ខេត្តព្រះសីហនុ ៖ រដូវវស្សាឈានចូលមកដល់មេឃបានបង្អុរទឹកភ្លៀងល្មមគ្រប់គ្រាន់ធ្វើឱ្យប្រជាកសិករស្រុកព្រៃនប់មានការសប្បាយចិត្តហើយនាំគ្នារួតរះចុះទៅទីស្រែរបស់ខ្លួនដើម្បីរៀបចំបង្កបង្កើនផលឱ្យទាន់រដូវ ។ យោងតាមរបាយការណ៍ពីសាលាស្រុកព្រៃនប់ ក៏ដូចជាពីការិយាល័យកសិកម្មស្រុក បានឱ្យដឹងថា
ខេត្តព្រះសីហនុ ៖ រដូវវស្សាឈានចូលមកដល់មេឃបានបង្អុរទឹកភ្លៀងល្មមគ្រប់គ្រាន់ធ្វើឱ្យប្រជាកសិករស្រុកព្រៃនប់មានការសប្បាយចិត្តហើយនាំគ្នារួតរះចុះទៅទីស្រែរបស់ខ្លួនដើម្បីរៀបចំបង្កបង្កើនផលឱ្យទាន់រដូវ ។ យោងតាមរបាយការណ៍ពីសាលាស្រុកព្រៃនប់ ក៏ដូចជាពីការិយាល័យកសិកម្មស្រុក បានឱ្យដឹងថា តាមផែនការបង្កបង្កើនផលសម្រាប់ឆ្នាំ២០១១ នេះ គឺមានផ្ទៃដីចំនួន១២.៦៥០ហិកតា ស្មើនឹងទិសដៅផែនការឆ្នាំ២០១០ កន្លងទៅដែរ តែកាលពីឆ្នាំ២០១០ ប្រជាកសិករបានអនុវត្តលើសផែនការចំនួន៣០ហិកតា ។
របាយការណ៍ដដែលបានឱ្យដឹងទៀតថា សម្រាប់ឆ្នាំនេះគិតត្រឹមថ្ងៃទី៩ មិថុនា ប្រជាកសិករទូទាំងស្រុកអនុវត្តការភ្ជួរដាស់ដីស្រែបាន២.១៦០ហិកតា សាបបាន៧៤០ហិកតា ក្នុងនោះធ្វើស្រូវស្រាល៤៦០ហិកតា និងស្រូវកណ្តាល២៨០ហិកតា ។ ដោយឡែកស្រែពង្រោះរបស់កសិករមានចំនួន១២៧ហិកតា លើសឆ្នាំកន្លងទៅ ដែលកាលពីឆ្នាំទៅមានការខ្វះខាតកម្លាំងពលកម្ម គ្មានអ្នកស៊ីឈ្នួល ព្រោះចេញទៅធ្វើកម្មការិនីរោងចក្រ និងកម្មករដូងប្រេង ហើយបើមានអ្នកស៊ីឈ្នួលក៏ក្នុងតម្លៃខ្ពស់ដែរ ។
ទាក់ទិននឹងរឿងនេះ លោកទិត វុទ្ធី អភិបាលស្រុកព្រៃនប់បានឱ្យដឹងថា ឆ្នាំនេះលោកមានជំនឿថា ប្រជាកសិករទូទាំងស្រុក នឹងបង្កបង្កើនផលបានលើសឆ្នាំកន្លងទៅ ពីព្រោះក្នុងឆ្នាំនេះលោកសម្លឹងឃើញអាកាសធាតុអំណោយផលផ្តល់ទឹកភ្លៀងគ្រប់គ្រាន់ ហើយកាលពីចុងឆ្នាំកន្លងទៅ បងប្អូនប្រជាកសិករទាំងអស់ប្រមូលផលបានច្រើន ហើយសល់ពីការទុកហូបពួកគាត់បានលក់ទទួលបានកំរៃមកផ្គត់ផ្គង់ជីវភាពគ្រួសារបានគ្រប់គ្រាន់ ។
ម្យ៉ាងវិញទៀត ក្រុមការងារក៏បានបំផុសពីផលប្រយោជន៍ដែលពួកគាត់ទទួលបានពីដំណាំស្រូវសម្រាប់ផ្គត់ផ្គង់ដល់ការហូបចុកក្នុងគ្រួសារ និងលក់បានប្រាក់ក្រាស់ក្រែលសម្រាប់យកមកបង្កើតមុខរបរផ្សេងៗទៀត ។ សូមបញ្ជាក់ថា ប្រជាកសិករខេត្តព្រះសីហនុ ដែលប្រកបរបរកសិកម្មមានចំនួន៦៣%នៃចំនួនប្រជាពលរដ្ឋទាំងអស់៕
ចែករំលែកព័តមាននេះ