រាជធានីភ្នំពេញ ៖ អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី សូមធ្វើការបដិសេធចោលទាំងស្រុងនូវការលើកឡើងរបស់លោកនាយករដ្ឋមន្ត្រីថៃ អាប់ភីស៊ីត វ៉េចាជីវ៉ា ដែលបានប្រឌិតជាថ្មីម្តងទៀតនូវការភូតកុហក បំភ័ន្ត ប្រាសចាកពីការពិត តាមរយៈការចុះផ្សាយក្នុងបណ្តាញព័ត៌មានថៃ ASTV Manager Online និង Post Today នៅថ្ងៃទី២៥ មិថុនា ២០១១ នេះ ដោយនិយាយបំផ្លើសថា «សម្តេចតេជោហ៊ុន សែន នឹងដកខ្លួនចេញពីភាគីសមាជិកគណៈកម្មាធិការបេតិកភណ្ឌពិភពលោក»។
១-តាមការពិតការនិយាយបំភ័ន្ត ភូតកុហក និងមួលបង្កាច់ ប្រឌិតខុសការពិតរបស់នាយករដ្ឋមន្ត្រីថៃ អាប់ភីស៊ីត វ៉េចាជីវ៉ា និងសហការីរបស់ខ្លួន បានកើតមានឡើងតាំងពីមុនកិច្ចប្រជុំរបស់គណៈកម្មាធិការបេតិកភណ្ឌពិភពលោក លើកទី៣៥ បាននិងកំពុងប្រព្រឹត្តទៅនៅទីក្រុងប៉ារីស ប្រទេសបារាំង ហើយជាពិសេស ក្នុងរយៈពេល២-៣ថ្ងៃចុងក្រោយនេះ ក្រុមសម្ព័ន្ធមិត្តអាវលឿង និងក្រុមរបស់លោកអាប់ភីស៊ីត បានធ្វើការគំរាមកាន់តែខ្លាំងឡើងៗ ក្នុងការដកខ្លួនចេញពីសមាជិករបស់គណៈកម្មាធិការបេតិកភណ្ឌពិភពលោក ដូចដែលមានការចុះផ្សាយជាបន្តបន្ទាប់តាមប្រព័ន្ធផ្សព្វផ្សាយព័ត៌មានរបស់ថៃ ទាំងភាសាថៃ និងភាសាអង់គ្លេស។
ជាក់ស្តែង សារព័ត៌មានបាងកកប៉ុស្តិ៍ចុះផ្សាយថ្ងៃទី២៥ មិថុនា ២០១១ បានស្រង់សម្តីរបស់លោកស៊ូវិទ ឃុនគិតទិ រដ្ឋមន្ត្រីក្រសួងធនធានធម្មជាតិ និងបរិស្ថានថៃ បាននិយាយថា «គាត់បានជូនដំណឹងទៅលោក Kishore Rao នាយកមជ្ឈមណ្ឌលបេតិកភណ្ឌពិភពលោកហើយថា ប្រសិនបើលោក Rao ទទូចធ្វើដូច្នេះទៀត ប្រទេសថៃមិនមានជម្រើសទេ ដូច្នេះត្រូវតែដកខ្លួនចេញពីសមាជិកភាពរបស់អនុសញ្ញាបេតិកភណ្ឌពិភពលោករបស់អង្គការយូណេស្កូ»។ លោកស៊ូវីទ បានបន្តថា គាត់បានប្រាប់នាយករដ្ឋមន្ត្រីអាប់ភីស៊ីត ហើយអំពីស្ថានភាពនេះ ហើយនាយករដ្ឋមន្ត្រីបានផ្តល់សិទ្ធិឱ្យគាត់ធ្វើការសម្រេចចិត្ត ។ លោកស៊ូវិទ បានបញ្ជាក់ថា «សិទ្ធិលើថា តើត្រូវដកខ្លួនចេញ ឬអត់ នឹងទុកឱ្យគាត់ជាអ្នកសម្រេច…គណៈរដ្ឋមន្ត្រីបានផ្តល់សិទ្ធិឱ្យគាត់ធ្វើការសម្រេចចិត្ត»។
២-សាធារណមតិជាតិ និងអន្តរជាតិ នៅចងចាំបានយ៉ាងច្បាស់ថា ការគំរាមកំហែងលាលែងចេញពីសមាជិកភាពរបស់គណៈកម្មាធិការបេតិកភណ្ឌពិភពលោកគឺត្រូវបានរដ្ឋាភិបាលថៃខ្លួនឯងផ្ទាល់ ដោយមានការជំរុញពីក្រុមសម្ព័ន្ធមិត្តអាវលឿង ធ្លាប់បានគំរាមកំហែងដកខ្លួនចេញពីអង្គការនេះ តាំងពីសម័យប្រជុំលើកទី៣៤ នៅទីក្រុងប្រេស៊ីលីយ៉ាមកម៉្លេះ ក្រោមលេសថា «ប្រសិនបើសេចក្តីព្រាងនៃកិច្ចព្រមព្រៀងស្តីពីផែនការគ្រប់គ្រងប្រាសាទព្រះវិហារ ត្រូវបានគេដាក់ទៅឱ្យគណៈកម្មាធិការបេតិកភណ្ឌពិភពលោកធ្វើការពិចារណា និងសម្រេចនោះ»។
