កម្ពុជាពុំមានគម្រោងសាងសង់រោងចក្រផលិតថាមពលនុយក្លេអ៊ែរទេ
រាជធានីភ្នំពេញ ៖ កាលពីពេលកន្លងមកនេះ បណ្ដាសារព័ត៌មានជាច្រើនបានចុះផ្សាយពីគម្រោងសាងសង់រោងចក្រអគ្គិសនីដើរដោយថាមពលនុយក្លេអ៊ែរនៅកម្ពុជា ដោយអះអាងថា
រាជធានីភ្នំពេញ ៖ កាលពីពេលកន្លងមកនេះ បណ្ដាសារព័ត៌មានជាច្រើនបានចុះផ្សាយពីគម្រោងសាងសង់រោងចក្រអគ្គិសនីដើរដោយថាមពលនុយក្លេអ៊ែរនៅកម្ពុជា ដោយអះអាងថា កម្ពុជាបានចុះហត្ថលេខាជាមួយរុស្ស៊ីលើគម្រោងនេះ ប៉ុន្តែបើតាមការបញ្ជាក់ពីមន្ត្រីក្រសួងរ៉ែ និងថាមពល ក៏ដូចជាក្រសួងបរិស្ថានកម្ពុជា បានឲ្យដឹងថា មិនមានគម្រោងនេះលេចឡើងនៅកម្ពុជាទេ តែនឹងជំរុញមានការបណ្ដុះបណ្ដាលធនធានមនុស្សលើវិស័យថាមពលនុយក្លេអ៊ែរនេះ ។
លោក ម៉េង សក្តិធារ៉ា រដ្ឋលេខាធិការក្រសួងរ៉ែ និងថាមពល ថ្លែងថា លោកមិនដឹងពីគម្រោងសាងសង់រោងចក្រនុយក្លេអ៊ែរនៅកម្ពុជាទេ ហើយកន្លងមក គ្រាន់តែជាកិច្ចពិភាក្សាដើម្បីយល់ពីបញ្ហានោះប៉ុណ្ណោះ ប៉ុន្តែសម្រាប់ដំណើរការសាងសង់រោងចក្រនេះនៅក្នុងប្រទេសកម្ពុជា នៅតែមិនទាន់មានភាពច្បាស់លាស់នៅឡើយ ។
សូមរំឭកថា កាលពីពាក់កណ្ដាលឆ្នាំ២០១៦ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញទៅទស្សនកិច្ចនៅប្រទេសរុស្ស៊ី ហើយក្នុងដំណើរទស្សនកិច្ចនោះ សម្ដេចតេជោបានចុះហត្ថលេខាជាមួយភាគីរុស្ស៊ី លើចំណុចមួយចំនួន ក្នុងនោះក៏មានគម្រោងពាក់ព័ន្ធនឹងថាមពលនុយក្លេអ៊ែរដែរ ប៉ុន្តែរហូតមកដល់ពេលនេះ គម្រោងដ៏ធំមួយនេះនៅមិនទាន់លេចចេញជារូបរាងនៅឡើយទេ ។ គោលបំណងនៃគម្រោងវិស័យថាមពលនុយក្លេអ៊ែរនេះដែរ ត្រូវបានសារព័ត៌មានជាច្រើនដកស្រង់សម្ដីមន្ត្រីជាន់ខ្ពស់នៃរាជរដ្ឋាភិបាលថា វាមានសារសំខាន់ក្នុងការអភិវឌ្ឍប្រទេស ។
លោក ទិន ពន្លក អ្នកនាំពាក្យក្រសួងបរិស្ថានបានមានប្រសាសន៍ថា នៅក្នុងរបៀបវារៈដែលបានជួបជាមួយភាគីរុស្ស៊ី កាលពីពេលកន្លងទៅនេះ មិនមានការសាងសង់រោងចក្រអគ្គិសនីដើរដោយថាមពលនុយក្លេអ៊ែរទេ ក៏ប៉ុន្តែកាលពី២សប្ដាហ៍មុននេះ អន្តររដ្ឋាភិបាលដែលមានកម្ពុជា និងរុស្ស៊ី បានចុះហត្ថលេខាមួយលើការបណ្ដុះបណ្ដាលធនធានកម្ពុជាពីជំនាញ ចំណេះដឹងលើវិស័យថាមពលនុយក្លេអ៊ែរ។
