ស្នាដៃលោករន្ទះ…! ប្រហារទូចែកចាយចរន្តភ្លើងផ្ទុះឆេះទាំងព្រលឹម
រាជធានីភ្នំពេញ ៖ ទូចែកចាយចរន្តអគ្គិសនីតង់ស្យុងមធ្យមជាច្រើនគ្រឿងបានផ្ទុះឆេះ
រាជធានីភ្នំពេញ ៖ ទូចែកចាយចរន្តអគ្គិសនីតង់ស្យុងមធ្យមជាច្រើនគ្រឿងបានផ្ទុះឆេះ
រាជធានីភ្នំពេញ ៖ ទូចែកចាយចរន្តអគ្គិសនីតង់ស្យុងមធ្យមជាច្រើនគ្រឿងបានផ្ទុះឆេះ បណ្តាលឱ្យរងការខូចខាតរួមជាមួយអគារថ្មមួយខ្នង បន្ទាប់ពីភ្លៀងបានបង្អុរយ៉ាងខ្លាំង នាព្រឹកព្រលឹមថ្ងៃទី០៨ តុលា បង្កឱ្យមានរន្ធះបាញ់នៅចំអនុស្ថានីយអគ្គិសនី ជាហេតុធ្វើឱ្យមានការឆ្លងចរន្ត ។ ការផ្ទុះឆេះនោះបណ្តាលឱ្យអគ្គិសនីស្ទើរមួយចំហៀងរាជធានីភ្នំពេញបានដាច់ផងដែរ ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោងប្រមាណ៧និង៤០នាទីព្រឹកថ្ងៃទី៨ ខែតុលា ឆ្នាំ២០១៧ នៅក្នុងបរិវេណអនុស្ថានីយអគ្គិសនីទី៥ ដែលមានទីតាំងក្នុងសង្កាត់ក្រាំងធ្នង់ ខណ្ឌសែនសុខ ។ សាក្សីបានឱ្យដឹងថា នៅពេលភ្លៀង បានបង្អុរធ្លាក់ទាំងព្រឹក និងមានខ្យល់និងផ្លេកបន្ទោរ ស្រាប់តែមានរន្ធះបាញ់នៅចំពីមុខបន្ទប់ភ្លើងជាហេតុធ្វើឱ្យចរន្តអគ្គិសនីផ្ទុះឆេះបន្ទប់ចែកចាយចរន្តតែម្តង ។
តាមសាក្សីបានឱ្យដឹងទៀតថា ខណៈដែលមានរន្ទះលាន់ឮស្ទើររហែកមេឃនោះគេឃើញភ្លើងខៀវបានជះនៅតំបន់ក្បែរនោះ និងលាន់ឮយ៉ាងកក្រើកធ្វើឱ្យប្រជាពលរដ្ឋនាំគ្នាក្រាបគ្រប់ៗគ្នា។ ភ្លាមៗនោះ អគារមួយខ្នងនៅក្នុងបរិវេណផ្នែកខាងជើងនៃអនុស្ថានីយបានផ្ទុះឆេះហុយផ្សែងទ្រលោម និងបង្កឱ្យមានការភ្ញាក់ផ្អើល។ ដោយឡែកភ្លើងអគ្គិសនីនៅតំបន់មួយចំនួនក្នុងខណ្ឌសែនសុខ ព្រែកព្នៅ និងខណ្ឌពោធិ៍សែនជ័យបានដាច់ផងដែរ ។ បន្ទាប់ពីមានអគ្គិភ័យដែលបង្កឡើងពីរន្ទះ រថយន្តពន្លត់អគ្គិភ័យចំនួន៥គ្រឿង បានទៅធ្វើអន្តរាគមន៍បាញ់ពន្លត់អស់ប្រមាណ២ម៉ោងទើបរលត់ ។ នៅព្រឹកនោះមន្ត្រីអគ្គិសនី ក៏បានចុះទៅដល់កន្លែងកើតហេតុភ្លាមៗផងដែរ ។
តាមមន្ត្រីអគ្គិសនីមួយរូបបានឱ្យដឹងថា ការកើតមានអគ្គិភ័យនេះ បណ្តាលមកពីរន្ទះបាញ់នៅចំពីមុខអនុស្ថានីយអគ្គិសនីទី៥បណ្តាលឱ្យឆ្លងចរន្តទៅម៉ាសដែលកប់ក្រោមដី ជាហេតុធ្វើឱ្យឆេះអគារធ្វើការ និងផ្ទុកទៅដោយទូចែកចាយចរន្តអគ្គិសនីតង់ស្យង់មធ្យមជាហេតុធ្វើឱ្យចរន្តអគ្គិសនីត្រូវបានកាត់ផ្តាច់ ។
មន្ត្រីអគ្គិសនីរូបនោះបានឱ្យដឹងទៀតថា អគារថ្មទំហំបណ្តោយប្រវែង៥៨ម៉ែត្រនិងទទឹងប្រវែង១៥ម៉ែត្រ ត្រូវភ្លើងឆេះគ្រឿងក្នុងបណ្តាលឱ្យទូចែកចាយអគ្គិសនីតង់ស្យង់មធ្យមចំនួន១៥ទូបានរងការខូចខាត ដែលក្នុងនោះមាន៥ទូរងការខូចខាតទាំងស្រុង ។ ទោះបីជាយ៉ាងណា គេពុំដឹងពីទំហំនៃការខូចខាតគិតជាប្រាក់អស់ប៉ុន្មាននោះឡើយ ។តាមព័ត៌មានឱ្យដឹងថា ចំណុចដែលរន្ទះបាញ់ចំនោះបានឆេះខ្លោចស្មៅ និងមានរណ្តៅធំមួយនៅក្បែរប៉ាណូទុកចោល ៕
ចែករំលែកព័តមាននេះ