៣-អង្គភាពព័ត៌មាន និងប្រតិកម្មរហ័សនៃ ទីស្តីការគណៈរដ្ឋមន្ត្រី សូមជម្រាបជូនសាធារណមតិជាតិ និងអន្តរជាតិឱ្យបានជ្រាបថា សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មិនត្រឹមតែពុំបានមានប្រសាសន៍អំពីរឿងដកខ្លួនចេញពីសមាជិកគណៈកម្មាធិការបេតិកភណ្ឌពិភពលោកប៉ុណ្ណោះទេ សូម្បីតែការគិតក៏សម្តេចមិនដែលបានគិតដល់បញ្ហានេះដែរ ។ ប៉ុន្តែផ្ទុយទៅវិញ ជាក់ស្តែងនៅថ្ងៃទី២៥ មិថុនា ២០១១ គឺថៃខ្លួនឯងទេ ដែលបានប្រឆាំង និងប្រកាសដកខ្លួនជាផ្លូវការចេញពីសមាជិកអនុសញ្ញារបស់គណៈកម្មាធិការបេតិកភណ្ឌពិភពលោក នៅក្នុងកិច្ចប្រជុំលើកទី៣៥ ដែលបាននិងកំពុងប្រព្រឹត្តទៅ។ អ្វីដែលធ្ងន់ធ្ងរជាងនេះទៀត តាមរយៈ Twitter របស់ខ្លួន ដែលបានស្រង់សម្តីចុះផ្សាយក្នុងសារព័ត៌មាន Thai recent ថ្ងៃទី២៥ មិថុនា ២០១១ វេលាម៉ោង២៣និង២០នាទី លោកស៊ូវិទ ឃុនគិតទិ បានធ្វើការវាយប្រហារដោយចំៗទៅលើគណៈកម្មាធិការបេតិកភណ្ឌពិភពលោក ដោយបាននិយាយថា «គួរឱ្យស្តាយដែលស្ថាប័នអន្តរជាតិមានភារកិច្ចលើកស្ទួយការសិក្សា និងវប្បធម៌ បានភ្លេចមុខនាទីរបស់ខ្លួនឯង រហូតដល់ធ្វើឱ្យកើតជាជម្លោះនៅក្នុងភាគីសមាជិក ។ ក្នុងអង្គប្រជុំដាក់របៀបវារៈចូល ហើយខ្ញុំគ្មានផ្លូវជ្រើសរើសទេ មានតែត្រូវដកខ្លួន»។
៤-កម្ពុជាជាប្រទេសប្រកបដោយអរិយធម៌ និងវប្បធម៌ដ៏ខ្ពង់ខ្ពស់ ដែលមានប្រាង្គប្រាសាទរាប់ពាន់ប្រាសាទ ដែលត្រូវការគាំទ្រពីសហគមន៍អន្តរជាតិ ដើម្បីការពារ អភិរក្ស និងស្តារឡើងវិញនូវប្រាង្គប្រាសាទទាំងនោះ ។ ជាក់ស្តែងនៅពេលដែលកម្ពុជាបានចូលជាសមាជិកអនុសញ្ញាស្តីពីកិច្ចការពារបេតិកភណ្ឌវប្បធម៌ និងធម្មជាតិពិភពលោកឆ្នាំ១៩៧២ និងអនុសញ្ញាក្រុងឡាអេ ស្តីពីការការពារសម្បត្តិក្នុងគ្រាមានជម្លោះប្រដាប់អាវុធឆ្នាំ១៩៤៥ កម្ពុជាទទួលបានការគាំទ្រយ៉ាងខ្លាំងផ្នែកការអភិរក្ស និងការការពារសម្បត្តិវប្បធម៌តាមរយៈគណៈកម្មការសម្របសម្រួលអន្តរជាតិ (ICC Angkor) ស្តីពីការអភិវឌ្ឍន៍ប្រកបដោយចីរភាព កុំឱ្យមានផលប៉ះពាល់អវិជ្ជមានទៅដល់បេតិកភណ្ឌជាតិ និងសម្រាប់មនុស្សជាតិទាំងមូល ។
៥-ក្នុងសភាពការណ៍ដ៏តឹងតែងចំពោះមុខនេះ ដែលកម្ពុជាកំពុងតែប្រឈមមុខនឹងការឈ្លានពានដោយកម្លាំងយោធារបស់ថៃមកលើបូរណភាពទឹកដីកម្ពុជា ជាពិសេសការបាញ់បំផ្លាញប្រាសាទព្រះវិហារ ដែលជាសម្បត្តិបេតិកភណ្ឌពិភពលោក កម្ពុជាមានតម្រូវការជាចាំបាច់នូវការគាំទ្រពីសហគមន៍អន្តរជាតិ ជាពិសេស អង្គការយូណេស្កូដើម្បីការពារ និងអភិរក្ស សម្បត្តិបេតិកភណ្ឌពិភពលោក ដូចដែលមានចែងក្នុងអនុសញ្ញាក្រុងឡាអេ ឆ្នាំ១៩៥៤។
ជារួមកម្ពុជាមានការសោកស្តាយយ៉ាងខ្លាំងចំពោះឥរិយាបថអវិជ្ជមាន ការបន្តភូតកុហក ប្រឌិតព័ត៌មាន ដើម្បីបំភ័ន្ត និងបំពុលសាធារណមតិរបស់លោកនាយករដ្ឋមន្ត្រីថៃចាំផ្ទះ អាប់ភីស៊ីត វ៉េចាជីវ៉ា ដែលនិយាយដោយគ្មានការទទួលខុសត្រូវបែបនេះ ។ អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីយល់ឃើញថា លោកអាប់ភីស៊ីត វ៉េចាជីវ៉ា គួរតែទៅរៀនសូត្របន្ថែមដើម្បីឱ្យចេះធ្វើជានាយករដ្ឋមន្ត្រី ៕
ចែករំលែកព័តមាននេះ