រាជធានីភ្នំពេញ ៖ ប្រជាពលរដ្ឋចំនួន២៥៦គ្រួសារ រស់នៅភូមិដើមគ សង្កាត់ជ្រោយចង្វា ភូមិព្រែកតាសេក សង្កាត់ព្រែកតាសេក និងភូមិព្រែកលៀប សង្កាត់ព្រែកលៀប បានប្រមូលផ្តុំគ្នារារាំងការបូមខ្សាច់របស់ក្រុមហ៊ុនញឹក ផន គ្រុប ដែលទទួលបានការអនុញ្ញាតពីសាលារាជធានីភ្នំពេញ បូមខ្សាច់ដាក់បំពេញក្នុងតំបន់ទំនាបបឹងដែលមានក្រុមហ៊ុនមួយកំពុងធ្វើការអភិវឌ្ឍទីក្រុងរណបតំបន់ជ្រោយចង្វា។
កំហឹងផ្ទុះចេញនូវការតវ៉ានេះបានកើតឡើងកាលពីព្រឹកថ្ងៃទី៦ កញ្ញា ដោយប្រជាពលរដ្ឋមកជួបជុំគ្នានៅទីតាំងបូមខ្សាច់ ស្ថិតនៅភូមិព្រែកតាសេក សង្កាត់ព្រែកតាសេក ដើម្បីឱ្យក្រុមហ៊ុនអភិវឌ្ឍនោះដោះស្រាយបញ្ហាដីធ្លីជាមុនសិន ព្រោះ ពួកគាត់បានរស់នៅកាន់កាប់ និងបង្កបង្កើនផលលើដីនោះតាំងពីឆ្នាំ១៩៧៩មកម៉្លេះ មិនត្រូវមកបូមខ្សាច់លុបដីពួកគាត់ទេ។
ក្រុមអ្នកតវ៉ាបានឱ្យដឹងថា ពួកគាត់ជាម្ចាស់ដីមិនជំទាស់នឹងការអភិវឌ្ឍរបស់រាជរដ្ឋាភិបាលទេ តែសុំឱ្យមានការដោះស្រាយដីធ្លីជូនពួកគាត់ជាមុនសិន ។ ពួកគេក៏បានស្នើសុំឱ្យក្រុមហ៊ុនផ្អាកការបូមខ្សាច់ និងដកការដ្ឋានបូមខ្សាច់នោះចេញចាប់ពីថ្ងៃនេះតទៅ និងស្នើសុំឱ្យក្រុមហ៊ុនក៏ដូចជាសាលារាជធានី ភ្នំពេញ ចុះមកធ្វើការចរចាតម្លៃដីជាមុនសិន មុននឹងធ្វើការបូមខ្សាច់ដាក់អភិវឌ្ឍន៍ទីក្រុងរណបថ្មីនេះ។
គួរបញ្ជាក់ថា តំបន់ដីទំនាបជ្រោយចង្វាមានទំហំ៣៨៧ហិកតា ស្ថិតនៅភូមិដើមគ សង្កាត់ជ្រោយចង្វា ភូមិព្រែកតាសេក សង្កាត់ព្រែកតាសេក និងភូមិព្រែកលៀប ខណ្ឌឫស្សីកែវ ត្រូវបានរាជរដ្ឋាភិបាលប្រគល់ឱ្យឯកជនធ្វើការអភិវឌ្ឍជាទីក្រុងរណប ដែលកាលពីទសវត្សឆ្នាំ៩០ មានក្រុមហ៊ុនមកពីប្រទេសម៉ាឡេស៊ីសម្លឹងឃើញម្តងមកហើយ ចង់យកធ្វើទីក្រុងរណប។ លុះក្រោយមកដោយមានបញ្ហាជាមួយម្ចាស់កម្មសិទ្ធិច្រើនពេក ក៏ស្ងាត់ទៅវិញ។
តាមឯកសារបានបង្ហាញថា សាលារាជធានីភ្នំពេញបានអនុញ្ញាតឱ្យក្រុមហ៊ុនញឹកផនគ្រុប បូមខ្សាច់ចាក់បំពេញដីទំហំ៤ហិកតាសិន ដែលដីនេះស្ថិតនៅភូមិព្រែកតាសេក សង្កាត់ព្រែកតាសេក ដើម្បីឱ្យក្រុមហ៊ុនវិនិយោគទីក្រុងរណប ធ្វើស្នាក់ការបណ្តោះអាសន្នមួយសម្រាប់ការអភិវឌ្ឍទីក្រុងរណប តំបន់ជ្រោយចង្វា ហើយត្រូវប្រជាពលរដ្ឋបានលើកគ្នាមកហាមឃាត់សុំឱ្យមានការដោះស្រាយដីធ្លីជាមុនសិន ព្រោះបូមខ្សាច់ដាក់លើដីចម្ការដែលពួកគេអះអាងថា បានកាន់កាប់ និងបង្កបង្កើនផលយូរឆ្នាំមកហើយ៕
ចែករំលែកព័តមាននេះ