ខេត្ដព្រះសីហនុ ៖ បុរសម្នាក់ត្រូវស្លាប់ និងក្មេងស្រីម្នាក់ដែលត្រូវជាប្អូនបង្កើតបាន រងរបួស ក្នុងហេតុការណ៍ជួបគ្រោះថ្នាក់ចរាចរណ៍រវាងរថយន្ដ និងម៉ូតូ ។ គ្រោះថ្នាក់ដ៏រន្ធត់នេះ បានកើតឡើងកាលពីថ្ងៃទី២៣ កក្កដា វេលាម៉ោង៤និង៣០នាទីរសៀល នៅតាមបណ្ដោយផ្លូវជាតិលេខ៤ ត្រង់ចន្លោះ គីឡូម៉ែត្រលេខ១៧៨ទៅ១៧៩ ក្នុងភូមិ វាលមាស ឃុំវាលរេញ ស្រុកព្រៃនប់ ។ មន្ដ្រីប៉ូលិសចរាចរស្រុកព្រៃនប់បានឱ្យដឹងថា គ្រោះថ្នាក់នេះកើតឡើងរវាងរថយន្ដស៊ី ទែនដឹកប្រេង១គ្រឿងម៉ាកហ៊ីណូ ពណ៌ស ឆ្នូតក្រហមខៀវ ពាក់ស្លាកលេខក្រុងព្រះសីហនុ 3A6148 បើកបរក្នុងទិសដៅពីក្រុង ព្រះសីហនុទៅភ្នំពេញ បានបុកម៉ូតូដែលធ្វើដំណើរក្នុងទិសដៅស្របគ្នាធុនសេ១២៥ ពណ៌ខ្មៅ ស៊េរី២០០៨ ពាក់ស្លាកលេខក្រុងព្រះសីហនុ 1B0027 បើកបរដោយឈ្មោះមុត ទិត្យ ភេទប្រុស អាយុ២៥ឆ្នាំ ។
អ្នកបើកម៉ូតូ ត្រូវរថយន្ដកិនចំក្បាលស្លាប់នៅនឹងកន្លែង និងឈ្មោះមុត ភត្ដ្រា ភេទស្រី អាយុ១៣ឆ្នាំ ជាអ្នកជិះពីក្រោយរងរបួសស្រាល ។ អ្នកទាំងពីរនាក់ជាបងប្អូនបង្កើតរស់នៅក្នុងភូមិ ត្រញំងមូល ឃុំជើងគោ ស្រុកព្រៃនប់ ចំណែកអ្នកបើកបររថយន្ដពេលជួបហេតុការណ៍ដូច្នេះក៏ឈប់រថយន្ដរត់គេចខ្លួនបាត់តែម្ដង ។ តាមព័ត៌មានពីកន្លែងកើតហេតុបានឱ្យដឹងថា គេឃើញម៉ូតូបើកបរនៅតាមចិញ្ចើម ផ្លូវខាងស្ដាំធម្មតា តែមិនបាននៅលើផ្លូវក្រួសក្រហមសំរាប់ទោចក្រយាននោះទេ ខណៈពេលនោះស្រាប់តែរថយន្ដដែលបើកមកពីក្រោយកៀរម៉ូតូឱ្យដួលធ្វើឱ្យអ្នកបើកម៉ូតូ ធ្លាក់ពីលើម៉ូតូចូលក្រោមរថយន្ដ ហើយក៏ត្រូវកិនចំក្បាលស្លាប់ភ្លាមៗនៅនឹងកន្លែង ចំណែកប្អូនស្រីដែលជិះពីក្រោយត្រូវរងរបួសស្រាល ហើយត្រូវបានដឹកយកទៅសង្គ្រោះភ្លាមៗនៅមន្ទីរពេទ្យ ។ រីឯអ្នកបើកបររថយន្ដក្រោយ ពេលជួបហេតុការណ៍នេះរួចក៏បានឈប់រថយន្ដ ហើយរត់ឡើងជិះរថយន្ដផ្សេងគេចខ្លួនបាត់ទៅ ។ សពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែកយានយន្ដទាំងពីរគ្រឿងត្រូវបាននាំយកទៅរក្សា ទុកនៅអធិការដ្ឋាននគរបាលស្រុកព្រៃនប់ ៕
ចែករំលែកព័តមាននេះ