រដ្ឋាភិបាលថៃ កំពុងតែដាក់ចេញនូវនយោបាយបិទបាំងការទូត ខណៈដែលរដ្ឋបុរស និងជាប្រធានក្រុមប្រឹក្សាផ្តល់យោបល់ព្រះមហាក្សត្រ លោក Prem Tunsulanonda អំពាវនាវប្រជាជនថៃឱ្យបង្ហាញការគាំទ្រពេញទំហឹងរបស់ពួកគេ ទៅលើយោធាថៃនៅក្នុងសកម្មភាពនៃការឈ្លានពានសង្គ្រាមប្រឆាំងកម្ពុជា
រដ្ឋាភិបាលថៃ កំពុងតែដាក់ចេញនូវនយោបាយបិទបាំងការទូត ខណៈដែលរដ្ឋបុរស និងជាប្រធានក្រុមប្រឹក្សាផ្តល់យោបល់ព្រះមហាក្សត្រ លោក Prem Tunsulanonda អំពាវនាវប្រជាជនថៃឱ្យបង្ហាញការគាំទ្រពេញទំហឹងរបស់ពួកគេ ទៅលើយោធាថៃនៅក្នុងសកម្មភាពនៃការឈ្លានពានសង្គ្រាមប្រឆាំងកម្ពុជា។
កាសែតបាងកកប៉ុស្តិ៍ចុះផ្សាយនៅថ្ងៃពុធ ទី២៧ មេសា ឆ្នាំ២០១១ ដែលមានចំណងជើងថា ប្រទេសចិន និងវៀតណាម ត្រូវបានគេស្នើឱ្យដាក់គំនាបទៅលើប្រទេសកម្ពុជា ដែលអត្ថបទនិយាយថា «ក្រសួងការបរទេសក៏បានសុំផងដែរទៅដល់ប្រទេសវៀតណាម និងចិន ដើម្បីជួយបញ្ចុះបញ្ចូលកម្ពុជាឱ្យត្រឡប់មកតុចរចាវិញ។ ការស្នើសុំក៏ត្រូវបានធ្វើឡើងតាមរយៈឯកអគ្គរដ្ឋទូតចិនប្រចាំទីក្រុងបាងកក លោក Guan Mu និងឯកអគ្គរដ្ឋទូតវៀតណាមប្រចាំនៅប្រទេសថៃ លោក Ngo Duc Thang អំឡុងពេលការជួបប្រជុំជាមួយនឹងលេខាអចិន្ត្រៃយ៍ លោក Theerakun Niyom កាលពីម្សិលមិញ។ រដ្ឋមន្ត្រីការពារជាតិថៃ ឧត្តមសេនីយ៍ Prawit នឹងអញ្ជើញទៅទស្សនកិច្ចប្រទេសចិននៅថ្ងៃនេះ។ ដំណើរទស្សនកិច្ចផ្លូវការរបស់គាត់ គឺដើម្បីពិភាក្សាទៅលើគម្រោងអភិវឌ្ឍន៍នាវាមុជទឹក ក៏ប៉ុន្តែអ្នកសង្កេតការណ៍ជាច្រើនជឿថា គាត់នឹងលើកបញ្ហាជម្លោះព្រំដែនកម្ពុជា-ថៃ ជាមួយសមភាគីចិនរបស់គាត់»។
នេះគឺជានយោបាយបិទបាំងការទូតរបស់ថៃ ពីព្រោះនៅថ្ងៃជាមួយគ្នានោះ កាសែត Bangkok Post បានចុះផ្សាយអត្ថបទដែលមានចំណងជើងថា «លោក Prem គាំទ្រទាហានរបស់យើងនៅតាមព្រំដែន» ដែលអត្ថបទនេះនិយាយថា «រដ្ឋបុរស និងជាប្រធានក្រុមប្រឹក្សាផ្តល់យោបល់ព្រះមហាក្សត ្រកាលពីថ្ងៃពុធបានអំពាវនាវប្រជាជនថៃទាំងអស់ឱ្យបង្ហាញការគាំទ្រពេញទំហឹងរបស់ពួកគេទៅដល់ក្រុមទាហានដែលកំពុងបំពេញភារកិច្ចរបស់គេនៅតាមព្រំដែន ដែលមានសភាពផុយស្រួយជាមួយកម្ពុជា។ ជាការពិតណាស់ នេះជាការប្រសិទ្ធពរជ័យ និងលើកទឹកចិត្តដល់កងកម្លាំងប្រដាប់អាវុធថៃ ដើម្បីធ្វើសង្គ្រាមឈ្លានពានប្រឆាំងកម្ពុជា ដែលការនេះបញ្ជាក់ឡើងវិញនូវការគំរាមកំហែងរបស់រដ្ឋាភិបាលក្រុងបាងកក ក្នុងការប្រើប្រាស់សកម្មភាពយោធា ដើម្បីបណ្តេញទាហានកម្ពុជាចេញពីតំបន់ដែលថៃចាត់ទុកថាជាតំបន់ជម្លោះ។ នេះបើតាមការចុះផ្សាយរបស់កាសែត The Nation នៅថ្ងៃដដែលនោះ ដែលបានដកស្រង់សម្តីចេញពីសារព័ត៌មាន DPA។
នេះជាកិច្ចបន្ទាន់មួយដែលសហគមន៍អន្តរជាតិធ្វើអន្តរាគមន៍ ដើម្បីបញ្ចៀសការបង្ហូរឈាមតទៅទៀត និងអស្ថិរភាពរបស់អាស៊ាននៅក្នុងតំបន់ទាំងមូល។ រដ្ឋាភិបាល និងទាហានថៃ ព្រមទាំងអ្នកសារព័ត៌មានថៃជាច្រើនទៀតគួរតែបញ្ឈប់ការនិយាយប៉ាន់ស្មានរបស់គេថា កម្ពុជាជាអ្នកបង្កសង្គ្រាមនៅតាមព្រំដែន ពីព្រោះកម្ពុជាបានព្យាយាមយកបញ្ហានេះត្រឡប់ទៅអង្គការសហប្រជាជាតិវិញ។ ស្តីពីចំណុចនោះ លោក Marty Natalegawa ជាប្រធាន ASEAN បានប្រាប់និពន្ធនាយកកាសែត The Nation លោក Suthichal Yoon ថា រឿងនេះវាបានធ្វើរួចរាល់នៅឯអង្គការសហប្រជាជាតិរួចហើយ វាមិនមែនជាបញ្ហានៃការនាំរឿងនេះត្រឡប់ទៅអង្គការសហប្រជាជាតិវិញឡើយ។ បញ្ហានោះមិនអាចត្រឡប់ថយក្រោយវិញបានទេ៕
សាស្ត្រាចារ្យ ប៉ែន សឿន
ចែករំលែកព័តមាននេះ