ខេត្តបន្ទាយមានជ័យ ៖ សំរាមតាមដងផ្លូវ និងមុខផ្ទះពលរដ្ឋនៅក្រុងប៉ោយប៉ែត កន្លែងខ្លះស្ទើរក្លាយជាកូនភ្នំទៅហើយ ពលរដ្ឋបានរអ៊ូរទាំថាក្រុមហ៊ុនប្រមូលសំរាមខកខានមិនបានប្រមូលតាំងពីពិធីបុណ្យភ្ជុំបិណ្ឌមក
ខេត្តបន្ទាយមានជ័យ ៖ សំរាមតាមដងផ្លូវ និងមុខផ្ទះពលរដ្ឋនៅក្រុងប៉ោយប៉ែត កន្លែងខ្លះស្ទើរក្លាយជាកូនភ្នំទៅហើយ ពលរដ្ឋបានរអ៊ូរទាំថាក្រុមហ៊ុនប្រមូលសំរាមខកខានមិនបានប្រមូលតាំងពីពិធីបុណ្យភ្ជុំបិណ្ឌមក ។ ដងផ្លូវបេតុងមួយចំនួនដែលគ្មានមនុស្សរស់នៅ (ចំណុចដីទំនេរ) អ្នកស្រុកបានយកសំរាមទៅចាក់ ឬបោះចោលគរដូចភ្នំមានក្លិនស្អុយស្ទើរធ្វើដំណើរឆ្លងកាត់មិនបាន ។
ដោយឡែកតាមមុខផ្ទះអ្នកស្រុកភាគច្រើន សំរាមក្លាយជាគំនរហៀរទឹកឆ្អេះឆ្អាប និងស្អុយចោលក្លិនអសោចបង្កជាក្តីបារម្ភដល់ពលរដ្ឋទៅនឹងសុខមាលភាព និងបរិស្ថានសង្គមយ៉ាងខ្លាំង ។ អ្នកស្រុកបានរអ៊ូរទាំថា បញ្ហាសំរាមនេះបានកើតមានតាំងពីរដូវបុណ្យភ្ជុំបិណ្ឌមក ដោយមិនដឹងថាខាងក្រុមហ៊ុនសម្អាតក្រុងប៉ោយប៉ែត មានបញ្ហាអ្វីឡើយបានជាមិនឃើញប្រមូលសំរាមតាមមុខផ្ទះពួកគាត់សោះ ។
អ្នកស្រុកលើកឡើងថា ពួកគាត់បង់ប្រាក់លើសេវាប្រមូលសំរាមតាមមុខផ្ទះទៀងទាត់មិនដែលខកខាន ហើយខាងបុគ្គលិកក្រុមហ៊ុនដាច់ខែមិនទាន់ដើរប្រមូលប្រាក់បាត់ទៅហើយ ។ អ្នកភូមិបន្តថា ពួកគាត់កំពុងព្រួយបារម្ភពីជម្ងឺដង្កាត់ផ្សេងៗ ព្រោះតែគំនរសំរាមចោលក្លិនស្អុយពេញភូមិ និងមានរុយដែលជាប្រភពចម្លងមេរោគហើរពេញ ។ ពួកគាត់បានសម្តែងក្តីបារម្ភថាបើក្រុមហ៊ុនមិនប្រមូលសំរាមតាមមុខផ្ទះពួកគាត់ទេ ពួកគាត់មិនដឹងថានិងដឹកសំរាមទៅចោលនៅទីណាទេនាពេលខាងមុខ ។ សង្ស័យដោយសារតែការខឹងសម្បាអ្នកភូមិបានប្រាប់ថា អាជ្ញាធរ និងសមត្ថកិច្ចគួរតែខ្មាស់ភ្ញៀវទេសចរបរទេសផង ពេលខ្លះគេយកដៃបិទច្រមុះពេលដើរ ។
ជុំវិញបញ្ហាខាងលើ ខាងប្រធានក្រុមហ៊ុនសំអាតក្រុងប៉ោយប៉ែត ហៅកាត់ថា PPC មិនអាចទាក់ទងសុំការបំភ្លឺបានទេ ដោយទូរស័ព្ទចុចចូលជាច្រើនដង តែគ្មានអ្នកទទួល ។ ម្យ៉ាងខណៈភ្នាក់ងារកោះសន្តិភាពទៅដល់ការិយាល័យ បែជាបិទទ្វារគ្មានអ្នកធ្វើការ ៕
ចែករំលែកព័តមាននេះ