ខេត្តព្រះវិហារ ៖ នៅថ្ងៃទី១៣ ខែឧសភា ឆ្នាំ២០១១ លោកសុន គន្ធរ ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអគ្គនាយកធនាគារអភិវឌ្ឍន៍ជនបទ រួមជាមួយក្រុមការងារ បានអញ្ជើញទៅពិនិត្យគម្រោងអភិវឌ្ឍន៍វិស័យកសិកម្មរបស់សហគមន៍គ្រួសារកងទ័ពនៃបណ្តាភូមិអភិវឌ្ឍន៍ថ្មី
ខេត្តព្រះវិហារ ៖ នៅថ្ងៃទី១៣ ខែឧសភា ឆ្នាំ២០១១ លោកសុន គន្ធរ ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអគ្គនាយកធនាគារអភិវឌ្ឍន៍ជនបទ រួមជាមួយក្រុមការងារ បានអញ្ជើញទៅពិនិត្យគម្រោងអភិវឌ្ឍន៍វិស័យកសិកម្មរបស់សហគមន៍គ្រួសារកងទ័ពនៃបណ្តាភូមិអភិវឌ្ឍន៍ថ្មីដែលស្ថិតនៅក្នុងភូមិសាស្ត្រតំបន់ព្រះវិហារ ក្រោមការផ្តល់ឥណទានពីធនាគារអភិវឌ្ឍន៍ជនបទ។ ក្នុងឱកាសនោះ លោកសុន គន្ធរ បានជួបពិភាក្សាការងារជាមួយលោកនាយឧត្តមសេនីយ៍ គន់ គីម អគ្គមេបញ្ជាការរង និងជានាយសេនាធិការចម្រុះនៃកងយោធពលខេមរភូមិន្ទ លោកនាយឧត្តមសេនីយ៍ ជា តារា លោកឧត្តមសេនីយ៍ត្រី យឹម ពឹម មេបញ្ជាការកងពលតូចលេខ៨ ព្រមទាំងមេបញ្ជាការ មេបញ្ជាការរងនៃកងពលចំនួន៤ដែលកំពុងអនុវត្តគម្រោងនេះ រួមមានកងពលធំអន្តរាគមន៍លេខ៣ កងពលតូចអន្តរាគមន៍លេខ៧ កងពលតូចអន្តរាគមន៍លេខ៨ និងកងពលតូចអន្តរាគមន៍លេ៩។
លោកសុន គន្ធរ មានប្រសាសន៍ថា តាមអនុសាសន៍ណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងដោយមានការគាំទ្រយ៉ាងខ្លាំងពីលោកឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកប្រធានឧត្តមក្រុមប្រឹក្សាសេដ្ឋកិច្ចជាតិ ធនាគារអភិវឌ្ឍន៍ជនបទបានអនុវត្តនូវគម្រោងអភិវឌ្ឍន៍វិស័យកសិកម្មតំបន់ប្រាសាទព្រះវិហារដំណាក់កាលលើកទី១ ក្នុងការជំរុញផលិតផល និងការផ្តល់សេវាមីក្រូហិរញ្ញវត្ថុដល់ប្រជាពលរដ្ឋដែលជាសហគមន៍គ្រួសារកងទ័ពនៅតាមបណ្តាភូមិអភិវឌ្ឍន៍ថ្មីក្នុងតំបន់ប្រាសាទព្រះវិហារ។
គិតមកដល់ពេលនេះ ធនាគារអភិវឌ្ឍន៍ជនបទបានផ្តល់ឥណទានសរុបចំនួន៨៥០.០០០ដុល្លារ ដល់កងពលទាំង៤ ដែលឥណទានទាំងនេះចែកជា២ផ្នែក គឺទី១ ឥណទានវិនិយោគរយៈពេលវែងសម្រាប់ទិញគ្រឿងចក្រ ពូជ ដើម្បីអភិវឌ្ឍន៍វិស័យកសិកម្មនៅតាមកងពលនីមួយៗ ដូចជាការដាំដំឡូងមី និងដំណាំស្រូវលើផ្ទៃដីដែលសម្តេចនាយករដ្ឋមន្ត្រីបានផ្តល់ឱ្យកងទ័ព និងគ្រួសារកងទ័ព។ ទី២ គឺឥណទានផ្តល់ដល់សហគមន៍គ្រួសារកងទ័ពនៅតាមបណ្តាភូមិអភិវឌ្ឍន៍ថ្មីក្នុងតំបន់ប្រាសាទព្រះវិហារ សម្រាប់ធ្វើជាដើមទុនក្នុងការប្រកបរបរកសិកម្ម ដូចជាដំណាំស្រូវ ដំឡូង ពោត និងការចិញ្ចឹមសត្វ ព្រមទាំងការបង្កើតមុខជំនួញខ្នាតតូចដើម្បីទ្រទ្រង់ជីវភាពគ្រួសារ។ ក្នុងដំណាក់កាលលើកទី១ គ្រួសារកងទ័ពចំនួន១.០៨១គ្រួសារ ក្នុង១០សហគមន៍ទទួលបានទុនឥណទានពីគម្រោងនេះ ដោយក្នុង១គ្រួសារទទួលបានឥណទានចាប់ពី២០០ដុល្លារឡើងទៅ។
