ដំណាំស្រូវអាចនឹងជួបប្រទះការខាតបង់ធ្ងន់ធ្ងរ
បើតាមលោក Apriom Sukprasert បាននិយាយឱ្យដឹងថា
ធនាគាររដ្ឋ Bank for Agriculture and Agricultural Cooperatives (BAAC) និយាយថា សំណងខូចខាតសម្រាប់ស្រូវដែលមានធានារ៉ាប់រង នឹងកើនឡើងពី២៥លានដុល្លារក្នុងឆ្នាំ២០១៦ មកស្មើប្រមាណ៣០លានដុល្លារក្នុងឆ្នាំនេះ ដែលភាគច្រើនមកពីគ្រោះទឹកជំនន់កើតឡើងនាពេលថ្មីៗនេះនៅប៉ែកឦសាននៃប្រទេសថៃ ។
លោក Apriom Sukprasert ប្រធានធនាគារខាងលើ និយាយថា នៅ Sakon Nakhon មានស្រែប្រមាណ១៤ម៉ឺន៤ពាន់ហិកតាបានខូចខាតដោយសារគ្រោះទឹកជំនន់ ក្នុងនោះ៤០% ជាស្រែមានធានារ៉ាប់រង ។
លោកបន្តថា កសិករដាំស្រូវប្រមាណ១,៥លាននាក់បានទិញធានារ៉ាប់រងសម្រាប់ដីស្រែប្រមាណ៣,៨លានហិកតា តិចជាងឆ្នាំមុនស្មើ៤,៣លានហិកតា ។ ក្នុងឆ្នាំនេះ មានផ្ទៃដីសម្រាប់ដំណាំស្រូវស្មើប្រមាណ៨,៤លានហិកតា តិចជាងឆ្នាំមុនស្មើជិត៩លានហិកតា ។
លោក Apirom បន្ថែមថា កសិករបានមកដកប្រាក់សំណងប្រមាណ៦,៧លានដុល្លារក្នុងឆ្នាំនេះ ខណៈឆ្នាំ២០១៦ ពួកគេបានដកប្រាក់ជិត២៥លានដុល្លារ ។
ធនាគារ BAAC បានព្យាយាមបង្កើនបរិមាណប្រាក់សំណងឲ្យស្មើជិតការចំណាយក្នុងការដាំរបស់កសិករ ប៉ុន្តែពួកគេត្រូវបង់ក្នុងអត្រាខ្ពស់ ។
កាលពីខែមិថុនា ក្រុមគណៈរដ្ឋមន្ត្រីបានយល់ស្របលើគម្រោងធានារ៉ាប់រងស្រូវសម្រាប់ដំណាំលើកទី១ ឆ្នាំ២០១៧ ក្នុងតម្លៃដល់ទៅ៦០,៥លានដុល្លារ ។ គម្រោងនេះនៅក្រោមការគ្រប់គ្រងរបស់ធនាគារ BAAC នឹងផ្តល់សំណងសម្រាប់គ្រោះធម្មជាតិចំនួន៦ ដូចជា គ្រោះទឹកជំនន់, រាំងស្ងួត, ព្យុះភ្លៀង, អាកាសធាតុត្រជាក់, ព្យុះទឹកកក និងអគ្គិភ័យជាដើម ។
នៅក្រោមគម្រោងនេះ កសិករទទួលបានប្រាក់សំណងចំនួន៣៨ដុល្លារសម្រាប់០,១៦ហិកតា បើស្រូវទទួលរងការខូចខាតពីគ្រោះធម្មជាតិ ខ្ពស់ជាងឆ្នាំមុនស្មើតែ៣៣,៥ដុល្លារ ។ ពួកគេអាចទទួលបាន១៩ដុល្លារក្នុង០,១៦ហិកតាទៀត បើស្រូវរងការខូចខាតពីសត្វល្អិត និងជំងឺផ្សេងៗ ខ្ពស់ជាងឆ្នាំមុនស្មើតែ១៦,៧ដុល្លារ ។
បើទោះជាសំណងក្នុងឆ្នាំនេះកើនឡើងក្តីពេលធៀបនឹងឆ្នាំមុន រដ្ឋាភិបាលថៃនៅតែផ្តល់សំណង៣៣,៥ដុល្លារក្នុង០,១៦ហិកតាទៀតដល់កសិដ្ឋាននៅតំបន់រងគ្រោះធ្ងន់ធ្ងរ ប៉ុន្តែវានៅតែតិចជាងការចំណាយក្នុងការដាំដុះ ៕
ចែករំលែកព័តមាននេះ