មានការប៉ះទង្គិចគ្នាជាថ្មីទៀតនៅប្រទេសស៊ីរី រវាងកងកម្លាំងសន្តិសុខ និងហ្វូងបាតុករប្រឆាំងរដ្ឋាភិបាល កាលពីថ្ងៃទី២៨ ឧសភា កន្លងមក បណ្តាលឱ្យស្លាប់បាតុករ១៣នាក់ ។ តាមអ្នករៀបចំធ្វើបាតុកម្មឱ្យដឹងថា ការប៉ះទង្គិចគ្នាលើកចុងក្រោយនេះកើតឡើងនៅតំបន់ភាគខាងត្បូងប្រទេស ដោយកងកម្លាំងសន្តិសុខបាញ់រះលើហ្វូងបាតុករ ។
ការប៉ះទង្គិចគ្នានេះកើតឡើងនៅពេលហ្វូងបាតុករចេញធ្វើបាតុកម្មនៅតាមផ្លូវក្នុងទីក្រុង Dael ដើម្បីគាំទ្រយោធាឱ្យបំបែកចេញពីកងកម្លាំងសន្តិសុខ ។ ក្នុងអំឡុងពេលនោះ បាតុករ៤នាក់ត្រូវបានបាញ់ស្លាប់ និង៣នាក់ទៀតត្រូវបាញ់ស្លាប់នៅតំបន់ជាយក្រុងដាម៉ាស់ ។
នៅប្រទេសស៊ីរីកើតមានការធ្វើបាតុកម្មចាប់តាំងពីខែមីនា មកប្រឆាំងនឹងការគាបសង្កត់ ផ្នែកនយោបាយ ញ៉ាំងឱ្យកងកម្លាំងសន្តិសុខបង្ក្រាបយ៉ាងសាហាវលើក្រុមបាតុករ។ ហើយរដ្ឋាភិបាលប្រទេសនេះបានចេញបញ្ជាឱ្យចាប់ខ្លួនបាតុករជាច្រើនពាន់នាក់ ធ្វើឱ្យមានការរិះគន់យ៉ាងខ្លាំង ។ តាមក្រុមសិទ្ធិមនុស្សប្រចាំប្រទេសស៊ីរីថា មនុស្ស៨៣០នាក់ បានស្លាប់បាត់បង់ជីវិតក្នុងអំឡុងពេលនៃការធ្វើបាតុកម្មនេះ ៕
ចែករំលែកព័តមាននេះ