អាជីវកម្មតុបតែងរថយន្តស្ងប់ស្ងាត់ ខណៈកំណើនកើនឡើង
រាជធានីភ្នំពេញ ៖ ជាធម្មតា ម្ចាស់រថយន្ដ ពិសេសអ្នកទិញរថយន្ដមួយទឹក តែងយករថយន្ដទៅតុបតែងលម្អ ដោយសារ
រាជធានីភ្នំពេញ ៖ ជាធម្មតា ម្ចាស់រថយន្ដ ពិសេសអ្នកទិញរថយន្ដមួយទឹក តែងយករថយន្ដទៅតុបតែងលម្អ ដោយសារតែពេលទិញពីឃ្លាំងនោះ សម្ភារមួយចំនួនបាត់បង់ ឬក៏ទិញតុបតែងបន្ថែម ព្រោះវាមិនដូចរថយន្ដថ្មីបកពីកេសនោះទេ ។ ដូច្នេះហើយអាជីវកម្មលក់សម្ភារតុបតែងលម្អនេះក៏មានហាងឆេងដែរ ប៉ុន្ដែនៅឆ្នាំនេះអាជីវកម្មមួយនេះ ហាក់ដូចជាស្ងប់ស្ងាត់បន្ដិច ខណៈទីផ្សាររថយន្ដជជុះធ្លាក់ចុះ ហើយរថយន្ដថ្មីកើនឡើង ។
នៅម្ដុំអគារពាណិជ្ជកម្មកាណាឌីយ៉ា ឬតាមបណ្ដោយវិថីក្រមួនស ត្រូវបានគេដឹងថា ជាកន្លែងដែលសម្បូរហាងបើកអាជីវកម្មតុបតែង និងលក់សម្ភារលម្អរថយន្តជាច្រើន ក៏ប៉ុន្តែមួយរយៈនេះ ពួកគាត់បានអះអាងថា ពុំសូវមានអតិថិជនមកតុបតែងឡើយ ។
លោក តាំង គងហ៊ាង អាជីវករលក់សម្ភារនិងជាជាងតុបតែងរថយន្តបានឱ្យដឹងថា អាជីវកម្មមួយនេះនាពេលបច្ចុប្បន្ន មិនសូវកាក់កបច្រើនប៉ុន្មានទេ ខុសពីប៉ុន្មានឆ្នាំមុនៗ ។
លោកថា ៖« ក្រោយពីមានការនាំចូលរថយន្តថ្មីៗ មិនសូវមានអ្នកយករថយន្ដមកតុបតែងលម្អទេ ព្រោះរថយន្តថ្មីៗដែលនាំមក គេមានបំពាក់គ្រប់គ្រាន់អស់ហើយ ។ ដូចនេះ មិនត្រូវយកមកបំពាក់ទៀតទេ ខុសពីមុន ដែលភាគច្រើនទិញរថយន្ដមួយទឹក ហើយមកតុបតែងច្រើន » ។
លោកបន្តថា អាជីវកម្មបែបនេះ គឺផ្តោតទៅលើតែរថយន្តជជុះនាំចូលទេ ជាក់ស្ដែង រថយន្ដមួយទឹកដែលនាំចូលពីក្រៅប្រទេស ភាគច្រើន គ្មានគ្រឿងតុបតែងគ្រប់គ្រាន់ ដូចជា ខ្វះម៉ាញ៉េ ខ្វះប្រព័ន្ធកាមេរ៉ាមុខក្រោយ និងដៃទ្វារមិនទាន់ស្អាតជាដើម ។ ដូចនេះ ម្ចាស់រថយន្ដត្រូវការយកមកបំពាក់បន្ថែម ដើម្បីឱ្យមើលទៅស្អាតដូចរថយន្តថ្មីដែរ ។
លោកបន្ថែមថា តម្លៃនៃការតុបតែងរថយន្តនីមួយៗខុសៗគ្នា បើម្ចាស់រថយន្តចង់បានស្អាត មានឧបករណ៍បំពាក់គ្រប់គ្រាន់ដូចរថយន្តថ្មីនាំចូលដែរនោះ ពួកគាត់ត្រូវចំណាយច្រើនបន្តិច តែយ៉ាងណា វាអាស្រ័យលើលទ្ធភាពរបស់ម្ចាស់រថយន្ដ ។ ជាក់ស្ដែង ម៉ាញ៉េមួយបំពាក់នៅក្នុងរថយន្ត ក៏មានតម្លៃខុសៗគ្នាដែរ ខ្លះមានតម្លៃ១០០ដុល្លារ ឬ២០០ដុល្លារ ក្នុងនោះក៏មានត្រឹមតម្លៃ៥០ដុល្លារដែរ តែវាជារបស់មួយទឹក ។
លោកបញ្ជាក់ថា បច្ចុប្បន្ន រថយន្តដែលយកមកតុបតែងនៅម្ដុំកាណាឌីយ៉ា ភាគច្រើនជារថយន្តម៉ាកឡិចស៊ីស RX 300 ឬ RX 330 រថយន្ត Camry បាឡែន ព្រូស និងតាកូម៉ា ដែលផលិតជាង១០ឆ្នាំមកហើយ ។ ដោយឡែក បើរថយន្តស៊េរីថ្មី ដូចជា ឡិចស៊ីស៥៧០ ស៊េរីឆ្នាំ២០១៧ ជាដើមនោះ គេមានបំពាក់គ្រប់គ្រាន់ហើយ មិនត្រូវការតុបតែងបន្ថែមទៀតទេ ។
ដូចគ្នានេះដែរ អាជីវករតុបតែងរថយន្តមួយរូបទៀតនៅតាមបណ្ដោយវិថីក្រមួនស ក៏បានឱ្យដឹងស្រដៀងគ្នាដែរថា ពេលនេះ ការលក់គ្រឿងតុបតែងរថយន្តមិនមានសកម្មភាពខ្លាំងប៉ុន្មានទេ តែក៏មិនធ្លាក់ចុះខ្លាំងដែរ គ្រាន់តែបាត់ភ្ញៀវមួយចំនួន ។
អាជីវកររូបនេះនិយាយថា ៖« កាលមុនមានទាំងអ្នកមកទិញសម្ភារ និងអ្នកយករថយន្តមកបំពាក់គ្រឿងតុបតែងច្រើន តែពេលនេះ វាហាក់ដូចជាស្ងប់ស្ងាត់ តែក៏មិនអត់សោះដែរ» ។
បើតាមការបញ្ជាក់ពីសហព័ន្ធឧស្សាហកម្មយានយន្តកម្ពុជា បានឱ្យដឹងថា ក្នុង១ឆ្នាំ កម្ពុជាបាននាំចូលរថយន្តសរុបប្រមាណ៦ទៅ៧ម៉ឺនគ្រឿង ក្នុងនោះរថយន្តជជុះមានរហូតដល់ប្រមាណ៩០% ខណៈទីផ្សាររថយន្តថ្មីមានប្រមាណតែ១០%ប៉ុណ្ណោះ ក៏ប៉ុន្តែដោយសារកំណើនសេដ្ឋកិច្ច និងប្រាក់ចំណូលរបស់ប្រជាពលរដ្ឋ ធ្វើឲ្យកំណើនរថយន្តថ្មីៗបានកើនឡើងបន្តិចម្ដងៗ ហើយវត្តមានរថយន្តស៊េរីទំនើបនៅលើដងផ្លូវ ក៏មានច្រើនដែរ ៕
ចែករំលែកព័តមាននេះ