មេដឹកនាំគណបក្សកំពុងកាន់អំណាចថ្នាក់កណ្តាលប៉ាគីស្ថានមួយរូប ត្រូវបានបាញ់ស្លាប់ដោយខ្មាន់កាំភ្លើងមិនស្គាល់អត្តសញ្ញាណម្នាក់ នៅក្នុងទីក្រុងកំពង់ផែការ៉ាជី កាលពីល្ងាចថ្ងៃទី១៦ កក្កដា កន្លងមក ។ តាមសាក្សី និងបណ្តាញព័ត៌មានក្នុងស្រុកប៉ាគីស្ថានរាយការណ៍ថា មេដឹកនាំគណបក្សរូបនេះ លោក Amir Shah ត្រូវបានបាញ់ប្រហារនៅតំបន់ Gulistan Jauhar។ ក្រោយពីរងការបាញ់ប្រហារលោករងរបួសធ្ងន់ធ្ងរ ហើយត្រូវនាំយកទៅជួយសង្គ្រោះនៅមន្ទីរពេទ្យ ប៉ុន្តែដោយសារស្ថានភាពរបួសធ្ងន់ធ្ងរពេក មិនអាចជួយសង្គ្រោះបានឡើយ បណ្តាលឱ្យលោកស្លាប់នៅមន្ទីរពេទ្យ។
ទូរទស្សន៍ Dawn របស់ប៉ាគីស្ថានរាយការណ៍ថា លោក Amir រងការបាញ់ប្រហារនៅពេលលោកកំពុងធ្វើដំណើរតាមរថយន្ត។ ពុំទាន់មានក្រុមណាមួយអះអាងទទួលខុសត្រូវចំពោះអំពើបាញ់ប្រហារនេះនៅឡើយទេ។ ប៉ូលិសក្រុងការ៉ាជីវនិយាយថា ពេលនេះពួកគេកំពុងស៊ើបអង្កេតរកមូលហេតុនៅពីក្រោយការបាញ់ប្រហារនេះ ហើយប៉ូលិសសង្ស័យថា ការបាញ់ប្រហារនេះជាការវាយប្រហាររៀបចំទុកជាមុន ៕
ចែករំលែកព័តមាននេះ