រាជធានីភ្នំពេញ ៖ នារសៀលថ្ងៃទី២៦ ខែសីហា គណៈប្រតិភូកាកបាទក្រហមកូរ៉េខាងត្បូង ខេត្តជុងប៊ូគ ដែលមានចំនួន២៤នាក់ ដឹកនាំដោយលោកគីម ដុងជីន នាយកទូទៅ បានចុះទស្សនកិច្ច និងនាំយកសម្ភារសិក្សារបស់របរប្រើប្រាស់មួយចំនួនមកប្រគល់ជូនដល់មណ្ឌលផ្កាម្លិះ ចិត្តសាស្រ្តសង្គម។
អញ្ចើញទទួលគណៈប្រតិភូកាកបាទក្រហមកូរ៉េខាងត្បូងនាពេលនោះរួមមាន លោកអូរ៉េល្យាង បីយ៉េកលាន ប្រធានប្រតិភូកាកបាទក្រហមបារាំងប្រចាំនៅកម្ពុជា លោកគ្រួច សាមឿន នាយកប្រតិបត្តិសាខាកាកបាទក្រហមកម្ពុជារាជធានីភ្នំពេញ រួមនឹងមន្ត្រីបុគ្គលិកនៃមណ្ឌលផ្កាម្លិះជាច្រើនរូបទៀត។
លោកស្រី ហង្ស ណាវី មន្ត្រីគម្រោងចិត្តសាស្រ្តសង្គមសាខាកាកបាទក្រហមកម្ពុជារាជធានីភ្នំពេញ និងជានាយិកាមណ្ឌលផ្កាម្លិះ បានរាយការណ៍ពីប្រវត្តិ និងសកម្មភាពការងារប្រចាំថ្ងៃដែលមណ្ឌលបានធ្វើកន្លងមកជូនគណៈប្រតិភូ បានជ្រាប ។ លោកស្រីបានថ្លែងថា ក្រោមកិច្ចសហប្រតិបត្តិការរវាងកាកបាទក្រហមកម្ពុជា សាខារាជធានីភ្នំពេញ និងកាកបាទក្រហមបារាំងក្នុងគម្រោង «ធ្វើឲ្យការរស់នៅកាន់តែប្រសើរឡើង និងធ្វើឲ្យជីវិតមានក្តីសង្ឃឹមរបស់កុមារ និងក្មេងជំទង់ដែលបានទទួលរងទុក្ខដោយសារមេរោគអេដស៍ និងជំងឺអេដស៍នៅកម្ពុជា» យើងបានបង្កើតជាមណ្ឌលផ្កាម្លិះគាំទ្រចិត្តសាស្រ្តសង្គមដែលបានចាប់ដំណើរការកាលពីថ្ងៃទី៣ មិថុនា ឆ្នាំ២០១០ ។ គម្រោងខាងលើផ្តោតទៅលើចិត្តសាស្រ្តសង្គម ចិត្តសាស្រ្តសម្រាប់កុមារ និងក្មេងជំទង់ដែលរស់នៅជាមួយមេរោគអេដស៍ និងជំងឺអេដស៍ និងផ្តល់នូវចំណេះដឹងទូទៅដល់ពួកគេដូចជា ការបង្រៀនអក្សរខ្មែរ អង់គ្លេស គូរគំនូរ របាំ និងជំនាញកុំព្យូទ័រ។ បន្ថែមពីនេះទៀតមណ្ឌលផ្កាម្លិះបានធ្វើការងារសង្គមដូចជា ការស្វែងរកបងប្អូន សាច់ញាតិ និងការសុំធ្វើសំបុត្រកំណើតជូនពួកគេថែមទៀតផង។ សូមបញ្ជាក់ថា កន្លងមក មណ្ឌលបានទទួលកុមារ និងក្មេងជំទង់ចូលមកបណ្តុះបណ្តាលបានចំនួន៣៥៤នាក់ ក្នុងនោះមានស្រី១៧៦នាក់។
តមកគណៈប្រតិភូទាំងអស់បានអញ្ជើញទស្សនាតាមបន្ទប់សិក្សានីមួយៗ និងមានការរាំលេងតាមបទប្រពៃណីខ្មែរយើង លេងល្បែងកម្សាន្តផ្សេងៗជាមួយកុមារនៅក្នុងមណ្ឌលផ្កាម្លិះប្រកបដោយភាពស្និទ្ធស្នាល និងរីករាយបំផុត។ ចុងបញ្ចប់លោកគីម ដុងជីន តំណាងគណៈប្រតិភូទាំងអស់បានប្រគល់នូវសម្ភារៈសិក្សា និងរបស់របរប្រើប្រាស់ជូនដល់លោកស្រីនាយិកាទុកសម្រាប់ប្រើប្រាស់ក្នុងមណ្ឌល និងសម្រាប់ចែកជូនដល់កុមារ៕
ចែករំលែកព័តមាននេះ