ខេត្តបន្ទាយមានជ័យ ៖ កាលពីព្រឹកថ្ងៃទី១ សីហា នៅសាលាដំបូងខេត្ត មានប្រារព្ធពិធីប្រកាសតែងតាំងលោកផាន់ វណ្ណរ័ត្ន ជាព្រះរាជអាជ្ញាថ្មីអមសាលាដំបូងខេត្តជំនួសលោកសូ វ៉ាត ដែលទទួលមរណភាព ហើយលោកតន់ សីហតេជ ព្រះរាជាអាជ្ញាស្តីទី ត្រូវផ្លាស់ទៅកាន់តំណែងជាព្រះរាជអាជ្ញាអមសាលាដំបូងខេត្តពោធិ៍សាត់ ជំនួសលោកតុប ច័ន្ទសេរីវុឌ្ឍ អតីតព្រះរាជអាជ្ញាដែលត្រូវចាប់ខ្លួនក្នុងបទប្រព្រឹត្តអំពើពុករលួយ។ ពិធីនេះបានប្រារព្ធធ្វើក្រោមអធិបតីភាពលោកអង្គ វង្សឌ្ឍានា រដ្ឋមន្ត្រីក្រសួងយុត្តិធម៌ ដោយមានការចូលរួមពីមន្ត្រីក្រសួងយុត្តិធម៌ ព្រះរាជអាជ្ញា ចៅក្រមនៃសាលាដំបូងខេត្ត ថ្នាក់ដឹកនាំខេត្ត ព្រមទាំងតំណាងក្រសួងមន្ទីរនានាជាច្រើនរូបទៀត។
លោកតន់ សីហតេជ បានថ្លែងថា នៅក្នុងឆ្នាំ២០១០ សាលាដំបូងខេត្តបានទទួលសំណុំរឿងចំនួន៧០៧ ពីមន្ត្រីនគរបាលយុត្តិធម៌ក្នុងនោះបទល្មើសឧក្រិដ្ឋចំនួន១៥៥ បទល្មើសមជ្ឈិម ៤៨៦ បទល្មើសគ្រឿងញៀន៦៦ ជម្រះបាន៦រឿង បើកការស៊ើបសួរ៥៤៦រឿង។
លោកចាន់ មនោ អគ្គនាយករដ្ឋបាល និងហិរញ្ញវត្ថុក្រសួងយុត្តិធម៌ បានអានព្រះរាជក្រឹត្យតែងតាំងលោកផាន់ វណ្ណរ័ត្ន ជាព្រះរាជអាជ្ញាថ្មីនៃអយ្យការសាលាដំបូងខេត្តជំនួសលោកសូ វ៉ាត ព្រះរាជអាជ្ញានៃអយ្យការអមសាលាដំបូងខេត្តដែលទទួលមរណភាព។
លោកផាន់ វណ្ណរ័ត្ន ព្រះរាជអាជ្ញាថ្មី បានលើកឡើងពីការងារដែលលោកធ្លាប់ធ្វើមុនពេលមកកាន់ជាព្រះរាជអាជ្ញានេះ គឺលោកមានតួនាទីជាព្រះរាជអាជ្ញានៃមហាអយ្យការអមតុលាការកំពូល និងជាសមាជិកក្រុមជំនួយការនៃក្រុមប្រឹក្សាវិន័យឧត្តមក្រុមប្រឹក្សានៃអង្គចៅក្រម។ ដើម្បីឆ្លើយតបនឹងការទទួលបានភារកិច្ចថ្មីនេះលោកនឹងខិតខំដឹកនាំសម្របសម្រួលសហការជាមួយនគរបាលយុត្តិធម៌ ដើម្បីបង្ក្រាប និងទប់ស្កាត់បទល្មើសព្រហ្មទណ្ឌគ្រប់ប្រភេទ ដោយសហការជាមួយស្ថាប័នពាក់ព័ន្ធផ្សេងៗ។
លោកឈុំ វណ្ណរិទ្ធ អភិបាលរងខេត្ត បានសុំឱ្យប្រព័ន្ធយុត្តិធម៌បន្តជំរុញផ្នែកច្បាប់ដល់មន្ត្រីនគរបាលយុត្តិធម៌ក្នុងការបង្ក្រាបបទល្មើស ជាពិសេសគោលនយោបាយភូមិ-ឃុំមានសុវត្ថិភាព។
លោកអង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ បានផ្តាំផ្ញើដល់ព្រះរាជអាជ្ញាថ្មី ត្រូវប្រកាន់ខ្ជាប់នូវស្មារតី និងឧត្តមគតិខ្ពស់ក្នុងការស្វែងរកយុត្តិធម៌ ត្រូវពង្រឹងក្រមសីលធម៌ចៅក្រមឱ្យបានម៉ឺងម៉ាត់ ត្រូវធ្វើទំនាក់ទំនងជានិច្ចជាមួយក្រសួងយុត្តិធម៌ ហើយក៏ផ្តាំផ្ញើចំពោះចៅក្រម ព្រះរាជអាជ្ញា ព្រះរាជអាជ្ញារង