រាជធានីភ្នំពេញ ៖ អាជ្ញាធរខណ្ឌមានជ័យដឹកនាំ ដោយលោកហៀក ចាន់លាង អភិបាលរងខណ្ឌ និងមានការចូលរួមអនុវត្តផ្ទាល់ពីព្រះរាជអាជ្ញារងអមសាលាដំបូងរាជធានីភ្នំពេញ បានចុះបង្ក្រាបវង់ល្បែងស៊ីសងមួយកន្លែងស្ថិតនៅភូមិស្វាយតាអុក សង្កាត់វាលស្បូវ ខណ្ឌមានជ័យ កាលពីរសៀលថ្ងៃទី១៧ កក្កដា ។
ក្នុងប្រតិបត្តិការខាងលើនេះ សមត្ថកិច្ចបានឃាត់ខ្លួនមនុស្ស៣នាក់ ក្នុងនោះម្នាក់ជាម្ចាស់ផ្ទះ ដែលបើកល្បែងស៊ីសងនេះ ហើយមានតួនាទីជាមន្ត្រីនគរបាលនៅស្នងការដ្ឋាននគរបាលរាជធានីភ្នំពេញថែមទៀតផង។ សមត្ថកិច្ចបានដកហូតម៉ូតូទំនើបៗចំនួន៩គ្រឿង រថយន្តចំនួន៧គ្រឿង ស្បែកជើង១៥គូ និងបៀសម្រាប់លេង២ប្រអប់ធំៗ ដែលបន្សល់ទុកនៅក្នុងវង់ល្បែងខាងលើនោះ ។ ដោយឡែកក្រុមអ្នកលេងល្បែងប្រមាណ៣០ទៅ៤០នាក់បានរត់គេចខ្លួនបាត់ស្រមោលអស់ហាក់បីដូចជាដឹងមុន ។
ចំពោះសម្ភារដកហូត និងមនុស្សដែលត្រូវឃាត់ខ្លួន សមត្ថកិច្ចនាំយកមករក្សាទុកនៅទីបញ្ជាការកងរាជអាវុធហត្ថខណ្ឌមានជ័យ ដើម្បីចាត់ការបន្តតាមច្បាប់ ៕
ចែករំលែកព័តមាននេះ