ខេត្តកំពង់ឆ្នាំង ៖ នៅពេលទឹកទន្លេកំពុងសម្រុកឡើងខ្លាំងក្នុងខែវស្សានេះ ដំណាំកសិផលរបស់ប្រជាពលរដ្ឋនៅតាមដងទន្លក៏សម្រុកបេះប្រមូលយកមកទីផ្សារដែរ ព្រោះតែការជន់លិចនៃទឹកទន្លេដែលកំពុងសម្រុកឡើងជារៀងរាល់ថ្ងៃ។ ក្នុងដំណាំកសិផលមានដូចជា ត្រប់ ល្ពៅ ម្ទេស ឪឡឹកជាដើមក៏នៅមានផ្លែពោតក៏ត្រូវបានប្រជាកសិករសម្រុកបេះយកមកយ៉ាងច្រើនណាស់ដែរ មិនថាចាស់ ឬខ្ចីនោះទេ ព្រោះបើទុកគង់តែខូចដដែល ហើយកត្តានេះធ្វើឱ្យធ្លាក់តម្លៃដែលប្រជាកសិករមានការខកចិត្តណាស់ដែរ ។
នៅកំពង់ផែផ្សារក្រោមខេត្តកំពង់ឆ្នាំង ផ្លែពោតជាច្រើនតោនត្រូវប្រជាកសិករបេះយកមកលក់មានគំនរដូចភ្នំ ដែលពួកគាត់បានដឹកមកទាំងទូកៗ ហើយបានជញ្ជូនមកដាក់តាមច្រាំងនៃទន្លេ។
អ៊ំស្រី សុត វឺន អាយុ៤៨ឆ្នាំ មានទីលំនៅភូមិកំពង់ហៅ ឃុំកំពង់លែង ស្រុកកំពង់លែង បាននិយាយទាំងមុខស្ងួតថា គាត់ខាតច្រើនណាស់ពីដំណាំពោតនេះ ព្រោះតែគាត់បានចំណាយដើមច្រើនក្នុងការដាំវា។ កាលពីពាក់កណ្តាលខែកក្កដា តម្លៃពោតនៅបានថ្លៃគ្រាន់បើដែរ ក្នុងមួយផ្លូន (៥២ផ្លែ) លក់បានតម្លៃ៥.៥០០រៀល ប៉ុន្តែមកដល់ចុងខែកក្កដានេះ តម្លៃពោតមួយផ្លូនធ្លាក់ចុះនៅត្រឹមតែ៣.០០០រៀល និងខ្លះ២.៥០០រៀលផង ដែលធ្វើឱ្យគាត់ខាតបង់យ៉ាងច្រើន។ គាត់បានសំណូមដល់អាជ្ញាធរ ឬក៏រាជរដ្ឋាភិបាលសូមជួយរកទីផ្សារឱ្យបានសមស្របដល់ពួកគាត់ជាកសិករសំរាប់ឆ្នាំក្រោយៗផង ។
ស្រ្តីឈ្មោះសុខ នីម ដែលជាអាជីវករទិញកសិផលយកទៅលក់បោះដុំនៅភ្នំពេញ បាននិយាយថា គាត់ពេលខ្លះក៏មានខាតដែរ ព្រោះតែគេបន្ថោកថ្លៃនៅពេលវាសំបូរម្តងៗ៕
ចែករំលែកព័តមាននេះ