ខេត្តព្រះសីហនុ ៖ បុរសកើតជំងឺទាចទឹកបានផុតរលត់ជីវិតហើយកាលពីវេលាម៉ោង១២អាធាត្រថ្ងៃទី២៤ ឈានចូលថ្ងៃទី២៥ មិថុនា គឺ ស្លាប់នៅលំនៅឋានរបស់គាត់ដោយសារអាការជំងឺធ្វើទុក្ខខ្លាំងពេក ជាពិសេសឡើងស្លេស្មស្ទះបំពង់.ក ដកដង្ហើមមិនរួច ។ ការស្លាប់របស់គាត់គឺកើតឡើងក្រោយពេលទទួលអំណោយកាកបាទក្រហមរបស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន បានមួយថ្ងៃ ហើយនៅថ្ងៃធ្វើបុណ្យសពនោះដែរ ខាងកាកបាទក្រហមខេត្តព្រះសីហនុ បានឧបត្ថម្ភប្រាក់៥០ម៉ឺនរៀលទៀត ដើម្បីជួយចាត់ចែងកង្វះខាតផ្សេងៗ។
គួររំឭកថា លោកលូ គឹមឈន់ ប្រធានសាខាកាកបាទក្រហមកម្ពុជា ខេត្តព្រះសីហនុ និងជាប្រធានអគ្គនាយកកំពង់ផែស្វយ័ត ខេត្តព្រះសីហនុ រួមដំណើរដោយលោកស្រី ប្រាក់ ច័ន្ទសុខា អភិបាលរងខេត្ត លោកឧកញ៉ា ឡាវ កាង លោកទិត្យ វុទ្ធី អភិបាលស្រុកព្រៃនប់ លោកឈុន សារុំ អនុប្រធានសភាពាណិជ្ជកម្មខេត្តព្រះសីហនុ និងជាតំណាងសារព័ត៌មានកោះសន្តិភាព និងលោកចៅសង្កាត់ ចៅសង្កាត់រង លោកមេភូមិបានពាំនាំយកអំណោយជាសម្ភារប្រើប្រាស់ និងថវិកាចំនួន១.៥០០.០០០រៀល របស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ទៅជូនដល់បុរសកើតជំងឺទាចទឹកឈ្មោះឃី ណែត អាយុ៣៤ឆ្នាំ រស់នៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ កាលពីព្រឹកថ្ងៃទី២៣ មិថុនា ។ នេះគឺជាការផ្តល់អំណោយថ្មីមួយឈុតទៀតក្នុងការជួយស្រោចស្រង់ដល់ជីវិតគ្រួសារក្រីក្រតោកយ៉ាកដែលមានមុខរបរកាប់អុសលក់បានប្រាក់បន្តិចបន្តួចចិញ្ចឹមឆ្នាំងសឹងតែមិនបាន ហើយត្រូវប្រឈមមុខនឹងកូនប្រុសកើតជំងឺទាចទឹករហូតហូរទឹកចេញតាមរោមជើង ។
កាយវិការដ៏សប្បុរសធម៌គួរឱ្យគោរពរបស់លោកជំទាវកិត្តិព្រឹទ្ធបណ្ឌិតពិតជាគុណូបការៈដ៏ធំធេងសម្រាប់ជីវិតឃី ណែត ដែលរស់រង់ចាំតែសេចក្តីស្លាប់។ ការជួយឈឺឆ្អាលពីសំណាក់លោកជំទាវកិត្តិព្រឹទ្ធបណ្ឌិត បានបង្ហាញយ៉ាងច្បាស់ថាលោកជំទាវពិតជាអ្នកម្តាយសង្គ្រោះពិតៗពេលប្រជាពលរដ្ឋជួបការលំបាក ។ឆ្លើយតបនូវទឹកចិត្តសប្បុរសធម៌របស់លោកជំទាវកិត្តិព្រឹទ្ធបណ្ឌិត និងអស់លោកជាសប្បុរសជន អ្នកស្រីភូ មុំ និងលោកឃី ឈុច ជាម្តាយ និងឪពុក បានលើកម្រាមដៃដប់ថ្លែងអំណរគុណដោយទឹកចិត្តត្រេកអរជាពន្លឹកជូនចំពោះលោកជំទាវជាទីគោរព និងបានបួងសួងដល់បុណ្យបារមីរក្សាលោកទាំងមូល ឱ្យតាមជួយថែរក្សាលោកជំទាវកិត្តិព្រឹទ្ធបណ្ឌិត និងអស់លោក លោកស្រី ដែលជាសប្បុរសជនឱ្យជួបតែពុទ្ធពរទាំងបួនប្រការ និងជួបតែសេចក្តីចម្រុងចម្រើនតរៀងទៅ ៕
ចែករំលែកព័តមាននេះ