លោកនាយឧត្តមសេនីយ៍ គន់ គីម បានលើកឡើងអំពីសកម្មភាពការងារអភិវឌ្ឍន៍វិស័យកសិកម្មនៅតាមបណ្តាកងឯកភាពនីមួយៗ និងដំណាំស្រូវ។ កងពលនីមួយៗមានគម្រោងភ្ជួររាស់ដីជូនដល់គ្រួសារកងទ័ព និងធ្វើការផ្តល់ពូជដោយអនុគ្រោះឱ្យជំពាក់ពុំទាន់ឱ្យបង់ថ្លៃឈ្នួល និងថ្លៃពូជឡើយ ប៉ុន្តែតម្រូវឱ្យទូទាត់សងវិញនៅឆ្នាំទី២ ចាប់ពីការទទួលផលឆ្នាំទី១ តទៅ។ ធ្វើយ៉ាងនេះគឺបងប្អូនមានលទ្ធភាព និងពេលវេលាគ្រប់គ្រាន់ក្នុងការបង្វិលប្រាក់សងមកវិញ និងមួយទៀតគឺមានទុនសម្រាប់ការបង្កបង្កើនផលឆ្នាំបន្តបន្ទាប់ទៀត។
បន្ទាប់មកលោកសុន គន្ធរ លោកនាយឧត្តមសេនីយ៍ គន់ គីម លោកនាយឧត្តមសេនីយ៍ ជា តារា និងក្រុមការងារបានអញ្ជើញទៅពិនិត្យសកម្មភាពដាំដំឡូងរបស់បងប្អូនសហគមន៍គ្រួសារកងទ័ព។ សហគមន៍គ្រួសារកងទ័ពដែលកំពុងដាំដំឡូងបានសម្តែងនូវទឹកចិត្តសប្បាយរីករាយ និងសង្ឃឹមថា គម្រោងនេះនឹងផ្តល់នូវប្រាក់ចំណូលសម្រាប់ផ្គត់ផ្គង់ជីវភាពគ្រួសារ ជាងនេះទៅទៀតគឺធ្វើឱ្យគ្រួសារកងទ័ពដែលមករស់នៅជាមួយប្តីដែលជាកងទ័ពឈរជើងនៅទីនេះ មានមុខរបរ និងមានជីវភាពធូរធារ។ នេះគឺជាយុទ្ធសាស្ត្រដ៏ខ្ពង់ខ្ពស់របស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការការពារព្រំដែនប្រកបដោយចីរភាពយូរអង្វែង ដោយធ្វើយ៉ាងណាឱ្យគ្រួសារកងទ័ពនៅក្បែរកងទ័ពមានជីវភាពល្អ។
មេបញ្ជាការ មេបញ្ជាការរងដែលទទួលបន្ទុកការងារអភិវឌ្ឍន៍បានឱ្យដឹងថា មកទល់ពេលនេះកងពលធំអន្តរាគមន៍លេខ៣ ភ្ជួររាស់ដីបានសរុបចំនួន៣.០០០ហិកតា ដាំដំឡូងមីបានចំនួន១១៥ហិកតា និងកំពុងបន្តដាំចំនួន៣០០ហិកតាបន្ថែមទៀត និងត្រៀមដាំដំណាំស្រូវចំនួន២០០ហិកតា។ កងពលតូចអន្តរាគមន៍លេខ៨ ភ្ជួរដីចំការដាំដំឡូងបានចំនួន៥០ហិកតា ក្នុងនោះដាំដំឡូងបានចំនួន៣៤ហិកតា ភ្ជួរដីស្រែបានចំនួន១៩៦ហិកតា ព្រោះស្រូវបានចំនួន៣៥ហិកតា។ កងពលតូចអន្តរាគមន៍លេខ៩ ក្រៅពីការផ្តល់ឥណទាន និងផ្គត់ផ្គង់ពូជដល់សហគមន៍គ្រួសារកងទ័ពកងពលកំពុងបន្តភ្ជួររាស់ដីសម្រាប់ការធ្វើស្រែ ដែលគ្រោងពង្រីកផ្ទៃដីធ្វើស្រែឱ្យបាន៣០០ហិកតា។ ចំពោះកងពលតូចអន្តរាគមន៍លេខ៧ នៅឆ្នាំកន្លង គឺមានតែសកម្មភាពផ្តល់ឥណទានដល់សហគមន៍គ្រួសារកងទ័ពតែប៉ុណ្ណោះ ប៉ុន្តែសម្រាប់ឆ្នាំនេះក៏បានរៀបចំផ្ទៃដីធ្វើស្រែបានចំនួន៨០ហិកតាផងដែរ៕
ចែករំលែកព័តមាននេះ