រាជធានីភ្នំពេញ ៖ នៅបញ្ជាការដ្ឋានជាតិកម្លាំងពិសេសប្រឆាំងភេរវកម្មកាលពីថ្ងៃទី២ កញ្ញា លោកហ៊ុន ម៉ាណែត មេបញ្ជាការនៃបញ្ជាការដ្ឋានជាតិកម្លាំងពិសេសប្រឆាំងភេរវកម្មនៃគណៈកម្មាធិការជាតិប្រឆាំងភេរវកម្មបានអនុញ្ញាតឱ្យលោក JASON WANG នាយកក្រុមហ៊ុន Sportex ចូលជួបសម្តែងការគួរសម និងជូនអំណោយជាខោអាវកីឡាចំនួន១.៦០០សម្រាប់ដល់នាយកដ្ឋានពិសេសនៃលេខាធិការដ្ឋានគណៈកម្មាធិការជាតិប្រឆាំងភេរវកម្ម ។
នៅក្នុងកិច្ចពិភាក្សាលោកឧត្តមសេនីយ៍ទោ ហ៊ុន ម៉ាណែត បានថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់លោក JASON WANG និងសហការីរបស់លោកដែលនាំយកអំណោយជាសម្លៀកបំពាក់កីឡាជូនដល់អង្គភាពនាយកដ្ឋានពិសេសនៃលេខាធិការដ្ឋានគណៈកម្មាធិការជាតិប្រឆាំងភេរវកម្ម ។
លោក JASON WANG បានថ្លែងអំណរគុណចំពោះលោកហ៊ុន ម៉ាណែត ដែលបានចំណាយពេលវេលាដ៏មានតម្លៃ ដើម្បីជួប ពិភាក្សាជាមួយលោក ។ នេះគឺជាអំណោយមួយដែលកើតចេញពីទឹកចិត្តល្អបរិសុទ្ធ ខណៈពេលដែលលោកបានចូលមកបណ្តាក់ទុនរកស៊ីនៅក្នុងព្រះរាជាណាចក្រកម្ពុជារយៈពេល១០ឆ្នាំមកហើយក្នុងការបង្កើតជារោងចក្រផលិតសម្លៀកបំពាក់កីឡាម៉ាក Adidas ។
លោក JASON WANG បញ្ជាក់ថា រយៈពេល១០ឆ្នាំកន្លងមកនេះ លោកបានកត់សម្គាល់ឃើញព្រះរាជាណាចក្រកម្ពុជាមានភាពរីកចម្រើនហួសពីការស្មាន ។ សមិទ្ធផលទាំងនេះ កើតចេញពីការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាណាចក្រកម្ពុជាដែលបានខិតខំអស់លទ្ធភាពក្នុងការធ្វើឱ្យប្រទេសជាតិមានភាពរីកចម្រើនលើគ្រប់វិស័យ ជាពិសេសគឺកៀងគរអ្នកវិនិយោគបរទេសឱ្យចូលមកបោះទុនវិនិយោគនៅក្នុងព្រះរាជាណាចក្រកម្ពុជា ។
លោកឧត្តមសេនីយ៍ទោ ហ៊ុន ម៉ាណែត បានបន្តថា ក្រោយថ្ងៃរំដោះ៧មករា ១៩៧៩ កម្ពុជា មានការលំបាកខ្លាំងណាស់ ហើយរដ្ឋាភិបាលកសាងប្រទេសជាតិផ្តើមចេញពីបាតដៃទទេ ។ ក្រោមនយោបាយឈ្នះ=ឈ្នះរបស់សម្តេចអគ្គមហាសេនាបតីតេជោ ហ៊ុន សែន កម្ពុជាទទួលបានសុខសន្តិភាព ស្ថិរភាព និងរីកចម្រើនជាលំដាប់ធ្វើឱ្យអ្នកវិនិយោគបរទេសមានជំនឿ និងទុកចិត្តក្នុងការសម្រេចចិត្តបោះទុនវិនិយោគនៅក្នុងប្រទេសកម្ពុជា៕
ចែករំលែកព័តមាននេះ