រាជធានីភ្នំពេញ ៖ សម្តេចនាយករដ្ឋមន្រ្តី ហ៊ុន សែន បានចាត់ទុកការលើកឡើងរបស់លោកនាយករដ្ឋមន្រ្តីថៃជិតអស់តំណែង អាប់ភីស៊ីត វ៉េចាជីវ៉ា ដែលថា បើកម្ពុជាគាំទ្រសេចក្តីសម្រេចតុលាការយុត្តិធម៌អន្តរជាតិ កម្ពុជាត្រូវដកកងទ័ពជាមុននោះគឺជាសម្តីកូនក្មេងបឋមសិក្សា ហើយពេលនេះមិនមែនជាល្បែងកូនក្មេងលេងជាមួយកូនក្មេងនោះទេ សូមកុំច្រឡំ។
ប្រសាសន៍ថ្លែងរបស់សម្តេចអគ្គមហាសេនា បតី តេជោហ៊ុន សែន យ៉ាងដូច្នេះ គឺបានធ្វើឡើងក្នុងឱកាសដែលសម្តេចបានធ្វើសន្និ សីទកាសែតមួយស្តីពីគោលជំហររបស់កម្ពុជាលើបញ្ហាព្រំដែនកម្ពុជាថៃ នៅក្រោយការសម្រេចចាត់វិធានការបន្ទាន់របស់តុលាការយុត្តិធម៌អន្តរ ជាតិក្រុងឡាអេ នៅវិមានសន្តិភាពទីស្តីការនាយករដ្ឋមន្រ្តី។
ក្នុងឱកាសនោះដែរ សម្តេចតេជោហ៊ុន សែន បានធ្វើការកត់សម្គាល់ចំណុចសំខាន់ចំនួន២នៃសេចក្តីសម្រេចរបស់តុលាការយុត្តិធម៌អន្តរជាតិ គឺសេចក្តីសម្រេចរបស់តុលាការមានឥទ្ធិពលត្រូវតែគោរពតាម ហើយសេចក្តីសម្រេចនេះជាចំណងកាតព្វកិច្ចផ្លូវច្បាប់ជាអន្តរជាតិ និងទី២ សេចក្តីសម្រេចនេះមិនមែនជាការកាត់សេចក្តីមុនការបកស្រាយសាលដីកាឆ្នាំ១៩៦២នោះទេ។ សម្តេចហ៊ុន សែន ក៏បានស្នើអោយលោកអាប់ភីស៊ីត កុំនិយាយច្រើនពេក ហើយត្រូវកម្រិតនូវពាក្យសម្តីរបស់ខ្លួនមុននឹងនិយាយ និងមិនត្រូវលេងល្បែងបោកបញ្ឆោតប្រជាពលរដ្ឋខ្លួនឯងនោះទេ។ ការដែលតុលាការយុត្តិធម៌អន្តរជាតិសម្រេចឱ្យភាគីកម្ពុជា-ថៃ ដកកងទ័ពចេញពីតំបន់ជម្លោះក្បែរប្រាសាទព្រះវិហារជាបន្ទាន់នោះគឺ តុលាការបានប្រើប្រាស់ផែនទីអន្តរជាតិ (ដងរែក) បារាំង-សៀម មិនបានប្រើប្រាស់ផែនទីឯកតោភាគីរបស់ថៃ ឬផែនទីចោរនោះទេ ដូច្នេះគួរយល់ដឹងផ្លូវច្បាប់ខ្លះផង ជាពិសេសត្រូវយល់ដឹងពីការសម្រេចរបស់តុលាការ និងត្រូវយល់ដឹងពីនីតិវិធីអនុវត្តរបស់តុលាការ កុំនិយាយផ្តេសផ្តាសបន្លិបបន្លំលើសេចក្តីសម្រេចរបស់តុលាការឱ្យសោះ ។
សម្តេចនាយករដ្ឋមន្រ្តីហ៊ុន សែន ក៏បានបញ្ជាក់ទៀតថា ថៃបានប្រមាថមើលងាយតុលាការយុត្តិធម៌ច្រើនពេក បានជាតុលាការហាក់ដូចជាទះកំភ្លៀងអាប់ភីស៊ីត១កំផ្លៀងយ៉ាងខ្លាំង ខណៈពេលដែលតុលាការបានទាត់ចោលនូវសំណើរបស់ថៃដែលស្នើអោយតុលាការយុត្តិធម៌អន្តរជាតិកុំលើកយកសំណើរបស់កម្ពុជាមកបើកសវនាការ ឬបកស្រាយនោះ។ សម្តេចអគ្គមហាសេនាបតីតេជោហ៊ុន សែន ក៏បានបន្ថែមដែរថា នៅពេលនេះ កម្ពុជាបានធ្វើសេចក្តីព្រាងលើកិច្ចព្រមព្រៀងរវាងកម្ពុជា-ថៃ ស្តីពីការអនុវត្តដីកាសម្រេចរបស់តុលាការយុត្តិធម៌អន្តរជាតិរួច ហើយ ហើយក្រសួងការបរទេសក៏បានបញ្ជូន សេចក្តីព្រាងនៃកិច្ចព្រមព្រៀងនេះទៅកាន់ភាគីថៃ អាស៊ាន តុលាការយុត្តិធម៌អន្តរជាតិ និងក្រុមប្រឹក្សាសន្តិសុខអង្គការសហប្រជាជាតិរួចរាល់ ហើយ ៕
ចែករំលែកព័តមាននេះ