ខេត្តកំពង់ឆ្នាំង ៖ ស្រូវពូជជិត២តោនត្រូវលោកទូច ម៉ារីម អភិបាលខេត្តកំពង់ឆ្នាំង នាំយកទៅចែកជូនប្រជាពលរដ្ឋក្នុងស្រុកបរិបូណ៌កាលពីព្រឹកថ្ងៃទី១៥ មិថុនា ខណៈលោកអញ្ជើញចូលរួមក្នុងកម្មវិធីចាក់ថ្នាំវ៉ាក់សាំងការពារសត្វគោ ក្របី និងចែកពូជស្មៅ ។
លោកង៉ាន ណានី ប្រធានមន្ទីរកសិកម្មខេត្ត មានប្រសាសន៍ថា ពូជស្រូវដែលចែកជូនប្រជាពលរដ្ឋមកពីភូមិពេជចង្វា ភូមិមេលំ និងភូមិអញ្ចាញរូង មានចំនួន១.៧០០តោន ដែលជាពូជស្រូវសែនពិដោរ IR66 និងផ្ការំដួល ។ ស្រូវទាំងនេះមានតម្លៃខ្ពស់ក្នុងទីផ្សារ និងមានទិន្នផលខ្ពស់អាចជួយកាត់បន្ថយជីវភាពក្រីក្ររបស់ប្រជាពលរដ្ឋ។
លោកហ៊ុន លី មន្ត្រីការិយាល័យបសុព្យាបាលខេត្តនិយាយថា សត្វគោក្របីដែលយកមកចាក់ថ្នាំវ៉ាក់សាំងការពារនៅព្រឹកនេះ គឺមានចំនួន៣៦៥ក្បាល ក្នុងនោះសត្វគោមានចំនួន២០០ក្បាល ។ នេះគ្រាន់តែតួលេខចាក់មួយព្រឹកថ្ងៃទី១៥ មិថុនា ហើយបានបន្តចាក់នៅល្ងាចថ្ងៃដដែលទៀត ។
លោកទូច ម៉ារីម អភិបាលខេត្តកំពង់ឆ្នាំង មានប្រសាសន៍ទៅកាន់ប្រជា ពលរដ្ឋដែលបានចូលរួមចំនួន១៥០នាក់ថា លោកនាំពូជស្រូវ១៧០០គីឡូក្រាម និងពូជស្មៅច្រើនប្រភេទចែកជូនប្រជាពលរដ្ឋ រួមទាំងនាំមន្ត្រីពេទ្យមកជួយចាក់ថ្នាំវ៉ាក់សាំងការពារជំងឺសត្វ គោ ក្របី ទៀត ។ សូមបងប្អូនយកពូជស្មៅនេះដាំថែទាំ ដើម្បីចំណីសត្វគោ ក្របីរបស់ខ្លួន ។ ចំណែកពូជស្រូវ សូមបងប្អូនយកទៅធ្វើស្រែតាមបែបប្រពលវប្បកម្មដែលទទួលទិន្នផលខ្ពស់ ប៉ុន្តែចំណាយពូជតិច ។
លោកអភិបាលខេត្តបន្តថា យោងតាមរបាយការណ៍ក្រសួងកសិកម្មថា ការធ្វើស្រូវបែបប្រពលវប្បកម្ម គឺស្ទូងស្រូវ១ដើម និងជាជួរ គឺបានទិន្នផលខ្ពស់ជាងស្ទូងស្រូវ៥-៦ដើមដែលជាទម្លាប់ពីបុរាណកាលមក ។ លោកបានផ្តាំផ្ញើប្រជាពលរដ្ឋថា «រដូវធ្វើស្រែមកដល់ហើយសូមបងប្អូនរួសរាន់ភ្ជួររាស់ដកស្ទូងឱ្យទាន់រដូវចៀសវាងធ្វើស្រែផុតរដូវនាំឱ្យទិន្នផលទាប» ៕
ចែករំលែកព័តមាននេះ