រាជធានីភ្នំពេញ ៖ សូយ វីរៈ មកពីក្លឹបអូដឹមកីឡា ចង់សាកកម្លាំងជាមួយព្រំ សំណាង មកពីក្លឹបកងទ័ពឆត្រយោង៩១១ នៅលើសង្វៀនប៉ុស្តិ៍បាយ័នថ្ងៃសៅរ៍ ទី១០ កញ្ញា ខណៈចាន់ សុខហួន មកពីក្លឹបនិរោធមានជ័យ ជួបហ៊ាម សំណាង មកពីក្លឹបឃ្លាំងមឿងកីឡា ។
សូយ វីរៈ និងព្រំ សំណាង ជួបគ្នាលើកនេះក្នុងឋានៈជាគូឯកប្រចាំសប្តាហ៍ ហើយរវាងពួកគេទាំង២នាក់សុទ្ធតែធ្លាប់បានជួបគ្នា២-៣ លើករួចមកហើយ ក្នុងនោះមានចាញ់ មានឈ្នះទៅវិញទៅមកដូចគ្នា ។ វីរៈ ល្បិចប្រយុទ្ធនៅលើសង្វៀនរបស់គេក្រាស់គួរសម តែចិត្តតូចបន្តិច របៀបវាយចេញទាំងស្នៀតដៃ និងស្នៀតជើងមិនសូវរហ័សរហួនឡើយ។ ចំណែកព្រំ សំណាង ទើបតែលេចមុខនៅលើសង្វៀនម៉្ងៃនោះសោះ តែល្បិចប្រយុទ្ធរបស់គេល្អគ្រាន់បើ ចិត្តក៏សឿងណាស់ដែរ គឺហ៊ានស៊ីហ៊ានសង ឯកម្លាំងស៊ុហ្វរបស់គេវិញអាចតស៊ូប្រកួតបាន៥ទឹកពេញមិនលំបាកសោះឡើយ ។ គូនេះមិនមានខាងណាសន្យាទុកមុនពីការចាញ់ឈ្នះឡើយ តែសម្រាប់អ្នកមើលភាគច្រើនគេមានជំនឿលើសំណាងច្រើនជាង ។
ចាន់ សុខហួន និងហ៊ាម សំណាង សុទ្ធតែជាជើងថ្មីដូចគ្នា ល្បិចប្រយុទ្ធនៅលើសង្វៀនក៏មិនសូវជាសម្បូរបែបប៉ុន្មានឡើយ តែគូនេះចិត្តសឿងជាងអ្នកប្រដាល់ជើងចាស់ទៅទៀត ។ សុខហួន មានស្នៀតកណ្តាប់ដៃខ្លាំងវាយចេញបានរហ័ស ឯសំណាងវិញ ស្នៀតកែង និងជង្គង់របស់គេក៏អស្ចារ្យណាស់ដែរ មិនអាចធ្វេសប្រហែសបានឡើយ ។
ប្រាក់ មករា មកពីក្លឹបរស្មីកុមារកំព្រា ជួបអ៊ុំ ពៅ មកពីក្លឹបព្រែកឯកកីឡា ។ ឈាង សំអូន មកពីក្លឹបកងទ័ពជើងគោក ជួបយ៉ាម ពិសិដ្ឋ មកពីក្លឹបគជសារកីឡា។
រីឯនៅលើសង្វៀនស្ថានីយទូរទស្សន៍ប៉ុស្តិ៍លេខ៥ ថ្ងៃអាទិត្យ ទី១១ កញ្ញា វិញ អូត ភូថង មកពីក្លឹបកីឡាប្រដាល់ក្រសួងការពារជាតិ ជួបសេន ប៊ុនថេន មកពីក្លឹបកីឡាប្រដាល់ក្រសួងមហាផ្ទៃ។ រវាងគូនេះសុទ្ធតែជាអ្នកប្រដាល់ជើងចាស់ដែលមានល្បិចប្រយុទ្ធនៅលើសង្វៀនក្រាស់ឃ្មឹកដូចគ្នា តែបើនិយាយពីកម្លាំងស៊ុហ្វវិញនោះគឺអន់បន្តិចហើយ ។
អូត ភូថង ពីមុនមកអ្នកណាមិនល្បីថា គេមានស្នៀតកែង និងជង្គង់អស្ចារ្យនោះ។ ប៉ុន្តែមួយរយៈមកនេះគ្រប់យ៉ាងមិននៅដូចមុនទៀតនោះទេ ។ ចំណែកសេន ប៊ុនថេន វិញ កាន់តែអន់ថែមទៀត ព្រោះស្បែកមុខរបស់គេស្តើងខ្លាំងណាស់ ចិត្តក៏មិនសូវហ៊ានទៀត។ ប៊ុនថេន ពូកែតែស្នៀតជើង និងស្នៀតដៃបន្តិចប៉ុណ្ណោះ រីឯការវាយចេញក៏មិនសូវរហ័សរហួន តែទោះបីជាយ៉ាងណាគូនេះ មុននឹងចាញ់ ឬឈ្នះក៏ពិបាកបន្តិចដែរ។
សិង្ហ សាវ៉ន មកពីក្លឹបសិង្ហកីឡា ជួបសាំង ស៊ីថា មកពីក្លឹបកីឡាប្រដាល់ក្រសួងការពារជាតិ។ រវាងអ្នកប្រដាល់ជើងចាស់មួយគូនេះអត់ធ្លាប់ប៉ះគ្នាពីមុនមកឡើយ ។ សាវ៉ន មួយរយៈមកនេះយីអ៊ុនរបស់គេមិនសូវល្អទាល់តែសោះ ចាញ់ច្រើនជាងឈ្នះ ។ ចំណែកស៊ីថា យីអ៊ុនរបស់គេល្អគួរសម តែគូនេះមានល្បិចប្រយុទ្ធនៅលើសង្វៀនម្យា៉ងម្នាក់ ។ ស៊ីថា ចិត្តហ៊ានជាង ស្នៀតជើង និងស្នៀតដៃក៏ល្អជាងសាវ៉ន ដែរ ។
រាជសីហ៍ ចាន់ឌី មកពីក្លឹបសម្រែករាជសីហ៍បង្ក្រាបគ្រឿងញឿន ជួបហេង កំសត់ មកពីក្លឹបខេមរិន្ទមានឫទ្ធិ ។ ស្វាយ ចាន់ថន មកពីក្លឹបកងរាជអាវុធហត្ថរាជធានីភ្នំពេញ ប្រកួតជាលក្ខណៈសាកលជាមួយពេជ្រ សំរិទ្ធ មកពីក្លឹបអារុណរះកីឡា ៕
ចែករំលែកព័តមាននេះ