កាសែតបាងកកប៉ុស្តិ៍នៅថ្ងៃទី២២ កក្កដា ផ្សាយឱ្យដឹងថា ថៃនឹងជំទាស់នឹងបទបញ្ជារបស់តុលាការអាល្លឺម៉ង់ដែលបញ្ជាឱ្យខ្លួនបង់ប្រាក់ធានាចំនួន២០លានអឺរ៉ូ ប្រហែល៨៤៦លានបាត ឬប្រហែល២៨លានដុល្លារអាមេរិក ដើម្បីជាថ្នូរនឹងការដោះលែងវិញនូវយន្តហោះមួយគ្រឿងធុនប៊ូអ៊ីង ៧៣៧ ដែលថៃអះអាងថា ជារបស់រាជទាយាទវិចរ៉ាឡុងកន ហើយត្រូវបានរឹបអូសនៅក្នុងទីក្រុងមុយនិច ប្រទេសអាល្លឺម៉ង់ កាលពីសប្តាហ៍មុន។
រដ្ឋមន្ត្រីការបរទេសផុតអាណត្តិថៃ លោកកាស៊ីត ភិរម្យ ថ្លែងថា រដ្ឋាភិបាលនឹងមិនបង់ប្រាក់ធានា២៨លានដុល្លារនោះឡើយ ព្រោះយន្តហោះនោះជារបស់រាជទាយាទ មិនមែនជារបស់រដ្ឋាភិបាលនោះទេ ។ លោកកាស៊ីត ថ្លែងទៀតថា មន្ត្រីក្រសួងការបរទេស នាយកដ្ឋានអាកាសចរណ៍ស៊ីវិល អ្នកតំណាងកងទ័ពអាកាសចរណ៍
ភូមិន្ទ និងអ្នកឯកទេសផ្នែកច្បាប់មួយក្រុម នឹងធ្វើដំណើរទៅកាន់ប្រទេសអាល្លឺម៉ង់ដើម្បីតស៊ូប្រឆាំងករណីនេះ។
រដ្ឋមន្ត្រីការបរទេសថៃផុតអាណត្តិរូបនេះ ថ្លែងដូច្នេះក្រោយពីលោកវិលត្រឡប់ដល់ប្រទេសថៃវិញពីប្រទេសអាល្លឺម៉ង់ ដើម្បីដោះស្រាយបញ្ហារឹបអូសយន្តហោះនោះ ប៉ុន្តែទទួលបរាជ័យ។ លោកកាស៊ីត ថ្លែងថា ព្រះមហាក្សត្រពុំមានជាប់ពាក់ព័ន្ធជាមួយករណីនេះទេ តែករណីនេះទាក់ទិនរវាងរដ្ឋាភិបាលថៃ និងក្រុមហ៊ុនសំណង់អាល្លឺម៉ង់មួយប៉ុណ្ណោះ ។ យន្តហោះនេះជាទ្រព្យសម្បត្តិឯកជន ហើយត្រូវចុះបញ្ជីស្របច្បាប់ដូច្នេះ ពុំមានហេតុផលអ្វីដែលរដ្ឋាភិបាលត្រូវតម្កល់ប្រាក់ធានា ដើម្បីជាថ្នូរនឹងការដោះលែងយន្តហោះនោះទេ។
យន្តហោះធុនប៊ូអ៊ីង ៧៣៧ របស់រាជទាយាទវិចរ៉ាឡុងកន នេះត្រូវបានអាល្លឺម៉ង់រឹបអូសកាលពីថ្ងៃទី១២ កក្កដា កន្លងមក ដោយជម្លោះមានតាំងពីយូរមកហើយរវាងរដ្ឋាភិបាលថៃ និងក្រុមហ៊ុនសំណង់អាល្លឺម៉ង់ Walter Bau ទាក់ទងនឹងគម្រោងសាងសង់ផ្លូវមួយតភ្ជាប់ពីទីក្រុងបាងកក ទៅព្រលានយន្តហោះដនមឿង។ ករណីរឹបអូសយន្តហោះរាជទាហានវិចរ៉ាឡុងកន នេះជាបញ្ហាថ្មីមួយសម្រាប់ប្រទេសថៃ។ កាលពីថ្ងៃទី២០ កក្កដា កន្លងមក តុលាការអាល្លឺម៉ង់បានសម្រេចដោះលែងយន្តហោះនោះវិញក្នុងករណីថៃត្រូវតម្កល់ប្រាក់ធានា២៨លានដុល្លារសម្រាប់យន្តហោះនេះ ៕
ចែករំលែកព័តមាននេះ