ព្រួយបារម្ភខ្លាចបាក់ស្រុតផ្លូវបេតុងដែលខួងទម្លុះ
ខេត្តព្រៃវែង ៖ ផ្លូវបេតុងមួយខ្សែដែលគេទើបសាងសង់រួចកាលពីប៉ុន្មានខែមុន
ខេត្តព្រៃវែង ៖ ផ្លូវបេតុងមួយខ្សែដែលគេទើបសាងសង់រួចកាលពីប៉ុន្មានខែមុន ស្ថិតនៅតាមបណ្តោយដងទន្លេមេគង្គ ចាប់ពីចំណុចខាងមុខមន្ទីរពេទ្យបង្អែកស្រុកប្រតិបត្តិអ្នកលឿង រហូតដល់ខាងក្រោយសាលាឃុំអ្នកលឿង ប្រវែងជិត២គីឡូម៉ែត្រ ។
ប៉ុន្តែថ្មីៗនេះមានអាជីវករម្នាក់បានប្រើកម្មករ ធ្វើសកម្មភាពខួងទម្លុះខាងក្រោមផ្លូវបេតុងនេះ ហើយបង្កប់ទុយោ នៅចំណុចខាងមុខរោងទឹកកកចាស់ ក្នុងភូមិនិងឃុំអ្នកលឿង ដើម្បីធ្វើសកម្មភាពបូមខ្សាច់ដាក់លក់នៅលើដីរបស់ខ្លួន ជាហេតុធ្វើឲ្យប្រជាពលរដ្ឋមានការព្រួយបារម្ភជាខ្លាំង ធ្វើឲ្យពួកគាត់ពិបាកក្នុងការធ្វើដំណើរដូចមុនទៀត។
ករណីនេះម្ចាស់ដេប៉ូខ្សាច់ឈ្មោះ វណ្ណា ដែលជាអ្នកខួងទម្លុះផ្លូវបេតុងនោះប្រាប់ឲ្យដឹងថា ការដែលគេហ៊ានខួងទម្លុះផ្លូវបេតុងនោះ គឺដោយសារមានការអនុញ្ញាតិពីលោកមេឃុំ និងលោកអភិបាលស្រុករួចហើយ។
រីឯលោក ភុន សម្ភស្ស អភិបាលស្រុកពាមរក៌វិញបានប្រាប់ឲ្យកោះសន្តិភាពដឹងថា លោកពិតជាបានអនុញ្ញាតិឲ្យគេខួងទម្លុះផ្លូវបេតុងនោះមែន ប៉ុន្តែមិនមែនឲ្យខួងដើម្បីបូមខ្សាច់ដាក់លក់នោះទេ គឺខួងដើម្បីបង្កប់ទុយោបង្ហូរទឹកដែលជន់លិចចេញ ទីតាំងនោះមានទឹកជន់លិច ធ្វើឲ្យប៉ះពាល់ដល់ប្រជាពលរដ្ឋ១០គ្រួសារ ។ តាមការអះអាងរបស់ប្រជាពលរដ្ឋនៅតំបន់នោះបានបញ្ជាក់ថា ហេតុផលដែលគេលើកឡើងនៅក្នុងលិខិតស្នើសុំនោះ គឺភូតកុហក់ទាំងស្រុងព្រោះនៅជុំវិញទីតាំងនោះពុំមានទឹកជន់លិចនោះទេ ហើយក៏គ្មានប្រជាពលរដ្ឋណារងផលប៉ះពាល់នោះដែរ ហើយទាំងប្រជាពលរដ្ឋអាជ្ញាធរមូលដ្ឋានសមត្ថកិច្ច និងស្ថាប័នពាក់ពន្ធ័ទាំងអស់ សុទ្ធតែបានដឹងរឿងនេះ៕
ចែករំលែកព័តមាននេះ