លោកថា ៖« កម្ពុជាបានស្នើទៅភាគីរុស្ស៊ី ឲ្យបង្កើនអាហារូបករណ៍ដល់និស្សិតកម្ពុជា ហើយទន្ទឹមនឹងនោះដែរ កម្ពុជាក៏បានផ្សព្វផ្សាយ និងលើកទឹកចិត្តដល់និស្សិតឲ្យចាប់អារម្មណ៍លើជំនាញ ចំណេះដឹងលើវិស័យថាមពលនុយក្លេអ៊ែរ ក្នុងនោះ យើងក៏បានជំរុញឲ្យមានការកសាងមជ្ឈមណ្ឌលព័ត៌មាននុយក្លេអ៊ែរនៅកម្ពុជាផងដែរ » ។
លោកបន្តថា មជ្ឈមណ្ឌលផ្ដល់ព័ត៌មាននេះ ក៏មិនទាន់ប្រាកដថា នឹងលេចជារូបរាងនៅពេលណានៅឡើយទេ ព្រោះវាគ្រាន់តែជាជំហានដំបូងនៃការចរចារវាងកម្ពុជា និងរុស្ស៊ីប៉ុណ្ណោះ។ មួយវិញទៀត កម្ពុជាក៏គ្មានគម្រោង ឬផែនការសាងសង់រោងចក្រថាមពលនុយក្លេអ៊ែរទេ តែកម្ពុជាជំរុញឲ្យសិស្សនិស្សិតសិក្សាពីចំណេះដឹង ឬជំនាញនុយក្លេអ៊ែរ ព្រោះជំនាញនេះវាមានសារសំខាន់ទាក់ទងនឹងវិស័យផ្សេងទៀត ដូចជា វិស័យសុខាភិបាល និងគីមីចំណីអាហារជាដើម ។
លោកថា ៖« អ្វីដែលកម្ពុជាត្រូវធ្វើនៅ ពេលនេះ គឺទាក់ទាញសិស្សនិស្សិតឲ្យចាប់ អារម្មណ៍នឹងមុខវិជ្ជាវិទ្យាសាស្ត្រពិត ព្រោះតាមបរិបទនៃបណ្ដាប្រទេសកំពុងអភិវឌ្ឍន៍ ប្រទេសអភិវឌ្ឍន៍ ត្រូវការអ្នកវិទ្យាសាស្ត្រ ហើយយើងក៏មិនអាចទៅពឹងលើវិស័យកសិកម្មដូចកាលមុនទៀតដែរ គឺយើងត្រូវការផ្លាស់ប្តូរពីមួយជំហានទៅមួយមួយជំហាន ។ ដូចនេះ ជំនាញមួយនេះប្រាកដជាមានតម្រូវការខ្ពស់នៅពេលអនាគត ។ អីចឹងបានជាយើងត្រូវទាក់ទាញឲ្យនិស្សិតមានចំណាប់អារម្មណ៍លើជំនាញនុយក្លេអ៊ែរ » ។
លោកបន្ថែមថា នៅក្នុងរបៀបវារៈដែលកម្ពុជាដាក់សំណើទៅរុស្ស៊ី មិនមានលើកឡើងពីការសាងសង់រោងចក្រថាមពលនុយក្លេអ៊ែរទេ ព្រោះគម្រោងនេះធំណាស់ ត្រូវការសិក្សាច្រើន។ ដូចនេះ ការចំណាយនានាក៏អស់ច្រើនដែរ ហើយក៏គ្មានទុនសម្រាប់ធ្វើវាទេ ។ ម្យ៉ាងទៀត ការសាងសង់នេះ ក៏ត្រូវគិតគូរច្រើនពីបញ្ហាប្រឈមដូចជា បរិស្ថាន និងប៉ះពាល់ដល់វិស័យកសិកម្មជាដើម ៕
ចែករំលែកព័តមាននេះ