ក្រឡាបញ្ជី ទាំងអស់ឱ្យយកចិត្តទុកដាក់ខិតខំស្វែងយល់រៀនសូត្របន្ត។ លោករដ្ឋមន្ត្រីបានបញ្ជាក់ថា រយៈកាលកន្លងមកនេះ សាលាដំបូង និងអយ្យការអមសាលាដំបូងខេត្ត ដោយមានកិច្ចសហការជាមួយអាជ្ញាធរសមត្ថកិច្ចចម្រុះ បានធ្វើការបង្ក្រាបប្រកបដោយប្រសិទ្ធភាពនូវការផលិត ជួញដូរនិងប្រើប្រាស់គ្រឿងញៀន ក៏ដូចជាបង្ក្រាបបទល្មើសផ្សេងៗ ដែលកើតមានក្នុងដែនដីខេត្តបន្ទាយមានជ័យ។ សកម្មភាពការងារនេះ បានធ្វើឱ្យមានការទុកចិត្តពីក្រសួងយុត្តិធម៌ ស្ថាប័នមានសមត្ថកិច្ចពាក់ព័ន្ធផ្សេងៗក៏ដូចជាប្រជាពលរដ្ឋដែរ។
ជាចុងក្រោយ លោករដ្ឋមន្ត្រីក៏បានផ្តាំផ្ញើដល់ព្រះរាជអាជ្ញានៃអយ្យការសាលាដំបូងខេត្ត ដែលត្រូវចូលកាន់តំណែងថ្មីពេលនេះគឺ ១-ត្រូវប្រកាន់ខ្ជាប់នូវស្មារតី និងឧត្តមគតិជាតិខ្ពស់ ក្នុងការស្វែងរកយុត្តិធម៌ប្រកបដោយតម្លាភាព សមភាព ជូនប្រជាពលរដ្ឋ ធ្វើយ៉ាងណាឱ្យវិស័យយុត្តាធិការមានភាពល្អប្រសើរ និងមានជំនឿទុកចិត្ត។ ២-ពង្រឹង និងអនុវត្តក្រមសីលធម៌ចៅក្រមឱ្យបានម៉ឺងម៉ាត់ និងខ្ជាប់ខ្លួន។ ៣-ត្រូវរៀបចំ និងលើកទិសដៅផែនការសម្រាប់អនុវត្តនាពេលអនាគតឱ្យបានច្បាស់លាស់។ ៤-ត្រូវពង្រឹងសាមគ្គីភាពផ្ទៃក្នុងឱ្យបានល្អ និងបន្តកិច្ចសហការជាមួយអាជ្ញាធរដែនដី ស្ថាប័នមានសមត្ថកិច្ចនានា ឱ្យបានល្អប្រសើរថែមទៀត។ ៥-ត្រូវធ្វើទំនាក់ទំនងជាមួយក្រសួងយុត្តិធម៌។ ៦-ត្រូវរៀបចំទុកដាក់បញ្ជីសំណុំរឿងក្តីឱ្យបានត្រឹមត្រូវប្រកបដោយការទទួលខុសត្រូវខ្ពស់ បន្តចាត់ការឱ្យបានទាន់ពេលវេលាស្របតាមនីតិវិធីដែលច្បាប់បានកំណត់ ចៀសវាងឱ្យបាននូវការទុកចោលមិនចាត់ការ ឬបាត់បង់សំណុំរឿងដែលធ្វើឱ្យការឃុំខ្លួនជនសង្ស័យ ឬពិរុទ្ធជនហួសកាលកំណត់ ប៉ះពាល់ដល់កិត្តិយស សេចក្តីថ្លៃថ្នូរ និងសិទ្ធិសេរីភាពជាបុគ្គល ឬបាត់បង់ប្រយោជន៍របស់ម្ចាស់បណ្តឹង និងជនរងគ្រោះ។
ចៅក្រម និងព្រះរាជអាជ្ញា ព្រះរាជអាជ្ញារងដែលនឹងត្រូវធ្វើការផ្ទេរចេញ-ចូលកាន់តំណែងថ្មីត្រូវយកចិត្តទុកដាក់ខ្ពស់បំផុតនូវការផ្ទេរ និងទទួលសំណុំរឿងជៀសវាងកុំឱ្យមានការបាត់បង់សំណុំរឿងដែលស្ថិតក្នុងសមត្ថកិច្ចនៃការស៊ើបអង្កេត។ ជាមួយគ្នានេះដែរ ចំពោះលោកចៅក្រម ព្រះរាជអាជ្ញា ព្រះរាជអាជ្ញារង និងក្រឡាបញ្ជីទាំងអស់ ត្រូវយកចិត្តទុកដាក់ខិតខំស្វែងយល់រៀនសូត្របន្ថែមទៀត ដើម្បីបង្កើននូវចំណេះដឹង សមត្ថភាពក្នុងការបំពេញការងារប្រកបដោយប្រសិទ្ធភាពខ្ពស់ស្របតាមការវិវត្តនៃសង្គមជាតិយើងនាពេលបច្ចុប្បន្ន៕
ចែករំលែកព័តមាននេះ