រាជធានីភ្នំពេញ ៖ សេក គីមគីម មកពីក្លឹបសឹករងខេត្តសៀមរាប ណាត់ថៃ ប៊ុនហាន មកពីក្លឹបបុរីនាគរាជ សាកកម្លាំងគ្នានៅលើសង្វៀនស្ថានីយទូរទស្សន៍ CTN នាថ្ងៃសៅរ៍ទី២៣ ខែកក្កដាខាងមុខនេះ ខណៈសាំង ស៊ីថា មកពីក្លឹបសមាគមកីឡាប្រដាល់ក្រសួងការពារជាតិ ចង់សាកកម្លាំងជាមួយញៀន វ៉ាន់ណយ មកពីក្លឹបកងពលធំអន្តរាគមន៍លេខ៣ព្រះវិហារ ។
សេក គីមគីម និងប៊ុនហាន សុទ្ធតែជាជើងខ្លាំង ធ្លាប់ប្រឡូកនៅលើសង្វៀនជាយូរមកហើយដូចគ្នា ប៉ុន្តែកន្លងមកមិនធ្លាប់ជួបគ្នាម្តងណាឡើយ ។ សេក គីមគីម មានជំនាញខាងប្រើស្នៀតកែងនិងជង្គង់ ប៉ុន្តែចិត្តរបស់គេមិនសូវហ៊ានប៉ុន្មានឡើយ ។ ម្យ៉ាង ស្នៀតជង្គង់របស់គេអាចវាយកៀកក៏បានប្រយោលក៏បានដែរ ឯស្នៀតកណ្តាប់ដៃរបស់គេអាចម៉ាត់ចេញបានត្រង់ល្អគួរសមទាស់ត្រង់ថាមិនសូវខ្លាំងប៉ុណ្ណោះ ។ ចំណែកប៊ុនហាន ល្អបានតែស្នៀតកណ្តាប់ដៃនិងស្នៀតជើងប៉ុណ្ណោះ ម្យ៉ាងចរិតរបស់គេឆាប់ខឹងឆាប់ច្រឡោត តែស្បែកមុខក្រាស់គួរសមវាយត្រូវល្មមៗមិនងាយឈឺឡើយ ។ ប៉ុន្តែសម្រាប់ការមកប៉ះគីមគីមលើកនេះគេគិតថាមិនអាចមានការធ្វេសប្រហែសបានឡើយ ព្រោះគេយល់ថាស្នៀតប្រយុទ្ធរបស់គីមគីមសម្បូរបែបជាង ។
សាំង ស៊ីថា និងវ៉ាន់ណយ បើទោះជាមិនសូវមានកេរ្តិ៍ឈ្មោះបោះសំឡេងនៅលើសង្វៀនដូចគេឯងមែន តែបើអ្នកធ្លាប់ដឹងពីល្បិចប្រយុទ្ធនៅលើសង្វៀនរបស់គូនេះក៏មិនជាអន់ខ្សោយណាស់ណាប៉ុន្មានដែរ ។ សាំង ស៊ីថា ពូកែស្នៀតកណ្តាប់ដៃនិងស្នៀតជើងហើយចិត្តក៏ហ៊ានទៀត មិនងាយចាញ់សម្លុតអ្នកណាផ្តាសឡើយ ប៉ុន្តែសម្រាប់វ៉ាន់ ណយវិញបើទោះជាគេមិនសូវស្គាល់ប្រវត្តិច្បាស់លាស់ពីមុនមកមែន តែតាមការអះអាងរបស់លោកឡោ វុទ្ធី គ្រូបង្វឹករបស់គេគឺសិស្សគុនរបស់លោកអាចតស៊ូជាមួយស៊ីថាបាន៥ទឹកមិនលំបាក។ លោកគិតថា ល្បិចប្រយុទ្ធមានភាពខុសប្លែកគ្នាបន្តិច តែបើនិយាយពីកម្លាំងវិញវ៉ាន់ណយហ៊ានធានាទុកមុនថាគឺមិនមានបញ្ហាអ្វីឡើយ ។
ម៉ៃ សុខឈួន មកពីក្លឹបសមាគមយុវជនកម្ពុជាខណ្ឌមានជ័យ ជួបសល់ អាម៉ា មកពីក្លឹបអាស៊ីកីឡា ។ សេង កំសត់ មកពីក្លឹបខេមរិន្ទមានឫទ្ធិ ជួបរាជសីហ៍ ចាន់ឌី មកពីក្លឹបសម្រែករាជសីហ៍បង្ក្រាបគ្រឿងញៀន ។ ចំណែកនៅលើសង្វៀនស្ថានីយទូរទស្សន៍បាយ័ននាថ្ងៃសៅរ៍ទី២៣ កក្កដានោះដែរ ហេង សំរាំង មកពីក្លឹបព្រៃទទឹងសម្រែកគ្រឿងញៀន ចង់ប្រកួតក្បាច់គុនជាមួយពេជ្រ សីហា មកពីក្លឹបប្រដាល់ក្រសួងការពារជាតិ ។
សំរាំង មិនធ្លាប់ជួបសីហាពីមុនមកទេ ដូច្នេះគេមិនហ៊ានអះអាងទុកមុនពីការចាញ់-ឈ្នះឡើយ ព្រោះមិនចង់ធ្វើឱ្យអ្នកគាំទ្ររបស់គេមានការខកចិត្ត ប៉ុន្តែអ្វីដែលសំខាន់បំផុតនោះ គឺគេនឹងប្រឹងឱ្យអស់ពីសមត្ថភាពបច្ចេកទេសដែលមានដើម្បីតស៊ូជាមួយសីហា ។ សំរាំងជាអ្នកប្រដាល់ចាស់វស្សាម្នាក់ ធ្លាប់ឈានជើងឡើងសង្វៀនប្រកួតយូរក្រែលមកហើយ ប៉ុន្តែគេមិនដែលឃើញសំរាំងបញ្ចេញស្នៀតអ្វីដែលពិសេសសម្រាប់ផ្តួលគូប្រកួតឡើយ ។ ស្នៀតប្រយុទ្ធដែលពូកែបំផុតគឺស្នៀតកណ្តាប់ដៃនិងស្នៀតជើងតែកម្លាំងមិនសូវខ្លាំងហើយចិត្តតូចថែមទៀត ។ រីឯសីហាវិញ ស្នៀតប្រយុទ្ធនៅលើសង្វៀនរបស់គេសម្បូរបែបបំផុត ស្នៀតកែងនិងជង្គង់កាន់តែសាហាវថែមទៀត ប៉ុន្តែអ្នកប្រដាល់វ័យក្មេងម្នាក់នេះមិនចេះអួតក្អេងក្អាងដាក់អ្នកណាម្នាក់ឡើយ ។
សម្រាប់គូនេះសូម្បីអ្នកចូលចិត្តលេងភ្នាល់ដាក់លុយ ក៏មិនសូវមានជំនឿចិត្តលើសំរាំងប៉ុន្មានដែរ ។ ជិន រ៉ា មកពីក្លឹបកីឡាប្រដាល់ក្រសួងការពារជាតិ ប៉ះជាមួយសូយ គោ មកពីក្លឹបអូដឹមកីឡា ។ ស៊ូ វណ្ណៈ មកពីក្លឹបយុវកីឡា ជួបព្រែក បូរិន មកពីក្លឹបនិរោធមានជ័យ ។ ម៉ៃ សុវណ្ណ មកពីក្លឹបចាក់អង្រែ ជួបឈាង សំអូន មកពីក្លឹបកងទ័ពជើងគោក ៕
ចែករំលែកព័តមាននេះ