ខេត្តកំពង់ឆ្នាំង ៖ នៅកំពង់ផែចុងកោះ ស្ថិតក្នុងភូមិចុងកោះ សង្កាត់ផ្សារឆ្នាំង នាដើមខែឧសភា ឆ្នាំ២០១១ នេះ គេសង្កេតឃើញរថយន្តជាច្រើនគ្រឿងសម្រុកដឹកស្រូវប្រាំងចេញពីកាណូត ដែលចតនៅកំពង់ផែយ៉ាងច្រើនរហូតដល់ម្ចាស់ កំពង់ផែសាងរោងយ៉ាងធំបណ្តោះអាសន្ន ដើម្បីលើកដាក់ស្រូវទាំងនោះ ការពារកំដៅថ្ងៃ និងទទឹកទឹកភ្លៀងជាដើម ។
លោកគុយ ចន្ថា ម្ចាស់កំពង់ផែផ្សារក្រោមមានប្រសាសន៍ថា ឆ្នាំនេះលោកកត់សម្គាល់ថា កំពង់ផែរបស់លោកដឹកជញ្ជូនស្រូវប្រាំងជាច្រើនតោនក្នុងមួយថ្ងៃៗ ។ ជារៀងរាល់ថ្ងៃតាំងពីព្រលឹមទល់ល្ងាចកាណូតដឹកជញ្ជូនស្រូវប្រាំងពីស្រុកកំពង់លែងជាច្រើន គ្រឿងមកចតនៅកំពង់ផែចុងកោះរបស់លោក ហើយបន្តលើកដាក់លើរថយន្តដឹកចេញយ៉ាងគគ្រឹកគគ្រេងដូច្នេះលោកកត់សម្គាល់ថា ស្រូវប្រាំងរបស់កសិករស្រុកកំពង់លែងមានការកើនឡើង ។
លោកង៉ាន ណានី ប្រធានមន្ទីរកសិកម្មខេត្ត ប្រាប់តាមទូរស័ព្ទថា ស្រុកកំពង់លែងឆ្នាំនេះ កសិករធ្វើស្រូវប្រាំងបានទិន្នផលខ្ពស់គួរឱ្យកត់សំគាល់ គឺទិន្នផលកើនទ្វេដង ។ កត្តានេះគឺដោយសារប្រជាកសិករធ្វើស្រូវប្រាំងរួមផ្សំទាំងធ្វើស្រូវប្រដេញទឹកទាន់ពេលវេលា និងមួយវិញ ទៀតគ្មានសត្វបំផ្លាញដំណាំស្រូវរបស់ពួកគាត់។
លោកប្រធានមន្ទីរមិនបញ្ជាក់ពីតួលេខទិន្នផលស្រូវប្រាំងច្បាស់លាស់ទេ ដោយសារជាថ្ងៃអាទិត្យលោកមិនមានឯកសារក្នុងដៃ។ លោកតែគ្រាន់តែដឹងថា ស្រូវប្រាំងពិតជាកើនឡើងយ៉ាងច្រើនគួរឱ្យកត់សម្គាល់មែនដែលកត្តានេះធ្វើឱ្យជីវភាពប្រជាកសិករធូរធារមួយកម្រិត ព្រោះពួកគាត់អាចលក់ស្រូវប្រាំងដែលធ្វើបានយកប្រាក់ដោះស្រាយជីវភាព៕
ចែករំលែកព័តមាននេះ