រាជធានីភ្នំពេញ ៖ នៅសាលាខណ្ឌមានជ័យនាព្រឹកថ្ងៃទី២២ តុលា បានប្រកាសធ្វើសមាហរណកម្ម និងរៀបចំមុខតំណែងរបស់មន្ត្រីរាជការនៅក្នុងរចនាសម្ព័ន្ធថ្មី។ ពិធីនេះក្រោមអធិបតីភាព លោកអែម សុខលាង ប្រធានក្រុមប្រឹក្សាខណ្ឌ និងលោកគួច ចំរើន អភិបាលនៃគណៈអភិបាលខណ្ឌមានជ័យ។ រចនាសម្ព័ន្ធថ្មីនេះប្រធានមន្ទីររបស់សាលាខណ្ឌគឺលោកឡុង ង៉ែត ជានាយករដ្ឋបាលខណ្ឌ និងមាននាយករងរដ្ឋបាល ព្រមទាំងប្រធានការិយាល័យ អនុប្រធានការិយាល័យ មន្ត្រីរាជការនៅក្រោមឱវាទសរុបចំនួន១៤៩រូប។
ក្នុងឱកាសនោះ លោកគួច ចំរើន មានប្រសាសន៍ថា មន្ត្រីទទួលមុខតំណែងទាំងអស់ត្រូវខិតខំបំពេញការងារទៅតាមតួនាទីរៀងៗខ្លួនឱ្យបានត្រឹមត្រូវ។ ក្រោមការយកចិត្តទុកដាក់របស់ក្រសួងមហាផ្ទៃ ជាពិសេសការគិតគូររបស់សម្តេចអគ្គមហាសេនាបតីតេជោ ហ៊ុន សែន គឺបានបង្កើតឱ្យមានជាក្រុមប្រឹក្សាឃុំ-សង្កាត់ ស្រុក ខណ្ឌ និងខេត្ត-ក្រុង ព្រមទាំងរាជធានីផងដែរដើម្បីបែងចែកភារកិច្ចការងារគ្នាធ្វើ។ លោកបញ្ជាក់ថា យើងមានច្បាប់ជាច្រើនដែលបានកំណត់ពីការងារទាំងអស់នេះដើម្បីអនុវត្តការងារជូនសង្គមជាតិនៅក្នុងរង្វង់រដ្ឋបាលមូលដ្ឋានរបស់ខ្លួនឱ្យបានជោគជ័យ។
លោកគួច ចំរើន មានប្រសាសន៍ថា ការចូលកាន់តំណែងនេះគឺធ្វើឱ្យស្របតាមកំណែទំរង់របស់រាជរដ្ឋាភិបាល ហើយក្រោមការបោះឆ្នោតដែលទទួលបាននូវក្រុមប្រឹក្សានៅថ្នាក់ក្រោមជាតិឃើញថា រាល់កិច្ចការទំនាក់ទំនងតាមផ្នែកនីមួយៗមានការប្រែប្រួល ដោយអនុវត្តឡើង ក្រោមទំរង់ច្បាប់ស្តីពីការគ្រប់គ្រងរដ្ឋបាលក្នុងមូលដ្ឋានថ្នាក់ក្រោមជាតិ៕
ចែករំលែកព័តមាននេះ