ទ្រព្យខ្មែរ
(បទព្រហ្មគីតិ)
-ខ្មែរកើតពីយូរលង់ ខ្មែរពូជពង្សគង់រដ្ឋា
ខ្មែរឆើតមានប្រាង្គប្រា ដៃដូនតាទុកទ្រព្យា ។
-កែច្នៃក្បាច់ចម្លាក់ ដាដាប់ឆ្លាក់ស្រស់សោភា
ថ្មដាក់ត្រួតលើគ្នា ឱ្យខ្មែរជាសួគ៌ាឋាន ។
-ស្រស់ឆើតប្រាង្គប្រាខ្មែរ នៅតាមផ្តែរយ៉ាងចំណាន
មានស្រីលក្ខណ៍កល្យាណ បានឃើញបានសែនមេត្រី ។
-ក្បាច់ក្បូរផ្កាភ្ញីល្អ ដាដាប់ថ្មស្រស់ប្រិមប្រិយ
រាំរេក្បាច់សិរី ក្បាច់ល្បាញល្បីដទៃទៀត ។
-ទាក់ភ្នែកដីជាប់ប្រាង្គ យ៉ាងស្រស់យ៉ាងអមធម្មជាតិ
ប្រាង្គលេចឆើតព្រោងព្រាត ព្រឹក្សាវាតរំលេចប្រាង្គ ។
-ទ្រព្យខ្មែរបេះដូងខ្មែរ ខ្មែរថួនថែទ្រព្យគ្រប់យ៉ាង
កេរខ្មែរបានកសាង ជាតឹកតាងខ្មែរសួគ៌ា ។
-ទ្រព្យខ្មែរលោកាល្បី ខ្មែរមានដីព្រហ្មវិហារ
ភ័ក្ត្រស្រស់ថែការពារ រាស្ត្រប្រជាសុខសាន្តត្រាណ ។
(និពន្ធដោយលោក ទិល ចាន់លីន)
ចែករំលែកព័តមាននេះ