ខេត្តកំពង់ចាម ៖ ហេតុការណ៍គ្រោះថ្នាក់ចរាចរណ៍ដែលបណ្តាលឱ្យស្លាប់អ្នកដំណើរចំនួន៥នាក់ យ៉ាងអាណោចអាធ័មទាំងព្រឹកព្រលឹមថ្ងៃទី៣១ កក្កដា នៅលើកំណាត់ផ្លូវជាតិលេខ៦ ស្ថិតក្នុងភូមិតែសែន ឃុំសូទិព្វ ស្រុកជើងព្រៃ រវាងរថយន្តទួរីសប្រភេទ១២កៅអី និងរថយន្តយីឌុបពាក់ស្លាកលេខភ្នំពេញ 3B-2371 ហើយនគរបាលប្រាប់ថា អ្នកបើកបររត់បាត់នោះមិនពិតទេ គឺចាប់ខ្លួនបាននៅចម្ងាយប្រមាណ៣០០ម៉ែត្រប៉ុណ្ណោះ ពីកន្លែងកើតហេតុ។
លោកអនុសេនីយ៍ឯក អ៊ឹម ហ៊ុំ អធិការរងនគរបាលស្រុកជើងព្រៃទទួលផែនសណ្តាប់ធ្នាប់ប្រាប់ឱ្យដឹងថា តាមមន្ត្រីនគរបាលចរាចរស្រុកដែលទៅពិនិត្យដល់កន្លែងកើតហេតុនោះឃើញថា ដោយសារកម្លាំងបុករវាងរថយន្តទួរីសដឹកអ្នកដំណើរ និងរថយន្តយីឌុបម៉ាក FUSO នោះ ធ្វើឱ្យរថយន្តដឹកអ្នកដំណើរផ្លោងខ្ទាតចម្ងាយ៨,២០ម៉ែត្រ រងការខូចខាតខ្ទេចខ្ទីស្ទើរទាំងស្រុង ហើយអ្នកដំណើរចំនួន៥នាក់បានស្លាប់ និងរងរបួសធ្ងន់ចំនួន២នាក់ ។
អ្នកបើកបររថយន្តធំឈ្មោះទ្រី សំណាង ភេទប្រុស អាយុ២៨ឆ្នាំ បានបើកទ្វាររថយន្តរត់គេចខ្លួនបានប្រហែលជា៣០០ម៉ែត្រប៉ុណ្ណោះ ក៏ត្រូវកម្លាំងនគរបាលចរាចរស្រុករួមជាមួយនគរបាលសេដ្ឋកិច្ចខេត្ត និងកម្លាំងអាវុធហត្ថស្រុកជើងព្រៃចេញអន្តរាគមន៍តាមចាប់ខ្លួនបាន ក្នុងពេលរត់ឡើងទៅជិះរថយន្តមួយគ្រឿងទៀត បម្រុងគេចខ្លួន។ ក្រោយពីបានហៅឱ្យចុះពីលើរថយន្តនោះហើយ ក៏រត់ចូលសំដៅទៅក្នុងស្ថានីយលក់ប្រេងឥន្ធនៈមួយកន្លែង តែត្រូវបានចាប់ជាប់ រួចបញ្ជូនទៅកាន់អធិការដ្ឋាននគរបាលស្រុកជើងព្រៃ ។
តាមអ្នកបើកបររថយន្តធំឈ្មោះទ្រី សំណាង បានឆ្លើយថា នៅវេលាម៉ោងប្រហែល៤និង៣០នាទីទៀបភ្លឺថ្ងៃទី៣១ កក្កដា រូបគេបានបើករថយន្តចេញពីអូរបែកក្អម រាជធានីភ្នំពេញ ជាមួយនឹងព្រូម្នាក់ឈ្មោះចន្ទ ឆ្ពោះមកកាន់ព្រំដែនវៀតណាមជាប់នឹងខេត្តកំពង់ចាម ។ ពេលមកដល់ខាងលិចស្គន់ចម្ងាយប្រហែលជា៣គីឡូម៉ែត្រ មានរថយន្តមា៉កសាន់យ៉ុងមួយគ្រឿងដែលបើកស្របទិសគ្នាជាមួយនឹងរថយន្តរបស់ខ្លួនចេញពីលិចមកកើតបត់មកខាងឆ្វេង ដែលឃើញបែបនេះរូបគេ (ទ្រី សំណាង) ក៏ជាន់ហ្វ្រាំងទប់ ។ ពេលនោះក៏មានរថយន្តទួរីសដឹកអ្នកដំណើរមួយគ្រឿងបើកបញ្ច្រាសទិសគ្នាមកពីខាងមុខ បានបើកចៀសពីរថយន្តសាន់យ៉ុង មកចំពីខាងមុខរថយន្តរបស់គេ ហើយបើសិនជាចៀសរថយន្តតូចនេះក៏នឹងត្រូវទៅបុកផ្ទះរបស់ប្រជាពលរដ្ឋដែលស្ថិតនៅខាងស្តាំដៃមិនខាន ទើបខ្លួនសុខចិត្តទៅតាមដំណើរតែម្តងទៅ ។
លោកអនុសេនីយ៍ឯក អ៊ឹម ហ៊ុំប ញ្ជាក់ថា ចំពោះសពជនរងគ្រោះទាំង៥នាក់ដែលបានតម្កល់ទុកនៅមន្ទីរពេទ្យបង្អែកស្រុកជើងព្រៃនោះ ត្រូវបានក្រុមសាច់ញាតិមកទទួលយកទៅអស់ហើយ។ ឯសពស្រ្តីទី៥ ដែលមិនស្គាល់អត្តសញ្ញាណនោះ ត្រូវបានស្គាល់ហើយនាវេលាម៉ោងជាង៧យប់ថ្ងៃទី៣១កក្កដា គឺឈ្មោះហ៊ន់ គន្ធា អាយុ៣៥ឆ្នាំ រស់នៅភូមិអណ្តូងត្រាំង ឃុំស្រម៉ ស្រុកជើងព្រៃ។ មូលហេតុនៃគ្រោះថ្នាក់នេះ ដោយសារតែរថយន្តធំបានរេចង្កូតមកបុករថយន្តទួរីសដឹកអ្នកដំណើរ៕
ចែករំលែកព័តមាននេះ