ឧស្សាហកម្មគ្រាប់ពូជ គឺជាមូលដ្ឋានគ្រឹះសម្រាប់ប្រទេសកម្ពុជា ក្នុងការអភិវឌ្ឍន៍ទីផ្សារស្រូវ និងការផ្គត់ផ្គង់បន្លែ និងមុខដំណាំផ្សេងៗទៀតប្រកបដោយគុណភាព ។ បច្ចុប្បន្ន ពូជស្រូវ៩០ភាគរយនៅក្នុងប្រទេសត្រូវបានកសិកររក្សាទុកដោយកសិករខ្លួនឯងសម្រាប់ប្រើប្រាស់ ហើយមានតែ១០ភាគរយប៉ុណ្ណោះ ដែលត្រូវបានគេទិញពីប្រភពផ្សេងៗ
ឧស្សាហកម្មគ្រាប់ពូជ គឺជាមូលដ្ឋានគ្រឹះសម្រាប់ប្រទេសកម្ពុជា ក្នុងការអភិវឌ្ឍន៍ទីផ្សារស្រូវ និងការផ្គត់ផ្គង់បន្លែ និងមុខដំណាំផ្សេងៗទៀតប្រកបដោយគុណភាព ។ បច្ចុប្បន្ន ពូជស្រូវ៩០ភាគរយនៅក្នុងប្រទេសត្រូវបានកសិកររក្សាទុកដោយកសិករខ្លួនឯងសម្រាប់ប្រើប្រាស់ ហើយមានតែ១០ភាគរយប៉ុណ្ណោះ ដែលត្រូវបានគេទិញពីប្រភពផ្សេងៗ ។ ការផ្លាស់ប្តូរទម្លាប់របស់កសិករឱ្យចេះធ្វើការផ្លាស់ប្តូរពូជចាស់ចេញជំនួសដោយពូជថ្មីៗ ប្រកបដោយគុណភាព អាចជួយបង្កើនទិន្នផលស្រូវ ក៏ដូចជាអនុញ្ញាតឱ្យប្រទេសកម្ពុជាមានទីផ្សារអង្ករប្រកបដោយគុណភាព ។
សិក្ខាសាលាអំពីឧស្សាហកម្មគ្រាប់ពូជ ត្រូវបានរៀបចំធ្វើឡើងនៅថ្ងៃទី១១ មីនា ឆ្នាំ២០១១ នៅសណ្ឋាគារកាំបូឌីយ៉ាណា ក្រោមអធិបតីភាពលោកសូខន ឫទ្ធីគុណ អគ្គនាយកនៃអគ្គនាយកដ្ឋានកសិកម្មរបស់ក្រសួងកសិកម្ម រុក្ខាប្រមាញ់ និងនេសាទ លោកស្រី Léa Jenin មន្ត្រីកម្មវិធីស្បៀងអាហារសហភាពអឺរ៉ុប លោកស្រ៊ុន ដារិទ្ធ អគ្គនាយករងក្រុមប្រឹក្សាអភិវឌ្ឍន៍កសិកម្មកម្ពុជា និងជាសមាជិកគណៈកម្មការគ្រប់គ្រងកម្មវិធីស្បៀងអាហារសហភាពអឺរ៉ុប លោក Tim K.Ekin ប្រធានគ្រប់គ្រងកម្មវិធីស្បៀងអាហាររបស់សហភាពអឺរ៉ុប ។ គោលបំណងនៃសិក្ខាសាលានេះ គឺប្រមូលគំនិតបន្ថែមពីអ្នកពាក់ព័ន្ធ និងពិនិត្យមើលឡើងវិញនូវអនុសាសន៍ដែលបានលើកឡើងក្នុងសិក្ខាសាលាលើកមុន ដោយលោក Brian Hare ទីប្រឹក្សាឧស្សាហកម្មគ្រាប់ពូជ ។ សិក្ខាសាលានេះយកចិត្តទុកដាក់ជាចំបងទៅលើអ្នកពាក់ព័ន្ធនៅក្នុងឧស្សាហកម្មគ្រាប់ពូជ អង្គការជាអ្នកផ្តល់ជំនួយ ទីភ្នាក់ងារអភិវឌ្ឍន៍ ព្រមទាំងយកចិត្តទុកដាក់ទៅលើផ្នែកជាអាទិភាពដែលត្រូវធ្វើការអភិវឌ្ឍន៍ជាបន្តទៅទៀត ។
សិក្ខាសាលាបានពិភាក្សាទៅលើការអភិវឌ្ឍន៍ពូជស្រូវ ផលិតកម្ម និងទីផ្សារស្រូវពូជ ការអភិវឌ្ឍន៍ពូជបន្លែ និងការបណ្តុះបណ្តាល ព្រមទាំងយន្តការសម្របសម្រួលឧស្សាហកម្មគ្រាប់ពូជ ។ លទ្ធផលសំខាន់ដែលទទួលបានពីអង្គសិក្ខាសាលានេះ បានបង្ហាញឱ្យឃើញថា មានកង្វះខាតផ្នែកថវិកា និងធនធានមនុស្ស ព្រមទាំងកង្វះខាតនូវមធ្យោបាយគាំទ្រដល់ផលិតកម្ម និងការធានាគុណភាពក្នុងការអភិវឌ្ឍន៍ពូជថ្មីៗ ។ អ្នកផលិតមិនទាន់យល់ច្បាស់ពីតម្រូវការទីផ្សារស្រូវ ហើយជាទូទៅការផលិតដោយប្រើប្រាស់ពូជចម្រុះផ្សេងៗគ្នា ។ ផលិតកម្មពូជបន្លែនៅក្នុងស្រុកមានបរិមាណកំណត់ ហើយមានការប្រកួតប្រជែងជាមួយពូជនាំចូល ។ ប្រព័ន្ធត្រួតពិនិត្យសម្រាប់ពូជនាំចូលមិនទាន់មានភាពច្បាស់លាស់នៅឡើយ រួមទាំងបែបបទនៃការទទួលស្គាល់ ។ យន្តការសម្របសម្រួលឧស្សាហកម្មពូជគួរត្រូវបានគេបង្កើតឡើង ហើយមានដំណើរការដើម្បីគាំទ្រដល់ផ្នែកកសិកម្ម និងគោលនយោបាយសំខាន់ៗ ។
សិក្ខាសាលានេះ ក៏បានផ្តល់អនុសាសន៍លើតម្រូវការវិនិយោគឱ្យបានកាន់តែច្រើនទៅលើកម្មវិធីអភិវឌ្ឍន៍ពូជស្រូវមានលក្ខណៈពាណិជ្ជកម្ម ដើម្បីឆ្លើយតបទៅនឹងតម្រូវការឧស្សាហកម្មពូជស្រូវនៅក្នុងប្រទេសកម្ពុជា ទាំងពេលបច្ចុប្បន្ន និងនាពេលអនាគត ។ ការបន្ថែមថវិកាដល់ CARDI ឬការផ្តល់ទុនរួមគ្នារវាងស្ថាប័នសាធារណៈជាមួយនឹងអ្នកវិនិយោគឯកជន អាចជាជំរើសដ៏ល្អ ។ CARDI ដើរតួនាទីសំខាន់នៅក្នុងការអភិវឌ្ឍន៍ និងថែរក្សាពូជបង្កាត់ និងពូជគ្រឹះដែលបានបញ្ចេញឱ្យប្រើប្រាស់ ។ ក្រុមហ៊ុនអេគីបសីុដ ដែលជាអ្នកផលិតពូជជាលក្ខណៈពាណិជ្ជកម្មធំមួយ គួរត្រូវបានគេគាំទ្រ ដើម្បីពង្រីកផលិតកម្មពូជគ្រឹះ និងពូជពាណិជ្ជកម្ម ដើម្បីផ្តល់សេវាឱ្យកាន់តែប្រសើរជាងមុននូវតម្រូវការកាន់តែកើនឡើងនូវពូជស្រូវដែលមានគុណភាពខ្ពស់ ។
ពូជស្រូវដែលមានលក្ខណៈជាពូជស្រូវពាណិជ្ជកម្ម ត្រូវមានបង្គំលក្ខណៈពេញលេញដែលឆ្លើយតបទៅនឹងតម្រូវការរបស់អ្នកផលិត និងអ្នកយកវាទៅធ្វើបន្ត ។ ពូជថ្មីៗត្រូវឆ្លើយតបទៅនឹងតម្រូវការរបស់កសិករ អ្នកជំនួញ ម្ចាស់រោងម៉ាស៊ីនកិនស្រូវ និងអ្នកនាំចេញ។ នេះបើតាមប្រសាសន៍របស់លោក Brian Hare ទីប្រឹក្សាអភិវឌ្ឍន៍ឧស្សាហកម្មគ្រាប់ពូជរបស់កម្មវិធីស្បៀងអាហាររបស់សហភាពអឺរ៉ុប ។ កម្មវិធីស្បៀងអាហារសហភាពអឺរ៉ុបបានទិញគ្រាប់ពូជប្រកបដោយគុណភាពពីក្រុមហ៊ុនអេគីបស៊ីដ ហើយបានចែកចាយទៅដល់កសិករជាង៤៨.០០០គ្រួសារក្នុងខេត្តចំនួន៩ ។
គុណភាពពូជស្រូវផលិតចេញពីក្រុមហ៊ុននេះ មានគុណភាពខ្ពស់ (៩៨ភាគរយសុទ្ធក្នុងសំណើមអតិបរមា១៣ភាគរយ) ។ ការបញ្ជាក់គុណភាពពូជ ត្រូវតែឱ្យមានប្រសិទ្ធភាពទៅតាមតម្រូវការរបស់ទីផ្សារ ហើយត្រូវលើកទឹកចិត្តឱ្យមានការចូលរួមពីវិស័យឯកជនក្នុងការអភិវឌ្ឍន៍ឧស្សាហកម្មពូជ នេះបើតាមប្រសាសន៍របស់លោក Tim K.Ekin ប្រធានគ្រប់គ្រងកម្មវិធីស្បៀងអាហារសហភាពអឺរ៉ុប ៕
អត្ថបទបព្រឹត្តបត្រលេខ០៣ ខែឧសភា ឆ្នាំ២០១១ កម្មវិធីស្បៀងអាហាររបស់សហភាពអឺរ៉ុប
ចែករំលែកព័តមាននេះ