូមជួបពុទ្ធពរទាំង៤ប្រការ អញ្ជើញទៅណាមកណាសុំឱ្យជួបតែសុខចម្រើនជានិច្ចនិរន្តរ៍។
លោកយ៉ុន សាមិត្ត បានបន្តថា តាំងពីប្រពន្ធស្លាប់ទៅ លោកមេឃុំបានចូលបុណ្យ៥ម៉ឺនរៀល លោកស្រីសេង ទៀង អភិបាលរងស្រុកជួយឧបត្ថម្ភ១២ម៉ឺនរៀល ក្រៅពីនេះមានថវិការបស់អស់លោកជាសប្បុរសជន ដែលលោកបានផ្តល់ជូនហូរហែ តាមរយៈសារព័ត៌មានកោះសន្តិភាព ដែលមានលោកឧកញ៉ាថុង អ៊ុយប៉ាង ព្រមទាំងសហការីទាំងអស់ បានជួយផ្សព្វផ្សាយដល់សប្បុរសជនឱ្យលោកជួយឧបត្ថម្ភជាបន្តបន្ទាប់។ នេះជាការចូលរួមជួយរំលែកនូវសេចក្តីទុក្ខលំបាកមួយយ៉ាងធំធេងពីសំណាក់អស់លោកជាសប្បុរសជន។
លោកយ៉ុន សាមិត្ត គ្រោងធ្វើបុណ្យសូត្រមន្តឱ្យសពប្រពន្ធរបស់គាត់ ដើម្បីឧទ្ទិសមគ្គផលជូនដល់អស់លោកអ្នកជាសប្បុរសជនផងដែរ។អ្វីដែលគាត់រំភើបរីករាយនោះ គឺកូនតូចរបស់គាត់ដែលម្តាយបានស្លាប់ទៅគេនឹងមានទឹកដោះគោបៅបន្តទៀតហើយ៕
ចែករំលែកព័តមាននេះ