កម្ពុជានឹងទទួលបានភ្ញៀវទេសចរអន្តរជាតិ5,5លាននាក់
រាជធានីភ្នំពេញ ៖ ស្របពេលកម្ពុជាកំពុងធ្វើពិពិធកម្មទីផ្សារ (ភាពសម្បូរបែបនៃទីផ្សារ) និង
រាជធានីភ្នំពេញ ៖ ស្របពេលកម្ពុជាកំពុងធ្វើពិពិធកម្មទីផ្សារ (ភាពសម្បូរបែបនៃទីផ្សារ) និងវិស័យដឹកជញ្ជូនផ្លូវអាកាស មន្ត្រីជាន់ខ្ពស់ក្រសួងទេសចរណ៍អះអាងថា កម្ពុជានឹងទទួលបានទេសចរអន្តរជាតិប្រមាណ៥,៥លាននាក់នៅដំណាច់ឆ្នាំនេះ និងប្រមាណ៧លាននាក់នៅឆ្នាំ២០២០ខាងមុខ ។
រដ្ឋលេខាធិការក្រសួងទេសចរណ៍ លោក ប៉ាក់ សុខុម បានឲ្យដឹងកាលពីល្ងាចថ្ងៃទី២ តុលា ថា ផ្តើមចេញពីនយោបាយឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា កម្ពុជាមានសុខសន្តិភាពពេញលេញ និងបានអភិវឌ្ឍន៍រីកចម្រើនលើគ្រប់វិស័យ ក្នុងនោះវិស័យទេសចរណ៍កម្ពុជា ដែលជាទេសចរណ៍វប្បធម៌ និងធម្មជាតិ ត្រូវបានរាជរដ្ឋាភិបាលចាត់ទុកជាមាសបៃតងបាននិងកំពុងបោះជំហានរីកចម្រើនជាលំដាប់ ដោយរក្សាបាននូវកំណើនជារៀងរាល់ឆ្នាំ រួមចំណែកប្រមាណ១២% នៃផលិតផលក្នុងស្រុកសរុប និងផ្តល់ការងារដោយផ្ទាល់ប្រមាណជាង៦២ម៉ឺននាក់ និងប្រយោលជាច្រើនម៉ឺននាក់បន្ថែមទៀត ។
លោកបន្តថា ឆ្លើយតបនឹងបរិបទភាពស្អាត និងបៃតងនេះ ផ្នែកសេវាកម្មម្ហូបអាហារកម្ពុជា យើងមានប្រព័ន្ធចំណាត់ថ្នាក់ភោជនីយដ្ឋាន និងអាហារដ្ឋានទេសចរណ៍ ដែលបានអនុម័តដោយប្រកាសលេខ១០៩ ប្រក ចុះថ្ងៃទី១២ ខែកក្កដា ឆ្នាំ២០១៦ ដែលជាការជំរុញ និងលើកទឹកចិត្តដល់មូលដ្ឋានអាជីវកម្ម សេវាកម្ម ភោជនីយដ្ឋាន និងអាហារដ្ឋានទេសចរណ៍នៅកម្ពុជា ឲ្យដំណើរការអាជីវកម្មដោយយកចិត្តទុកដាក់ទៅលើបញ្ហាបរិស្ថាន ការរៀបចំទីតាំងសុវតិ្ថភាព អនាម័យ ជំនាញវិជ្ជាជីវៈ និងការធ្វើបដិសណ្ឋារកិច្ចរបស់បុគ្គលិក ដោយឈរលើមូលដ្ឋានគោលការណ៍វាយតម្លៃចំនួន១០សូចនាករ និង១០៤លក្ខណៈវិនិច្ឆ័យ ។ បច្ចុប្បន្ន អាជីវកម្មភោជនីយដ្ឋាន និងអាហារដ្ឋានទេសចរណ៍ ដែលមានចំណាត់ថ្នាក់នៅទូទាំងប្រទេសកម្ពុជា សរុបចំនួន៤អាជីវកម្ម ក្នុងនោះនៅរាជធានីភ្នំពេញ មាន២អាជីវកម្ម និងនៅខេត្តព្រះសីហនុ មាន២អាជីវកម្ម ។
រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងថា ផ្អែកលើកំណើននៃការមកដល់របស់ភ្ញៀវទេសចរឆ្នាំនេះ កម្ពុជាចាប់ផ្តើមទទួលកំណើនភ្ញៀវ២ខ្ទង់ឡើងវិញ បន្ទាប់ពីថមថយល្បឿនកាលពីប៉ុន្មានឆ្នាំមុន ។ ហេតុនេះ យើងរំពឹងថា កម្ពុជានឹងសម្រេចបានកំណើនភ្ញៀវរហូតដល់ប្រមាណ៥,៥លាននាក់ ហើយវិស័យនេះបានផ្តល់ការងារដល់ប្រជាពលរដ្ឋដោយផ្ទាល់ជាង១លាននាក់ រួមបញ្ចូលទាំងការដឹកជញ្ជូនដែលបម្រើឲ្យវិស័យនេះផង ដែរ ។
លោកបន្តថា ៖« ក្រសួងបានដាក់ចេញនូវគោលនយោបាយជាច្រើនដើម្បីបង្កើន និងពង្រឹងសេវាបដិសណ្ឋារកិច្ច និងការបណ្តុះបណ្តាលធនធានមនុស្សក្នុងវិស័យនេះ ព្រោះដើម្បីឲ្យវិស័យនេះមានការអភិវឌ្ឍដោយនិរន្តរភាព យើងត្រូវមានធនធានមនុស្សប្រកដោយគុណវុឌ្ឍិ » ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា ថ្លែងថា តាមអ្វីដែលទិន្នន័យបានបង្ហាញនៃកំណើនទេសចរណ៍ឆ្នាំនេះ កម្ពុជានឹងសម្រេចបានកំណើនភ្ញៀវទេសចរអន្តរជាតិ តាមការព្យាកររបស់ក្រសួងទេសចរណ៍ ក្នុងនោះភ្ញៀវទេសចរចិននឹងឈរចំណាត់ថ្នាក់លេខ១ ជំនួសភ្ញៀវទេសចរវៀតណាម ដែលបាននាំមុខគេក្នុងរយៈពេលប៉ុន្មានឆ្នាំកន្លងមកនេះ ។ លោកបន្តថា កំណើនភ្ញៀវទេសចរឆ្នាំនេះ ឆ្លុះបញ្ចាំងនូវការអនុវត្តគោលនយោបាយរបស់រាជរដ្ឋាភិបាលមានប្រសិទ្ធភាព ជាពិសេស គោលនយោបាយបើកចំហជើងមេឃរបស់រាជរដ្ឋាភិបាលកម្ពុជា ។
លោកបន្តថា ៖« ទេសចរណ៍ ជាវិស័យមួយ ដែលបានជួយជំរុញកំណើនសេដ្ឋកិច្ចយ៉ាងខ្លាំង ព្រោះពេលភ្ញៀវទៅដល់ទីណា តែងតែមានសកម្មភាពសេដ្ឋកិច្ចកើតឡើងនៅទីនោះ » ៕
ចែករំលែកព័តមាននេះ