ខេត្ដកំពង់ស្ពឺ ៖ ស្នូរផ្ទុះគ្រាប់បែកលាន់ រញ្ជួយក្នុងចំការបន្លែមួយស្ថិតនៅទល់មុខសាលាបឋមសិក្សារលួសក្នុងភូមិបុរីកម្មករ សង្កាត់ច្បារមន ក្រុងច្បារមន ទាំងព្រឹកព្រលឹម បណ្ដាលឱ្យបុរសអ្នកដាំដំណាំម្នាក់ រងរបួសស្រាល ហើយត្រូវបាននាំទៅព្យាបាល បន្ទាន់នៅមន្ទីរពេទ្យបង្អែក ខេត្ដកំពង់ស្ពឺ ។លោកអធិការរងនគរបាលក្រុងច្បារមនមានប្រសាសន៍ឱ្យដឹងថា ការផ្ទុះនោះនៅ វេលាម៉ោង៦ និង៣០នាទីព្រឹក ថ្ងៃទី១៤ មិថុនា។ ជនរងគ្រោះឈ្មោះ ម៉ៃ សុខុម អាយុ៤៥ឆ្នាំ មានប្រពន្ធឈ្មោះ ចេវ សេត និងមានកូន៦នាក់ រស់នៅភូមិតាម៉ុយ សង្កាត់ច្បារមន ។
ជាធម្មតាពេលក្រោកពីដំណេក លោកតែងទៅចំការបន្លែរបស់ខ្លួនដែលដាំត្រសក់ និងសណ្ដែកដើម្បីស្រោចទឹក។ ដោយឡែកនៅព្រឹកកើតហេតុពេលលោកចាប់ដងរែក និងធុងស្រោចទឹកចុះដងទឹកក្នុងត្រញំង ដែលនៅក្បែរច្បារបន្លែនោះស្រាប់តែឮ សំលេងម្យ៉ាងលោកក៏ទំលាក់ដងរែកចោល ហើយស្ទុះទៅក្រាបក្នុងរណ្ដៅត្រញំងទឹក ខណៈគ្រាប់ផ្ទុះឡើង។ ការផ្ទុះនោះបណ្ដាលឱ្យបែកធុង និងពាងលាយជីស្រោចដំណាំ។ ចំណែកលោកម៉ៃ សុខុម ដែលបានក្រាបក្នុង រណ្ដៅទាន់ពេលរងរបួសកែងដៃបន្ដិច ប៉ុណ្ណោះ ហើយគ្រូពេទ្យប្រាប់ថា អំបែងគ្រាប់ជាប់ក្នុងដើមដៃស្ដាំពុំទាន់អាចដកចេញភ្លាមៗទេ ។
មន្ដ្រីប៉ូលិសក្រុងច្បារមនរាយការណ៍ថា តាមការស៊ើបសួរ និងការអង្កេតភ្លាមៗលើករណីនេះ គឺជារឿងសំអប់មួយរវាងអ្នកដាំ និងអ្នកធ្លាប់លួចបេះត្រសក់បេះសណ្ដែក ព្រោះពីថ្ងៃមុនបុរសម្ចាស់ចំការបានបេះសណ្ដែក និងត្រសក់លក់ រួចហើយបន្ដការបាញ់ថ្នាំសំលាប់សត្វល្អិតទៀត លុះព្រឹកឡើង កើតហេតុការណ៍ផ្ទុះគ្រាប់បែកដៃតែម្ដង។ មន្ដ្រីប៉ូលិសបច្ចេកទេសព្រហ្មទណ្ឌខេត្ដ និយាយថា គ្រាប់បែកដៃនេះធុនក្រឡាទៀប ផលិតនៅសហភាពសូវៀត ដែលគេបង្កៃក្នុង ធុងស្រោចបន្លែរបស់ជនរងគ្រោះ ។ បើកុំតែ ជនរងគ្រោះធ្លាប់ធ្វើទាហានមានបទ ពិសោធន៍រឿងអាវុធជាតិផ្ទុះអាចរងគ្រោះ ដល់ជីវិត។ សមត្ថកិច្ចកំពុងស្រាវជ្រាវម្ចាស់គ្រាប់បែកនោះហើយ ៕
ចែករំលែកព័តមាននេះ